ນາຍທະຫານລາວ 500 ຄົນ ໄດ້ຮັບການຍົກລະດັບພາສາອັງກິດ
ແຫລ່ງຂ່າວ ຂປລ. ລາຍງານວ່າໃນປີ 2019, ມີນາຍທະຫານ ຈາກກອງທັບປະຊາຊົນລາວ ຈຳນວນ 21 ຄົນໄດ້ເຂົ້າຮ່ວມສໍາມະນາຫລັກສູດຢູ່ຕ່າງປະເທດ ທາງດ້ານການສອນພາສາອັງກິດ ແລະ ການພັດທະນາຄູ-ອາຈານ, ຫລັກສູດທີ່ປຶກສາດ້ານບົດບາດຍິງ-ຊາຍ ແລະ ເຂົ້າຮ່ວມກອງປະຊຸມກົດໝາຍດ້ານການທະຫານ ຢູ່ປະ ເທດອົດສະຕຣາລີ. ນັບແຕ່ປີ 1998 ຮອດປັດຈຸບັນ, ມີນາຍທະຫານຈາກກອງທັບປະຊາຊົນລາວ ຫລາຍກວ່າ 500 ຄົນ ທີ່ໄດ້ຮັບທຶນຝຶກອົບຮົມໃນຫລັກສູດພາສາອັງກິດ ທີ່ສູນຝຶກອົບຮົມປ້ອງກັນຊາດສາກົນ(DITC) ເມືອງເມວເບິນ ໂດຍການສະໜັບສະໜູນຈາກລັດຖະບານ ອົດສະຕຣາລີ. ທ່ານ ພັນເອກ ນາງ ແນໂຣລີ່ ແມັກໂດໂນ ທູດທີ່ປຶກສາດ້ານການທະຫານ ອົດສະຕຣາລີ ປະຈຳລາວ ໄດ້ກ່າວໃນງານລ້ຽງພົບປະສິດເກົ່ານາຍທະຫານລາວ ແລະ ອົດສະຕຣາລີ ໃນວັນທີ 17 ຕຸລານີ້ທີ່ໂຮງແຮມ ຄຣາວພາຊາ ນະຄອນຫລວງວຽງຈັນ.
ທ່ານ ນາງ ແນໂຣລີ່ ກ່າວວ່າ: ພື້ນຖານຂອງສາຍພົວພັນກອງທັບສອງປະເທດ ແມ່ນໂຄງການການຮ່ວມມືດ້ານວຽກງານປ້ອງກັນຊາດ, ໂດຍສະເພາະແມ່ນການຝຶກອົບຮົມດ້ານພາສາອັງກິດ ເພື່ອຍົກລະດັບຄວາມສາມາດ ໃຫ້ແກ່ບັນດານາຍທະຫານ ມີຄວາມສາມາດພົວພັນກັບບັນດາຄູ່ຮ່ວມມືສາກົນຢ່າງມີປະສິດທິຜົນ, ທັງສືບຕໍ່ຮັບໃຊ້ຜົນປະໂຫຍດຂອງທັງສອງປະເທດໄດ້ດີ. ໂຄງການນີ້ ໄດ້ມີການຂະຫຍາຍຕົວ ຢ່າງກວ້າງຂວາງໃນສອງທົດສະວັດທີ່ຜ່ານມາ, ໂດຍສປປ ລາວ ແມ່ນໜຶ່ງໃນສອງປະເທດໃນພາກພື້ນທີ່ໄດ້ ຈັດທີມຝຶກອົບຮົມຄູ-ອາຈານ ມາຈາກ DITC ເອີ້ນວ່າ ‘ການຝຶກອົບຮົມຄູຝຶກ’ ໄດ້ໃຫ້ການສິດສອນ ແລະ ໃຫ້ຄຳແນະນຳ ທີ່ມີຄຸນຄ່າແກ່ຄູ-ອາຈານ ສອນພາສາອັງກິດ ຈາກກອງທັບປະຊາຊົນລາວ ແລະ ຍັງເປີດໂອກາດໃຫ້ຄູຝຶກອົດສະຕຣາລີ ມີໂອກາດພັດທະນາມິດຕະພາບໃໝ່ໆ ກັບເພື່ອນຮ່ວມງານລາວນຳອີກ.
ທ່ານ ກ່າວຕື່ມວ່າ: ນາຍທະຫານຈາກກອງທັບປະຊາຊົນລາວ ຈຳນວນ 21 ຄົນໄດ້ເຂົ້າຮ່ວມສໍາມະນາຫລັກສູດຢູ່ນີ້, ຍັງຊ່ວຍໃຫ້ພວກເຂົາມີປະສົບການຮຽນຮູ້ ກ່ຽວກັບວັດທະນະທຳ ຂອງອົດສະຕຣາລີ ແລະ ສ້າງເຄືອຂ່າຍກັບເພື່ອນຮ່ວມງານຈາກທົ່ວພາກພື້ນ. ຫລັກສູດພາສານີ້ແມ່ນບາດກ້າວທີ່ສຳຄັນໃນເສັ້ນທາງຂອງນັກສຶກສາທີ່ໄດ້ຮັບທຶນ ເຊິ່ງພວກເຮົາຫວັງວ່າຈະປະກອບສ່ວນສຳຄັນໃນການພັດທະນາປະເທດ. ແຜນງານການຮ່ວມມືດ້ານປ້ອງກັນຊາດ ຈະສ້າງຄວາມສາມາດ, ສ້າງມິດຕະ ພາບ ແລະ ການແລກປ່ຽນກັນໃນອະນາຄົດ; ສ້າງສາຍພົວພັນ ແລະ ຄວາມເຄົາລົບ ເຊິ່ງກັນ ແລະ ກັນ ໃນຖານະສິດເກົ່າປ້ອງກັນປະເທດ ເຊິ່ງແຕ່ລະຄົນມີໂອກາດທີ່ຈະຊ່ວຍສ້າງຄວາມເຂັ້ມແຂງ ໃຫ້ກອງທັບປະຊາຊົນລາວ ເຂັ້ມແຂງຂຶ້ນກວ່າເກົ່າ.
