ມີຫຼາຍກວ່າ 200 ຮ້ານເຂົ້າຮ່ວມງານມະຫະກໍາສີມືຫັດຖະກໍາລາວ ຄັ້ງທີ 18
ງານມະຫະກໍາສີມືຫັດຖະກໍາລາວ ໄດ້ຈັດຂຶ້ນລະຫວ່າງວັນທີ 29 ຕຸລາ- 3 ພະຈິກ 2019 ນີ້, ຢູ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ເຊິ່ງມີຫຼາຍກວ່າ 200 ຮ້ານ ເຂົ້າຮ່ວມວາງສະແດງສິນຄ້າໃນງານດັ່ງກ່າວ, ໂດຍການເຂົ້າຮ່ວມເປີດງານຂອງທ່ານ ນາງ ນາລີ ສີສຸລິດ ພັນລະຍາ ນາຍົກລັດຖະມົນຕີແຫ່ງ ສປປ ລາວ ທີ່ປຶກສາອາວຸໂສ ສະມາຄົມ ຫັດຖະກໍາລາວ, ມີທ່ານຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ, ຮອງລັດຖະມົນຕີ ກະຊວງ ຖວທ ແລະ ມີທູຕານຸທູດ, ຜູ້ຕາງໜ້າອົງການຈັດຕັ້ງສາກົນປະຈໍາລາວເຂົ້າຮ່ວມເປັນຈໍານວນຫຼາຍ.
ການຈັດງານດັ່ງກ່າວກໍເພື່ອແນໃສ່ສ້າງໂອກາດໃຫ້ແກ່ຊາວສ້າງຫັດຖະກໍາຢູ່ທ້ອງຖິ່ນຕ່າງໆ ໄດ້ນໍາເອົາສິນຄ້າຂອງຕົນມາວາງສະແດງ ແລະ ຈໍາໜ່າຍເພື່ອເປີດກວ້າງຕະຫຼາດ, ພ້ອມເປັນການສ້າງໂອກາດໃຫ້ບັນດາຊາວສ້າງຫັດຖະກໍາໄດ້ພົບປະ, ແລກປ່ຽນບົດຮຽນກ່ຽວກັບການຜະລິດເຄື່ອງຫັດຖະກໍາຊຶ່ງກັນ ແລະ ກັນ, ເພື່ອພັດທະນາສີມືຂອງຕົນ ແລະ ການສົ່ງເສີມຜະລິດຕະພັນຫັດຖະກໍາໃຫ້ຕິດພັນກັບການທ່ອງທ່ຽວອີກດ້ວຍ.
ໃນງານປີນີ້, ມີຮ້ານຂາຍເຄື່ອງຫັດຖະກໍາຫຼາຍຢ່າງເຊັ່ນ:
ເຄື່ອງຫັດຖະກໍາຜ້າໄໝ, ຝ້າຍພື້ນເມືອງ, ເຄື່ອງເງິນວັດຖຸມີຄ່າ, ທອງເຫຼືອງ, ເຄື່ອງປັ້ນດິນເຜົາ, ເຄື່ອງຈັກສານຈາກໄມ້ປ່ອງ, ຫວາຍ ແລະ ເຄື່ອງຊົນເຜົ່າຕ່າງໆ,
ພ້ອມນີ້ຍັງມີການສາທິດການຜະລິດສິນຄ້າຫັດຖະກໍາລາວດ້ວຍມື,
ມີການເດີນແບບຊຸດຊົນເຜົ່າ,
ການສະແດງໃຫ້ເຫັນຮີດຄອງປະເພນີຂອງຊົນເຜົ່າໄຕດໍາ-ໄຕແດງແບບບູຮານ
ແລະ ຊົນເຜົ່າກຶມມຸ, ມີການສະແດງລະຄອນເວທີຫັດຖະກໍາຕິດພັນກັບການທ່ອງທ່ຽວ,
