ກອງປະຊຸມເຈົ້າໜ້າທີ່ອາວຸໂສໂທລະຄົມອາຊຽນ.
ກອງປະຊຸມເຈົ້າໜ້າທີ່ອາວຸໂສໂທລະຄົມອາຊຽນຄັ້ງທີ 20 ແລະ ກອງປະຊຸມປິ່ນອ້ອມອື່ນໆໄດ້ຈັດຂຶ້ນໃນວັນທີ 22 ຕຸລານີ້ທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານ ພູຂົງ ຈິດຮູບໂລກ ຫົວໜ້າກົມແຜນການ ແລະ ການຮ່ວມມື ກະຊວງໄປສະນີ, ໂທລະຄົມມະນາຄົມ ແລະ ການສື່ສານ(ປທສ), ມີບັນດາເຈົ້າໜ້າທີ່ອາວຸໂສໂທລະຄົມຂອງ 10 ປະເທດອາຊຽນ ແລະ ບັນດາປະເທດຄູ່ຮ່ວມເຈລະຈາເຂົ້າຮ່ວມ, ເພື່ອປຶກສາຫາລືກັນຫລາຍບັນຫາເພື່ອກະກຽມເນື້ອໃນສະເໜີ ແລະ ຮັບຮອງໃນກອງປະຊຸມລັດຖະມົນຕີໄອຊີທີອາຊຽນ ຄັ້ງທີ 19 (TELMIN 19) ທີ່ຈະໄຂຂຶ້ນໃນວັນທີ 24 ຕຸລານີ້ທີ່ນະຄອນຫລວງວຽງຈັນ.
ຫົວຂໍ້ທີ່ປຶກສາຫາລືໃນກອງປະຊຸມຄັ້ງນີ້ປະກອບມີ:
ການທົບທວນຄືນຄວາມຄືບໜ້າໃນການປະຕິບັດບັນດາກິດຈະກຳຕ່າງໆປະຈໍາປີ
2019 ທີ່ນອນໃນ ແຜນແມ່ບົດໄອຊີທີອາຊຽນ (AIM 2020) ແລະ ການກຳນົດບັນດາຕົວຊີ້ວັດ ຜົນການປະຕິບັດກິດຈະກຳ ແລະ
ການແຂ່ງຂັນຜະລິດຕະພັນໄອຊີທີອາຊຽນ ປະຈຳປີ 2019. ພ້ອມທັງຜ່ານຮ່າງຂອບການຮ່ວມມືອາຊຽນດ້ານການຄຸ້ມຄອງຂໍ້ມູນດີຈີຕອນ ແລະ
ຮ່າງເອກະສານແນວທາງຂອງອາຊຽນໃນການສ້າງຄວາມເຂັ້ມແຂງ ແລະ
ການປັບປຸງລະບົບສາຍສົ່ງໃຕ້ທະເລຂອງອາຊຽນ, ພິຈາລະນາ ເອກະສານແນວຄວາມຄິດກ່ຽວກັບແຜນແມ່ບົດດີຈີຕອນອາຊຽນ 2025 ເຊັ່ນ: ບັນດາຍຸດທະສາດ ແລະ ຂໍ້ລິເລີ່ມທີ່ສາມາດຂັບເຂື່ອນການຫັນເປັນເສດຖະກິດ ແລະ
ສັງຄົມດີຈີຕອນແຕ່ປີ 2020 ຮອດ 2025, ທົບທວນຄືນກ່ຽວກັບຮ່າງພາລະບົດບາດໃໝ່ຂອງກອງປະຊຸມລັດຖະມົນຕີດີຈີຕອນອາຊຽນ
ແລະ ກອງປະຊຸມເຈົ້າໜ້າທີ່ອາວຸໂສດີຈິີຕອນອາຊຽນຕາມລຳດັບ. ນອກນີ້ເຈົ້າໜ້າທີ່ອາວຸໂສ
ຍັງໄດ້ປຶກສາຫາລືກ່ຽວກັບການກະກຽມເນື້ອໃນສຳລັບກອງປະຊຸມ TELMIN 19 ເຊັ່ນ: ວາລະກອງປະຊຸມຂອງລັດຖະມົນຕີອາຊຽນ, ລັດຖະມົນຕີ
+ ປະເທດຄູ່ຮ່ວມເຈລະຈາ ແລະ ສະຫະພາບໂທລະຄົມມະນາຄົມສາກົນ, ລວມທັງຮ່າງຖະແຫລງການວຽງຈັນ
ແລະ ບົດຖະແຫລງຂ່າວຮ່ວມ.
ໃນໂອກາດນີ້, ຍັງໄດ້ທົບທວນຄືນການຮ່ວມມືໃນໄລຍະຜ່ານມາ ແລະ ແຜນການຮ່ວມມືໃນສົກປີ 2019 ກັບບັນດາປະເທດຄູ່ຮ່ວມເຈລະຈາ (ສປ ຈີນ, ຢີປຸ່ນ, ສ.ເກົາຫລີ, ອິນເດຍ, ອາເມລິກາ, ເອີຣົບ ແລະ ສະຫະພາບໂທລະຄົມມະນາຄົມສາກົນ) ເປັນຕົ້ນແມ່ນການລາຍງານຜົນການຈັດຕັ້ງປະຕິບັດກິດຈະກຳຮ່ວມມືອາຊຽນ-ປະເທດຄູ່ຮ່ວມໃນສົກປີ 2019 ແລະ ເອກະພາບຮັບເອົາຮ່າງແຜນກິດຈະກໍາຮ່ວມມືດ້ານ ໄອຊີທີ ປະຈຳປີ 2020 ລະຫວ່າງອາຊຽນ ກັບບັນດາປະເທດຄູ່ຮ່ວມເຈລະຈາເພື່ອສະເໜີໃຫ້ກອງປະຊຸມ TELMIN ຮັບຮອງເອົາ.
