ບໍ່ມີຊື່ລຸຍຢູໂຣປາ ! ໂຊລຊາ ຕອບເອງ ເດເຄອາ-ປ໊ອກບາ ລົງສູ້ ນໍຣິດ ໄຫວ ຫລື ບໍ່
ໂອເລ່ ກຸນນາ ໂຊລຊາ ຜູ້ຈັດການທີມ ແມນເຊັສເຕີ ຢູໄນເຕັດ ເປີດເຜີຍສາເຫດ ດາບິດ ເດ ເຄອາ ແລະ ປອລ ປ໊ອກບາ ທີ່ບໍ່ມີຊື່ຕິດທີມໃນເກມກັບ ປາຣຕິຊານ ແລະ ຈະພ້ອມຫລິ້ນເກມລີກວັນທີ 27 ຕຸລານີ້ ຫລື ບໍ່.
ເດ ເຄອາ ເຄີຍໄດ້ຮັບບາດເຈັບບໍລິເວນຕົ້ນຂາຈາກຕອນຫລິ້ນໃຫ້ທີມຊາດສະເປນ ແລະ ຕອນທຳອິດທຳທ່າວ່າຈະຕ້ອງໃຊ້ເວລາພັກປິ່ນປົວໃນລະດັບໜຶ່ງ ແຕ່ລາວກໍຟິດທັນຊ່ວຍທີມໃນເກມລີກນັດສະເໝີ ລິເວີພູລ 1-1 ໃນວັນທີ 20 ຕຸລາຜ່ານມາ. ເຖິງຢ່າງໃດກໍຕາມ ລາວພັດບໍ່ມີຊື່ຢູ່ໃນທີມຊຸດໄປຢາມ ປາຣຕິຊານ ເບລເກຣດ ໃນເກມ ຢູຟາ ຢູໂຣປາ ລີກ ຮອບແບ່ງກຸ່ມ, ກຸ່ມ A ຈົນເຮັດໃຫ້ “ເຣັດ ອາຣມີ່” ຫລາຍຄົນກັງວົນວ່າອາການບາດເຈັບຂອງລາວກັບຄືນມາອີກ.
ຫລັງຈາກຖືກຖາມວ່າ: ເດເຄອາ ຈະລົງຫລິ້ນໃນວັນທີ 27 ຕຸລານີ້ໄດ້ ຫລື ບໍ່ນັ້ນ ໂຊລຊາ ຕອບວ່າ: “ດາບິດ ຈະພ້ອມລົງຫລິ້ນໃນວັນທີ 27 ຕຸລານີ້ ມັນກໍພຽງແຕ່ເຮົາບໍ່ສ່ຽງເອົາລາວມາຫລິ້ນບ່ອນນີ້ນຳເທົ່ານັ້ນ”.
ເຖິງຢ່າງໃດກໍຕາມ ໂຊລຊາ ຍອມຮັບວ່າ ປອລ ປ໊ອກບາ ກອງກາງຊາວຝຣັ່ງທີ່ບໍ່ມີຊື່ຕິດທີມນັດພົບກັບ ປາຣຕິຊານ ຄືກັນນັ້ນ ຈະບໍ່ໄດ້ຊ່ວຍທີມໃນເກມກັບ ນໍຣິດ ຫລັງຈາກ ປ໊ອກບາ ຍັງບໍ່ເຊົາຈາກ ອາການບາດເຈັບຂໍ້ຕີນ.
