ນາຍົກສັ່ງຕັ້ງຄະນະຮັບພິຊອບວຽກງານປະຢັດ

  ຄໍາສັ່ງນາຍົກລັດຖະມົນຕີວ່າດ້ວຍການປະຢັດລາຍຈ່າຍງົບປະມານຂອງລັດທີ່ກໍານົດອອກເມື່ອບໍ່ດົນນີ້, ນອກຈາກເນັ້ນໃຫ້ທຸກຫົວໜ່ວຍງົບປະມານປະຢັດລາຍຈ່າຍຕາມລະບຽບກົດໝາຍກໍານົດໄວ້ຢ່າງເຂັ້ມງວດແລ້ວ. ໃນຄໍາສັ່ງດັ່ງກ່າວຍັງກໍານົດໃຫ້ບັນດາກະຊວງ, ຂະແໜງການນັບແຕ່ສູນກາງຮອດທ້ອງຖິ່ນຮີບຮ້ອນແຕ່ງຕັ້ງຄະນະຮັບພິຊອບວຽກງານປະຢັດ, ພ້ອມທັງອອກຄໍາແນະລະອຽດກ່ຽວກັບວຽກງານປະຢັດທີ່ຕິດພັນກັບຂະແໜງການຂອງຕົນ ຄື: ມອບໃຫ້ກະຊວງການເງິນຄົ້ນຄວ້າສ້າງດໍາລັດວ່າດ້ວຍການຄຸ້ມຄອງ-ນໍາໃຊ້ພາຫະນະຂອງລັດ, ພ້ອມທັງເປັນເຈົ້າການປະສານສົມທົບກັບບັນດາກະຊວງ, ຂະແໜງການ ແລະ ພາກສ່ວນກ່ຽວຂ້ອງສັງລວມບັນຊີພາຫະນະໃຫ້ສໍາເລັດໂດຍໄວ. ໃຫ້ກະຊວງໂຍທາທິການ ແລະ ຂົນສົ່ງ ຄົ້ນຄວ້າກໍານົດຫົວໜ່ວຍລາຄາການກໍ່ສ້າງປະເພດຕ່າງໆໃນແຕ່ລະໄລຍະ, ກໍານົດມາດຕະຖານຕຶກອາຄານ, ສໍານັກງານ, ຫ້ອງການຢູ່ຂັ້ນສູນກາງ ແລະ ທ້ອງຖິ່ນ ເພື່ອຄວາມເປັນເອກະພາບໃນຂອບເຂດທົ່ວປະເທດ, ພ້ອມທັງກໍານົດມາດຕະຖານເສັ້ນທາງ, ທາງຍ່າງ ແລະ ການຕິດປ້າຍບອກທາງຕາມລະບຽບກົດໝາຍວາງອອກຢ່າງເຂັ້ມງວດ ເພື່ອໃຫ້ສອດຄ່ອງກັບສະພາບທ້ອງຖິ່ນໃນຂອບເຂດທົ່ວປະເທດ. ໃຫ້ກະຊວງພະລັງງານ ແລະ ບໍ່ແຮ່ ຄົ້ນຄວ້າກໍານົດມາດຕະຖານເຕັກນິກການນໍາໃຊ້ພະລັງານໄຟຟ້າ, ພ້ອມທັງກວດກາຄືນລະບົບການຕິດຕັ້ງ ແລະ ນໍາໃຊ້ພະລັງານໄຟຟ້າຕາມສໍານັກງານ, ອົງການຂອງລັດໃຫ້ຖືກຕ້ອງຕາມມາດຕະຖານເຕັກນິກ ແລະ ການຊົມໃຊ້ຕົວຈິງ ເພື່ອຫລຸດຜ່ອນລາຍຈ່າຍຄ່າກະແສໄຟຟ້າໃນອົງການຈັດຕັ້ງລັດ.

