ມີນັກກິລາຫລາຍກວ່າ 1.000 ຄົນ ເຂົ້າຮ່ວມ ຫຼວງພະບາງຮາບ ມາລາທອນ 2019
ຕອນເຊົ້າວັນທີ່ 20 ຕຸລານີ້ ບໍລິເວນໜ້າໂຮງໝໍເພື່ອນລາວສຳລັບເດັກແຂວງຫຼວງພະບາງ ໄດ້ຈັດງານແລ່ນ ຫຼວງພະບາງຮາບມາລາທອນຄັ້ງທີ່ 7 ປີ 2019 ໂດຍມີນັກແລ່ນຈາກພາຍໃນ ແລະ ຕ່າງປະເທດ ເຂົ້າຮ່ວມຫຼາຍກ່ວາ 1.000 ກວ່າຄົນ. ເພື່ອປຸກລະດົມທຸກຄົນໃນສັງຄົມ ນັບທັງແຂກພາຍໃນ ແລະ ຕ່າງປະເທດ ມີສ່ວນຮ່ວມສົມທົບທືນ ໃນການຈັດຊື້ອຸປະກອນການແພດ ແລະ ພັດທະນາໂຮງໝໍເພື່ອນລາວສຳລັບເດັກ ໃນແຂວງຫຼວງພະບາງ ແລະ ສົມທົບທືນຊ່ວຍຜູ້ປະສົບໄພນ້ຳຖ້ວມ ໃນລະດູຝົນປີນີ້ ໂດຍສະເພາະແມ່ນບັນດາແຂວງພາກໃຕ້ຂອງລາວ, ເຊິ່ງລາຍໄດ້ທັງໝົດ ຈາກຜູ້ເຂົ້າຮ່ວມແຂ່ງຂັນທັງໝົດແມ່ນຈະມອບເຂົ້າໃນກອງທຶນພັດທະນາ ຂອງໂຮງໝໍເພື່ອນລາວສຳລັບເດັກ ໂອກາດນີ້ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ໄດ້ສະແດງຄວາມຂອບໃຈ ແລະຮູ້ບຸນຄຸນຕໍ່ທຸກພາກສ່ວນ ທີ່ໄດ້ໃຫ້ການສະໜັບສະໜູນ ແລະຊ່ວຍເຫຼືອ ໃນການຈັດງານຄັ້ງນີ້.
ສຳລັບການແລ່ນຫຼວງພະບາງຮາບມາລາທອນປີນີ້ ຜູ້ເຂົ້າຮ່ວມໄດ້ແລ່ນອ້ອມຮອບເທສະບານແຂວງຫຼວງພະບາງປະກອບມີ 3 ຮຸ່ນຄື: 7 ກິໂລແມັດ, 14 ກິໂລແມັດ ແລະ 21 ກິໂລແມັດ. ໂດຍເລີ້ມຈາກໜ້າຫໍພິພິທະພັນແຫ່ງຊາດ ຫຼວງພະບາງ ອ້ອມຮອບເທດສະບານ ນະຄອນ ຫຼວງພະບາງ ແລ້ວເຂົ້າເສັ້ນໄຊຢູ່ຈຸດເລີ້ມຕົ້ນຄືເກົ່າ. ສຳລັບຜູ້ຊະນະໄດ້ຮັບເຄື່ອງທີ່ລະນຶກພິເສດສຳລັບປີນີ້ ໄດ້ຈັດກິດຈະກຳແລ່ນກ່ອນໜ້ານີ້ ນັບແຕ່ວັນທີ່ 15 ຫາ 18 ຕຸລາ ໂດຍນັກແລ່ນກຸ່ມໜຶ່ງ ມີຄວາມມຸ່ງໝັ້ນໃນການແລ່ນ ແລະເຕັມໃຈທີ່ຈະຮັບພາລະກິດ ແລ່ນແຕ່ນະຄອນຫຼວງວຽງຈັນ ຫາ ຫຼວງພະບາງ ໄລຍະທາງ 385 ກິໂລແມັດ ເພື່ອລະດົມທືນຊ່ວຍໂຮງໝໍເພື່ອນລາວສຳລັບເດັກ ໃນແຂວງຫຼວງພະບາງ ແລະຊ່ວຍຜູ້ປະສົບໄພນ້ຳຖ້ວມ ຢູ່ແຂວງພາກໃຕ້ຂອງລາວ ແລະຈະສືບຕໍ່ລະດົມທືນໄປຈົນຮອດ ວັນທີ 30 ຕຸລານີ້.
