ກົມຂົນສົ່ງຈະແກ້ໄຂບັນຫາລົດຂົນສົ່ງໃຫ້ເຂົ້າສູ່ລະບຽບ

ກົມຂົນສົ່ງກະຊວງໂຍທາທິການ ແລະ ຂົນສົ່ງຈະເລັ່ງແກ້ໄຂບັນຫາລົດຂົນສົ່ງໃຫ້ເຂົ້າສູ່ລະບຽບຢ່າງເຂັ້ມງວດ, ພາຍຫລັງໄດ້ມີຫາງສຽງຂອງສັງຄົມສ່ອງແສງມາວ່າປັດຈຸບັນມີລົດຂົນສົ່ງລະຫວ່າງປະເທດປ້າຍທະບຽນລາວຈໍານວນບໍ່ໜ້ອຍແມ່ນຄົນຕ່າງປະເທດເປັນຜູ້ຂັບ, ໂດຍສະເພາະຢູ່ບັນດາແຂວງພາກໃຕ້.

ທ່ານຮັກສາການຫົວໜ້າກົມຂົນສົ່ງ ໃຫ້ຮູ້ວ່າ: ຜ່ານການລົງຕິດຕາມກວດກາຈໍານວນລົດຂົນສົ່ງລະຫວ່າງປະເທດໃນ 3 ແຂວງຄື: ຄຳມ່ວນ, ສະຫວັນນະເຂດ ແລະ ຈຳປາສັກໃນປີຜ່ານມາພົບເຫັນລົດບັນທຸກສິນຄ້າທີ່ເປັນປ້າຍທະບຽນລາວແຕ່ຄົນຕ່າງປະເທດເປັນຜູ້ຂັບຜ່ານດ່ານເຂົ້າ-ອອກລະຫວ່າງປະເທດມີຫລາຍກວ່າ 200 ຄັນ ແລະ ພົບການນຳໃຊ້ໃບຂັບຂີ່ປອມ 1 ກໍລະນີ ແລະ ຕໍ່ບັນຫາດັ່ງກ່າວກົມຂົນສົ່ງໄດ້ສະເໜີໃຫ້ກະຊວງກ່ຽວຂ້ອງຮັບຊາບເພື່ອເລັ່ງຫາວິທີແກ້ໄຂໂດຍໄວ. ນອກນີ້ຍັງໄດ້ກວດກາການນຳໃຊ້ ແລະ ຄຸ້ມຄອງສະຖານີລົດຂົນສົ່ງໂດຍສານສາຍໃຕ້ ແລະ ສາຍເໜືອຢູ່ນະຄອນຫລວງວຽງຈັນ ເພື່ອກໍານົດມາດຕະການຄຸ້ມຄອງໃຫ້ຖືກຕ້ອງ ແລະ ເຂັ້ມງວດດີຂຶ້ນ.