ກະຊວງສຶກສາທິການ ແລະ ກິລາ ຈະສຸມໃສ່ແກ້ໄຂບັນຫາຄູເຫລືອບໍ່ພໍ

ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ມີຄຳເຫັນໃນໂອກາດສະເຫລີມສະຫລອງວັນຄູແຫ່ງຊາດ 7 ຕຸລາຜ່ານມາວ່າ:  ຕະຫລອດໄລຍະຜ່ານມາ, ເຖິງແມ່ນວ່າຂະແໜງການສຶກສາໄດ້ມີຜົນງານຫລາຍດ້ານ, ແຕ່ກໍຍັງປາສະຈາກບໍ່ໄດ້ບັນຫາສິ່ງທ້າທາຍທີ່ຈະຕ້ອງໄດ້ຮີບຮ້ອນແກ້ໄຂຄື: ການສະໜອງຄູໃຫ້ແກ່ເຂດຫ່າງໄກສອກຫລືກຍັງບໍ່ທັນໄດ້ດີ, ການກໍ່ສ້າງຄູຍັງບໍ່ທັນເນັ້ນໃສ່ວິຊາທີ່ຍັງຂາດຄູ ຍັງອີງຕາມຄວາມສະໝັກໃຈ ຫລື ຄວາມຕ້ອງການຂອງຜູ້ຢາກຮຽນເປັນສ່ວນໃຫຍ່, ເຖິງວ່າໄດ້ມີການຝຶກອົບຮົມກ່ຽວກັບການນໍາໃຊ້ຫລັກສູດ, ປຶ້ມຕຳລາຮຽນ ແລະ ຄູ່ມືໃຫ້ແກ່ຄູເປັນຈຳນວນຫລວງຫລາຍກໍຕາມ, ແຕ່ວິທີການສອນຂອງຄູກໍຍັງບໍ່ທັນປ່ຽນແປງເທົ່າທີ່ຄວນ, ຜົນການຮຽນຂອງນັກຮຽນຊັ້ນປະຖົມສຶກສາຜ່ານການປະເມີນຜົນວິຊາພາສາລາວ ແລະ ວິຊາຄະນິດສາດກໍຍັງບໍ່ທັນເປັນທີ່ໜ້າເພິ່ງພໍໃຈ, ຄວາມຮັບຜິດຊອບຕໍ່ໜ້າທີ່ຂອງຄູແລະ ຜູ້ບໍລິຫານໂຮງຮຽນຈຳນວນໜຶ່ງກໍຍັງບໍ່ທັນສູງ.

    ສະນັ້ນ, ເພື່ອແກ້ໄຂຂໍ້ຄົງຄ້າງດັ່ງກ່າວໃນຊຸມປີຕໍ່ໜ້າກະຊວງສຶກສາທິການ ແລະ ກິລາ ຈະເອົາໃຈໃສ່ປັບປຸງສັບຊ້ອນ ແລະ ຈັດສັນຄູຄືນໃໝ່ ໂດຍເລັ່ງໃສ່ເຂດຫ່າງໄກສອກຫລີກບ່ອນທີ່ຂາດເຂີນຄູ, ການກໍ່ສ້າງຄູຈະເນັ້ນໃນວິຊາທີ່ຂາດຄູ ແລະ ມີການສົ່ງເສີມໃຫ້ນັກຮຽນເຂົ້າຮຽນຄູໃນວິຊາທີ່ຕ້ອງການ, ປັບປຸງບາງມາດຕາຂອງດຳລັດວ່າດ້ວຍລັດຖະກອນຄູ ສະບັບເລກທີ 177 ຄືນໃໝ່ ເປັນຕົ້ນແມ່ນການກຳນົດຊົ່ວໂມງສອນຂອງຄູ, ການປະເມີນຜົນງານຂອງຄູ ແລະ ຜູ້ບໍລິຫານໂຮງຮຽນ ກໍຄືນະໂຍບາຍດ້ານຕ່າງໆໃຫ້ມີຄວາມສອດຄ່ອງກວ່າເກົ່າ ແລະ ປັບປຸງນິຕິກຳອື່ນໆທີ່ກ່ຽວຂ້ອງກັບຄູເປັນຕົ້ນແມ່ນຄູອາສາສະໝັກ ແລະ ຄູສັນຍາຈ້າງທີ່ມີຢູ່ແລ້ວ, ຂະນະດຽວກັນກໍຮຽກຮ້ອງໃຫ້ຄູ-ອາຈານ ສືບເສີມຂະຫຍາຍຄວາມຮັບຜິດຊອບຂອງຕົນໃນການອົບຮົມສັ່ງສອນ ແລະ ສິດສອນນັກຮຽນໃຫ້ມີຄວາມຮູ້, ຄວາມສາມາດ,​ມີຄຸນສົມບັດສິນທຳປະຕິວັດ, ປະຕິບັດຈັນຍາບັນຂອງຄູໃຫ້ເລິກເຊິ່ງໃຫ້ສົມກັບວ່າຄູເປັນແມ່ພິມແຫ່ງຊາດ, ຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາ ເພີ່ມທະວີຄວາມຮັບຜິດຊອບເອົາໃຈໃສ່ຊີ້ນຳນຳພາວຽກງານການສຶກສາໃຫ້ແທດເຖິງກວ່າເກົ່າ, ສູ້ຊົນປະຕິບັດຍຸດທະສາດການສຶກສາ ເພື່ອການພັດທະນາແບບຍືນຍົງໃຫ້ບັນລຸຜົນຕາມຄາດໝາຍທີ່ວາງໄວ້.