ກອງປະຊຸມລັດຖະມົນຕີໄອຊີທີອາຊຽນສໍາເລັດຜົນຈົບງາມ
ໃນກອງປະຊຸມລັດຖະມົນຕີໄອຊີທີອາຊຽນ ຄັ້ງທີ 19 ໄດ້ສໍາເລັດຜົນຢ່າງຈົບງາມ, ໃນວັນທີ 25 ຕຸລາ ນີ້ ທີ່ນະຄອນຫຼວງວຽງຈັນ ນອກຈາກບັນດາຄະນະລັດຖະມົນຕີ 10 ປະເທດອາຊຽນເຂົ້າຮ່ວມແລ້ວ ຍັງມີຄະນະລັດຖະມົນຕີ ຈາກ ສປ ຈີນ, ຍີ່ປຸ່ນ ແລະ ສ.ເກົາຫລີ ເຂົ້າຮ່ວມນໍາດ້ວຍ, ສະຫຼຸບຕີລາຄາຜົນການຮ່ວມມືໃນໄລຍະຜ່ານມາ ແລະ ວາງທິດທາງຕໍ່ໜ້າເຊັ່ນ: ເຫັນດີປ່ຽນຊື່ກອງປະຊຸມລັດຖະມົນຕີໄອຊີທີອາຊຽນ ມາເປັນກອງປະຊຸມລັດຖະມົນຕີດີຈິຕອນອາຊຽນ ADGMIN ແລະ ປ່ຽນຊື່ ກອງປະຊຸມເຈົ້າໜ້າທີ່ອາວຸໂສໂທລະຄົມອາຊຽນ ມາເປັນກອງປະຊຸມອາວຸໂສດີຈິຕອນອາຊຽນ ADGSOM ເພື່ອໃຫ້ແທດເໝາະສອດຄ່ອງສະພາບເຕັກໂນໂລຊີ, ພ້ອມໄດ້ຮັບຮອງເອົາໜ້າວຽກຂອງລັດຖະມົນຕີດີຈິຕອນ ແລະ ຂອບໜ້າວຽກອາວຸໂສດີຈິຕອນ ເພື່ອນຳໄປຜັນຂະຫຍາຍ ແລະ ສົ່ງເສີມການຮ່ວມມືຂອງຂະແໜງການປິ່ນອ້ອມຕ່າງໆ ກອງ ປະຊຸມເຫັນດີເພີ່ມທະວີການຮ່ວມມືເພື່ອຈັດຕັ້ງປະຕິບັດແຜນແມ່ບົດ 2020 ແລະ ກະກຽມສ້າງແຜນແມ່ບົດ 2025 ໃຫ້ສໍາເລັດເພື່ອຂັບເຄື່ອນອາຊຽນໄປສູ່ຍຸກເສດຖະກິດ ແລະ ສັງຄົມດີຈິຕອນ ທີ່ມີຄວາມຍືນຍົງ ແລະ ເປັນຊຸມຊົນນະວັດຕະກໍາຂອງອາຊຽນ.
ນອກນັ້ນກອງປະຊຸມໄດ້ຮັບຮອງເອົາທິດທາງຂອງອາຊຽນ ເພື່ອເພີ່ມທະວີການຮ່ວມມື ແລະ ການປັບປຸງລະບົບສາຍສົ່ງໃຕ້ທະເລ ແລະ ຂອບການຮ່ວມມືຂອງອາຊຽນ ໃນການບໍລິການເພື່ອສັງຄົມ ແລະ ເອົາໃຈໃສ່ແກ້ໄຂເຫດສຸກເສີນທາງຄອມພິວເຕີຂອງອາຊຽນ ເພື່ອເພີ່ມປະສິດທິພາບໃນການປະສານ ກອງປະຊຸມ ຍິນດີຕໍ່ຜົນສໍາເລັດໂຄງການຂອງລາວໃນການສຶກສາກ່ຽວກັບການພັດທະນາ ບໍລິການທາງເອເລັກໂຕນິກໃນອາຊຽນ ທີ່ຮຽກຮ້ອງໃຫ້ພາກເອກະຊົນຕ້ອງມີສ່ວນຮ່ວມໃນການແລກປ່ຽນຂໍ້ມູນອອນລາຍໃຫ້ມີຄວາມປອດໄພ ແລະ ຫັນການບໍລິການເປັນເອເລັກໂຕຣນິກຫລາຍຂຶ້ນ ຍິນດີຕໍ່ໂຄງການສຶກສາ ການພັດທະນາເນື້ອຫາທ້ອງຖິ່ນຂອງອາຊຽນ ໂດຍເນັ້ນໃຫ້ມີຍຸດທະສາດການພັດທະນາເນື້ອຫາດີຈິຕອນອາຊຽນ ແລະ ທິດທາງການພັດທະນາເນື້ອຫາດີຈິຕອນໃນທ້ອງຖິ່ນ ເພື່ອຊຸກຍູ້ການເຕີບໂຕຂອງເສດຖະກິດ ແລະ ສັງຄົມດີຈິຕອນໃນພາກພື້ນເພື່ອຄວາມພະຍາຍາມ ໃນການຫລຸດຜ່ອນຄວາມແຕກໂຕນດ້ານດີຈິຕອນໃນອາຊຽນ. ພ້ອມນັ້ນ, ກອງປະຊຸມຍັງໄດ້ຮັບຮອງເອົາຖະແຫລງການວຽງຈັນ ວ່າດ້ວຍການເຊື່ອມຈອດທີ່ທັນສະໄໝໃນການຫັນເປັນດີຈິຕອນຂອງອາຊຽນ ຊຸກຍູ້ສົ່ງເສີມການເຊື່ອມໂຍງຂອງອາຊຽນ ແລະ ປະກອບສ່ວນໃນການພັດທະນາສົ່ງເສີມເສດຖະກິດດີຈິຕອນ.
