ຢາກມີວຽກເຮັດງານທຳຕ້ອງມີວິຊາຊີບທີ່ເກັ່ງ

ໂດຍ: ທິດກ່ຳ

ໃນເງື່ອນໄຂທີ່ປະເທດ ຊາດຂອງພວກເຮົາພວມເລັ່ງລັດພັດທະນາໃຫ້ມີຄວາມຈະເລີນຮຸ່ງເຮືອງບົນເສັ້ນທາງແຫ່ງຍຸກສະໄໝບໍ່ວ່າໃນປັດຈຸບັນກໍຄືອະນາຄົດຄວາມມຸ້ງຫວັງເມື່ອຮຽນຈົບໄປ ແລ້ວຈະໄດ້ເຮັດວຽກນຳລັດ, ເປັນລັດຖະກອນແມ່ນນັບມື້ມີ ເປີເຊັນໜ້ອຍລົງທີ່ສຸດ.

ອັນສາເຫດກໍຍ້ອນວ່າ ເພິ່ນຄັດຈ້ອນເອົາແຕ່ຜູ້ທີ່ເກັ່ງໆ ມີຄວາມຮູ້ຄວາມສາມາດ, ມີວິຊາສະເພາະທີ່ແນ່ນອນ; ຊ້ຳບໍ່ໜຳຕົວເລກເສັງ ເຂົ້າລັດຖະກອນໃນແຕ່ລະປີ ຊ້ຳພັດນັບມື້ໜ້ອຍລົງດ້ານປະລິມານໂດຍເລັ່ງໃສ່ຄຸນນະພາບເປັນຫລັກນອກຈາກນັ້ນ, ຖ້າຕ້ອງການເຂົ້າເຮັດວຽກນຳສຳນັກງານ, ອົງການ, ໂຄງການລົງທຶນຂອງລັດ ແລະ ເອກະຊົນເຂົາກໍຕ້ອງ ການຜູ້ມີຄວາມຮູ້, ຄວາມສາມາດທີ່ແນ່ນອນ ແລະ ອັນທີ່ ຕັດສິນອີກອັນ ໜຶ່ງກໍຕ້ອງຮູ້ພາສາຕ່າງປະເທດເປັນຢ່າງດີໂດຍສະເພາະແມ່ນ ພາສາອັງກິດທີ່ກາຍເປັນພາ ສາກາງຂອງໂລກ.

ນອກນັ້ນ, ຍັງຕ້ອງຮູ້ພາ ສາຂອງປະເທດທີ່ກ່ຽວຂ້ອງ ຖ້າຫາກຕ້ອງການເຂົ້າໄປເຮັດວຽກໃນໂຄງການລົງທຶນ ຂອງຄົນປະເທດນັ້ນໆ ຕົວຢ່າງຖ້າຕ້ອງການເຂົ້າໄປເຮັດວຽກນຳໂຄງການລົງທຶນ ຂອງຈີນກໍຕ້ອງຮູ້ພາສາຈີນ, ໂຄງການລົງທຶນຂອງ ເກົາ ຫລີ ກໍຕ້ອງຮູ້ພາສາເກົາຫລີ, ຫລື ຖ້າຫາກແມ່ນໂຄງການລົງທຶນຂອງຍີ່ປຸ່ນກໍຕ້ອງຮູ້ພາສາຍີ່ປຸ່ນ ແລະ ສຳລັບໂຄງການປະເທດອື່ນໆ ມາລົງທຶນ ໃນລາວກໍມີລັກສະນະເໝືອນກັນ. ນີ້ຄືຕົວຊີ້ວັດຂອງການ ເຊື່ອມໂຍງໃນຍຸກ 4.0  ທີ່ພວກ ເຮົາຕ້ອງມີຄວາມພ້ອມ.

ເພາະສະນັ້ນຈຶ່ງເວົ້າໄດ້ ວ່າ, ໃນເງື່ອນໄຂທີ່ປະເທດ ຊາດບ້ານເມືອງຂອງພວກເຮົາພວມມີການສ້າງສາພັດທະນາການສຶກສາຮ່ຳຮຽນ ຍິ່ງຖືເປັນຂໍກຸນແຈອັນສຳຄັນ ໃນການສ້າງຊັບພະຍາກອນມະນຸດ, ບົນພື້ນຖານດັ່ງກ່າວ ມັນກາຍເປັນປັດໄຈ ແລະ ເງື່ອນໄຂທັງເປັນທຶນຮອນອັນ ປະເສີດ ແລະ ເປັນທີ່ມາຂອງອາຊີບໃນອະນາຄົດ, ມີວຽກເຮັດງານທຳທີ່ແນ່ນອນໃຫ້ຄົນເຮົາໃນຍຸກໂລກາພິວັດ.

