ສປປ ເກົາຫລີ ຍິງລູກສອນໄຟສະກັດ ຕົກໃນນ່ານນ້ຳຍີ່ປຸ່ນ
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ປະເທດ ສ.ເກົາຫລີ ໃນວັນທີ 29 ພຶດສະພານີ້ວ່າ: ກະຊວງປ້ອງກັນປະເທດ ສ.ເກົາຫລີ ອອກຖະແຫລງການໃນວັນດັ່ງກ່າວວ່າ: ສປປ ເກົາຫລີ ຍິງວັດຖຸທີ່ອາດຈະເປັນລູກສອນໄຟໄລຍະໃກ້ແບບ “ສະກັດ” ອອກຈາກຖານທັບຢູ່ເມືອງວອນຊານ ແຄມຝັ່ງທາງຕາເວັນອອກຂອງປະເທດ ເມື່ອເວລາ 05:09 ໂມງ ຕາມເວລາທ້ອງຖິ່ນຂອງນະຄອນຫລວງພຽງຢາງ (04:39 ໂມງ ຕາມເວລາຢູ່ລາວ) ໂດຍລູກສອນໄຟເຄື່ອນທີ່ໄປທາງທິດຕາເວັນອອກເປັນໄລຍະທາງປະມານ 450 ກິໂລແມັດ ເປັນເວລາ 6 ນາທີ ກ່ອນຕົກລົງໃນນ່ານນ້ຳຂອງຍີ່ປຸ່ນ.
+ ສປປ ເກົາຫລີ ເຜີຍຍິງທົດລອງລູກສອນໄຟສຳເລັດ
+ ສະພາຄວາມໝັ້ນຄົງ ສປຊ ປະນາມ ສປປ ເກົາຫລີ ຍິງລູກສອນໄຟ
+ ເຈາະເລິກການທົດລອງລູກສອນໄຟລຸ້ນໃໝ່ຂອງ ສປປ ເກົາຫລີ
ຂະນະທີ່ທ່ານ ໂຍຊິຮິເດະ ຊິກະ ເລຂາທິການຄະນະລັດຖະບານຍີ່ປຸ່ນ ກ່າວປະນາມເຫດການທີ່ເກີດຂຶ້ນ ແລະ ເຈົ້າໜ້າທີ່ຂອງທາງການຍີ່ປຸ່ນພວມກວດສອບວ່າລູກສອນໄຟຂອງ ສປປ ເກົາຫລີ ໄດ້ສ້າງຄວາມເສຍຫາຍ ຫລື ບໍ່. ກອງທັບອາເມລິກາປະຈຳພາກພື້ນປາຊີຟິກຢືນຢັນວ່າ: ສປປ ເກົາຫລີ ຍິງລູກສອນໄຟແທ້ຕາມວັນ ແລະ ເວລາທີ່ລະບຸຢູ່ໃນລາຍງານຂອງ ສ.ເກົາຫລີ.
ການເຄື່ອນໄຫວທາງທະຫານເທື່ອຫລັງສຸດຂອງ ສປປ ເກົາຫລີ ເກີດຂຶ້ນພຽງວັນດຽວ, ພາຍຫລັງສຳນັກຂ່າວກາງເກົາຫລີ (KCNA) ລາຍງານວ່າລັດຖະບານພຽງຢາງໄດ້ຕິດຕັ້ງລະບົບລູກສອນໄຟຕໍ່ຕ້ານອາວຸດທົ່ວປະເທດແລ້ວ ແລະ ມີການຜະລິດເພີ່ມຂຶ້ນອີກເປັນຈຳນວນຫລາຍຕາມຄຳສັ່ງຂອງທ່ານ ກິມ ຈົງ ອິນ ຜູ້ນຳສູງສຸດຂອງປະເທດ.
