ປກສ ສະຫວັນນະເຂດຈັບຜູ້ຄ້າຢາເສບຕິດມາດໍາເນີນຄະດີ

ເມື່ອບໍ່ດົນມານີ້, ເຈົ້າໜ້າທີ່ ປກສ ແຂວງສະຫວັນນະເຂດ, ສາມາດຈັບຜູ້ຄ້າຂາຍຢາເສບຕິດຢູ່ເຂດບ້ານນາຄໍານົນ, ເມືອງສອງຄອນ ຄື: ທ້າວ ສອງ ອາຍຸ 35 ປີຢູ່ບ້ານນາຄູນ, ທ້າວ ສົມຄິດ ອາຍຸ 47 ປີຢູ່ບ້ານແກ້ງຫີນແກ້ວ ແລະ ທ້າວ ຈັນທະວີໄຊ (ອອດ) ອາຍຸ 40 ປີຢູ່ບ້ານຈອມເພັດເມືອງສອງຄອນ, ພ້ອມຂອງກາງຢາບ້າ 8 ພັນເມັດ, ລົດຈັກ 2 ຄັນ ແລະ ໂທລະສັບມືຖື 3 ໜ່ວຍທີ່ໃຊ້ເຄື່ອນໄຫວກະທໍາຜິດ, ຈຶ່ງໄດ້ຢຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ. ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ໄດ້ຮ່ວມກັນຄ້າຂາຍຢາເສບຕິດໃຫ້ໄວລຸ້ນພາຍໃນບ້ານ ແລະ ບ້ານໃກ້ຄຽງຂອງຕົນມາເປັນເວລາດົນນານແລ້ວ.

ເຈົ້າໜ້າທີ່ໃຫ້ຮູ້ວ່າ: ການຈັບຜູ້ຄ້າຢາເສບຕິດໄດ້ຄັ້ງນີ້, ແມ່ນໄດ້ຮັບແຈ້ງຈາກພົນລະເມືອງດີວ່າຈະມີກຸ່ມຄົນບໍ່ດີລັກລອບຄ້າຂາຍຢາເສບຕິດຢູ່ເຂດບ້ານດັ່ງກ່າວ ແລະ ໄດ້ສົ່ງກໍາລັງເຈົ້າໜ້າທີ່ລົງແກ້ໄຂໄດ້ສໍາເລັດ.