ເຈົ້າໜ້າທີ່ເຕືອນໃຫ້ຍົກສູງສະຕິປ້ອງກັນອັກຄີໄພ
ກົມຕໍາຫລວດສະກັດກັ້ນ ແລະ ຕ້ານອັກຄີໄພ ໄດ້ເຕືອນໃຫ້ສັງຄົມຍົກສູງສະຕິປ້ອງກັນອັກຄີໄພ, ພາຍຫລັງເຫັນວ່າພຽງເດືອນດຽວທົ່ວປະເທດມີອັກຄີໄພ ເກີດຂຶ້ນຫລາຍກວ່າ 20 ຄັ້ງ ແລະ ມີຜົນເສຍຫາຍຄື: ເຮືອນ 19 ຫລັງ ແລະ ໂຮງເລື່ອຍ, ໂຮງອົບຢາງພາລາ, ຫ້ອງສະຕູດີໂອ, ຮ້ານບັນເທິງ, ຕະຫລາດ ແລະ ອື່ນໆ ລວມມີມູນຄ່າເສຍຫາຍກວ່າ 5 ຕື້ກີບ ແລະ ສາເຫດຫລັກຂອງອັກຄີໄພກໍແມ່ນໄຟຟ້າລັດວົງຈອນ, ໄຕ້ທູບທຽນບູຊາ, ຈູດຂີ້ເຫຍື້ອຊະຊາຍ, ຄວາມປະໝາດເລິນເລີ້ ແລະ ອື່ນໆ.
ກົມຕໍາຫລວດດັ່ງກ່າວ ໃຫ້ຮູ້ວ່າ: ໃນຜ່ານມາ,ອັກຄີໄພ ແມ່ນປາກົດການຫຍໍ້ທໍ້ ໜຶ່ງ ທີ່ສ້າງຄວາມສູນເສຍໃຫ້ແກ່ຊີວິດ ແລະ ຊັບສີນຂອງປະຊາຊົນເປັນຈໍານວນຫລາຍ, ແຕ່ບັນຫານີ້ ພວກເຮົາສາມາດປ້ອງກັນໄດ້ດ້ວຍການມີສະຕິໃນການຊົມໃຊ້ໄຟຟ້າ ເຊັ່ນ: ໝັ່ນກວດກາສາຍໄຟ ຫລື ອຸປະກອນເຄື່ອງໃຊ້ໄຟຟ້າພາຍໃນເຮືອນ ແລະ ອາຄານຕ່າງໆ, ຖ້າຫາກພົບວ່າມີສະພາບເກົ່າແກ່ ຫລື ເປ່ເພ ບໍ່ຮັບປະກັນຄວາມປອດໄພໃນການນໍາໃຊ້ຕ້ອງປ່ຽນໃໝ່ທັນທີ, ການດັງໄຟແຕ່ງກິນ ຫລື ໃຕ້ທູບທຽນບູຊາຕ່າງໆ ເມື່ອສໍາເລັດເສັດສິ້ນແລ້ວ ກໍຕ້ອງດັບມອດທັນທີ ແລະ ບໍ່ຄວນຈູດຂີ້ເຫຍື້ອຊະຊາຍເດັດຂາດ ເພື່ອປ້ອງກັນບໍ່ໃຫ້ເກີດອັກຄີໄພໄດ້ງ່າຍ.