ຕະຫລອດໄລຍະ 40 ກວ່າປີຜ່ານມາພັກ ແລະ ລັດຖະບານເຮົາໄດ້ເອົາການສຶກສາໄປກ່ອນບາດກ້າວໜຶ່ງ, ໃນກອງປະຊຸມໃຫຍ່ຜູ້ແທນ ທົ່ວປະເທດຂອງພັກຄັ້ງທີ 9 ໄດ້ວາງ 4 ບຸກທະລຸເພື່ອເປັນ ເປົ້າໝາຍຍຸດທະສາດໃນ ການພັດທະນາປະເທດຊາດ, ເຊິ່ງ 1 ໃນ 4 ບຸກທະລຸທີ່ວ່າ ນີ້ກໍແມ່ນບຸກທະລຸທາງດ້ານການສ້າງຊັບພະຍາກອນມະນຸດເປັນ ວຽກບຸລິມະສິດໃນ ການຫລຸດພົ້ນອອກຈາກ ຄວາມທຸກຍາກ ແລະ ດ້ອຍພັດທະນາ.

ໃນຍຸກອຸດສາຫະກຳ 4.0 ຖືເປັນຍຸກແຫ່ງການແຂ່ງຂັນ, ການເຊື່ອມໂຍງ, ຍຸດທະສາດການຄ້າ, ວິທະຍາສາດ ແລະ ເຕັກໂນໂລຊີ; ຄວາມຮຽກຮ້ອງຕ້ອງການສິ່ງໃໝ່ໆ ມັນເກີດຂຶ້ນບົນພື້ນຖານ ສະພາບການຂອງໂລກມີ ການປ່ຽນແປງ ແລະ ຜັນແປ ໄປຢ່າງໄຮ້ພົມແດນດ້ວຍ ການແກ້ງແຍ້ງແຂ່ງຂັນກັນ ເພື່ອຄວາມຍືນຍົງຂອງແຕ່ ລະປະເທດ, ໃນຂົງເຂດ ແລະ ຂອງໂລກດ້ວຍສາເຫດນີ້, ການປະຕິຮູບການສຶກສາກໍ ຄືການສຶກສາຮ່ຳຮຽນຂອງ ຄົນລາວເຮົາໂດຍສະເພາະ ຈຶ່ງຕ້ອງໄດ້ພັດທະນາໄປໃຫ້ ທັນຍຸກ ທັນສະໄໝຕາມກົດ ເກນການຂະຫຍາຍຕົວຂອງ ສັງຄົມຢ່າງບໍ່ຢຸດຢັ້ງ.

ເນື່ອງໃນໂອກາດ ວັນຄູ ທີ່ຜ່ານມາ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ມີຄຳເຫັນຕໍ່ຄູ-ອາຈານບາງ ຕອນວ່າ: ປະເທດໃດ, ນ້ອຍ ຫລື ໃຫຍ່ທີ່ປົກຄອງດ້ວຍລະບົບໃດກໍຕາມ, ຈະພັດທະນາປະເທດຊາດໄປໄດ້ນັ້ນ, ຕ້ອງເປັນປະເທດທີ່ມີກຳລັງຄົນ, ມີຊັບພະຍາກອນມະນຸດ ເປັນຫລັກ, ປະເທດທີ່ໄດ້ຮັບ ການພັດທະນາດີ, ມີຄຸນນະພາບ, ເປັນກຳລັງແຮງໃນການຂັບເຄື່ອນປະເທດນັ້ນໄດ້ດີຂຶ້ນ, ໜັກແໜ້ນ, ກ້າວໜ້າ, ມີສະເຖຍລະພາບ, ມີຄວາມສາມາດແຂ່ງຂັນກັບປະເທດອື່ນ.

ກ່ອນອື່ນໝົດລະບົບການສຶກສາຕ້ອງໄດ້ຮັບການປະຕິ ຮູບ, ປ່ຽນແປງໃຫ້ທັນກັບຍຸກ ສະໄໝ, ຄວາມຕ້ອງການທີ່ ແທ້ຈິງ ແລະ ຄູ-ອາຈານທີ່ມີ ໜ້າທີ່ສິດສອນຕ້ອງມີຄວາມຮູ້, ຄວາມສາມາດເປັນຄົນ ໄຝ່ສຶກສາຄົ້ນຄວ້າເອົາສິ່ງ ໃໝ່ໆ ມາສິດສອນແກ່ນັກ ຮຽນນັກສາເຂົາຈຶ່ງມີຄວາມ ຮູ້ມີວິຊີວິດທີ່ເກັ່ງເພື່ອກຽມ ພ້ອມຮັບໃຊ້ຊາດ ແລະ ຮັບໃຊ້ສັງຄົມ./.