ມອບໃຫ້ກະຊວງພາຍໃນສົມທົບກັບພາກສ່ວນກ່ຽວຂ້ອງຄົ້ນຄວ້າລະບຽບການປະຕິບັດເງິນອຸດໜູນ ແລະ ເງິນນະໂຍບາຍຕ່າງໆໃຫ້ພະນັກງານລັດຖະກອນຄືໃໝ່ຢ່າງເປັນເອກະພາບໃນທົ່ວປະເທດ, ພ້ອມທັງຄົ້ນຄວ້າກໍານົດຂະໜາດກົງຈັກການຈັດຕັ້ງ, ຈໍານວນພະນັກງານ ແລະ ຕໍາແໜ່ງເພື່ອໃຫ້ມີຄວາມເໝາະສົມຢູ່ແຕ່ລະຂະແໜງການ. ໃຫ້ກະຊວງສາທາລະນະສຸກ, ກະຊວງສຶກສາທິການ ແລະ ກິລາ ປະສານສົມທົບກັບພາກສ່ວນກ່ຽວຂ້ອງຕ່າງໆ ເພື່ອກໍານົດຂະໜາດມາດຕະຖານການກໍ່ສ້າງໂຮງໝໍ, ສຸກສາລາ, ສະຖານທີ່ບໍລິການປິ່ນປົວແຕ່ລະຂັ້ນ, ການກໍ່ສ້າງໂຮງຮຽນແຕ່ລະແຫ່ງຕ້ອງໃຫ້ສອດຄ່ອງກັບຄວາມຕ້ອງການຕົວຈິງຂອງແຕ່ລະທ້ອງຖິ່ນໃນຂອບເຂດທົ່ວປະເທດ, ຂະນະດຽວກັນໃຫ້ນໍາໃຊ້ສະໜາມກິລາຂອງບັນດາແຂວງທີ່ມີແລ້ວເພື່ອຈັດການແຂ່ງຂັນມະຫາກໍາກິລາແຫ່ງຊາດແຕ່ລະຄັ້ງ, ຫ້າມກໍ່ສ້າງສະໜາມກິລາໃໝ່ເພື່ອຮັບໃຊ້ການແຂ່ງຂັນມະຫາກໍາກິລາໃໝ່ໃນໄລຍະງົບປະມານຍັງມີຄວາມຫຍຸ້ງຍາກ ແລະ ໃຫ້ບັນດາລັດຖະມົນຕີ, ຫົວໜ້າອົງການທຽບເທົ່າກະຊວງ, ປະທານແນວລາວສ້າງຊາດ, ຫົວໜ້າອົງການຈັດຕັ້ງມະຫາຊົນຂັ້ນສູນກາງ, ເຈົ້າຄອງ, ບັນດາແຂວງ, ລັດວິສາຫະກິດໃນທົ່ວປະເທດເປັນເຈົ້າການຮັບພິຊອບຊີ້ນໍາ-ນໍາພາການຈັດຕັ້ງປະຕິບັດຄໍາສັ່ງສະບັບນີ້ໃຫ້ເລິກເຊິ່ງ, ທົ່ວເຖິງ ແລະ ເປັນຮູບປະທໍາ, ພ້ອມທັງເພີ່ມທະວີການໂຄສະນາປຸກລະດົມຊວນເຊື່ອ, ຈັດຕັ້ງເຊື່ອມຊືມໃຫ້ພະນັກງານ-ລັດຖະກອນ ທີ່ຢູ່ໃນການຄຸ້ມຄອງຂອງຂະແໜງການຕົນທຸກຂັ້ນໃຫ້ມີຄວາມເຂົ້າໃຈ ແລະ ມີສະຕິສູງຕໍ່ການນໍາໃຊ້ງົບປະມານແຫ່ງລັດຢ່າງປະຢັດ ແລະ ມີຈຸດສຸມ, ຖືເອົາວຽກງານດັ່ງກ່າວເຂົ້າໃນການຂະບວນການແຂ່ງຂັນຮັກຊາດ ແລະ ພັດທະນາ ແລະ ໃຫ້ຂະແໜງການເງິນເຄັ່ງຄັດກວດກາລາຍຈ່າຍຂອງບັນດາຫົວໜ່ວຍງົບປະມານ ຖ້າເຫັນວ່າລາຍຈ່າຍໃດບໍ່ສອດຄ່ອງກັບຄໍາສັ່ງສະບັບນີ້ໃຫ້ຮີບຮ້ອນກວດກາ ແລະ ຢຸດຕິການເບີກຈ່າຍທຸກອັນທີ່ຂັດກັບຄໍາສັ່ງສະບັບນີ້.