ການສະແດງກາຍະສິນ,
ສະແດງຟ້ອນລາຍງ້າວ,
ຂັບງື່ມ,
ມວຍລາຍລາວ ແລະ
ກິດຈະກໍາສະແດງສິລະປະຂອງຫຼານນ້ອຍເຍົາວະຊົນຈາກໂຮງຮຽນແຫ່ງຕ່າງໆ. ນອກນີ້ຍັງມີກອງປະຊຸມສໍາມະນາໃນຫົວຂໍ້:
ການອອກແບບ, ການຕະຫຼາດ, ການຫຸ້ມຫໍ່ຜະລິດຕະພັນ, ການເຂົ້າຫາແຫຼ່ງທຶນກອງທຶນ SMEs ແລະ ກອງທຶນສົມທົບເພື່ອສົ່ງເສີມທຸລະກິດ (BAF),
ນະໂຍບາຍສົ່ງເສີມຂະແໜງຫັດຖະກໍາ,
ການພົບປະເຊື່ອມໂຍງລະຫວ່າງບໍລິສັດທ່ອງທ່ຽວ
ແລະ ຫັດຖະກໍາ, ກິດຈະກໍາປະກວດຫົວໜ່ວຍຫັດຖະກໍາທີ່ສ້າງສັນ, ປະກວດຮ້ານງາມ ແລະ ຜະລິດຕະພັນຫັດຖະກໍາເຄື່ອງທີ່ລະນຶກ,
ນອກນັ້ນ
ຍັງມີກິດຈະກໍາການສອນການແປຮູບຜະລິດຕະພັນຫັດຖະກໍາເຄື່ອງທີ່ລະນຶກ,
ການສອນແຕ້ມ ແລະ ອື່ນໆ
ໂດຍການຮ່ວມມືລະຫວ່າງສະມາຄົມ ຫັດຖະກໍາລາວ ແລະ
ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອີກດ້ວຍ.
ຜະລິດຕະພັນຫັດຖະກໍາ ທີ່ີມາຈາກທຸກພາກໃນຂອບເຂດທົ່ວປະເທດ, ປະອບມີ ຜ້າໄໝ, ຜ້າຝ້າຍພື້ນເມືອງ, ເຄື່ອງເງິນ-ວັດຖຸມີຄ່າ, ເຄື່ອງທອງເຫຼືອງ, ເຄື່ອງປັ້ນດິນເຜົາ, ເຄື່ອງຈັກສານຈາກໄມ້ປ້ອງ, ຫວາຍ, ເຄື່ອງຊົນເຜົ່າຕ່າງໆ, ພ້ອມນີ້, ຍັງມີການສາທິດການຜະລິດສິນຄ້າຫັດຖະກໍາລາວດ້ວຍມື, ເດີນແບບຊຸດຊົນເຜົ່າໄຕດໍາ-ໄຕແດງແບບບູຮານ ແລະ ຊົນເຜົ່າກຶມຫມຸ, ສະແດງລະຄອນເວທີ, ການສົນທະນາຫັດຖະກໍາຕິດພັນກັບການທ່ອງທ່ຽວ ແລະ ອື່ນໆ, ມີການສາທິດການລ້ຽງມ້ອນໜາມເປັນມ້ອນປ່າທີ່ກິນໃບມັນຕົ້ນ ເພື່ອເປັນທາງເລືອກໃໝ່ໃຫ້ແກ່ການຜະລິດເສັ້ນໄຍທີ່ນໍາມາຕໍ່າຜ້າ. ນອກນີ້, ຍັງມີການປະກວດຜະລິດຕັນພັນຫັດຖະກໍາສໍາເລັດຮູບ, ກິດຈະກໍາຕ້ອນຮັບປີທ່ອງທ່ຽວລາວ ແລະ ກິດຈະກໍາອື່ນໆອີກຫຼາກຫຼາຍ.
