ທຣຳ ກ່າວຫາ ໂອບາມາ ແຊກແຊງການເລືອກຕັ້ງປະທານາທິບໍດີ

ຮຽບຮຽງໂດຍ: ລູກເມືອງພວນ

ທຣຳ ກ່າວວ່າ: ໂອບາມາ ອາດມີສ່ວນກ່ຽວຂ້ອງ ກັບການກ່າວຫາລັດເຊຍ ແຊກແຊງການເລືອກຕັ້ງປະທານາທິບໍດີສະຫະລັດ ປີ 2016.

ໃນຂະນະທີ່ ຖະແຫຼງຂ່າວກັບຄູ່ຮ່ວມຕຳແໜ່ງຂອງ ອີຕາລີ Sergio Mattarella ຢູ່ທີ່ທຳນຽບຂາວໃນວັນທີ 16 ຕຸລານີ້, ປະທານາທິບໍດີສະຫະລັດ ດໍໂນທຣຳ ໃຫ້ຮູ້ວ່າ: ກະຊວງຍຸຕິທຳຂອງສະຫະລັດ ກຳລັງສືບສວນຫາສາເຫດທີ່ອົງການສືບສວນລັບສະຫະພັນອາເມລິກາ (FBI) ຕັດສິນໃຈຕິດຕາມເຈົ້າໜ້າທີ່ຈຳນວນໜຶ່ງທີ່ກ່ຽວຂ້ອງກັບຂະບວນການເລືອກຕັ້ງໃນປີ 2016 ຂອງເຂົາ ໂດຍສົງໃສວ່າ ສົມຮູ້ຮ່ວມຄິດກັບລັດເຊຍ.

ທຣຳ ກ່າວເຖິງ ອະດີດຫົວໜ້າ, ຮອງຫົວໜ້າ ແລະ ເຈົ້າໜ້າທີ່ສອງຄົນຂອງ FBI ວ່າ: “ ການເລືອກຕັ້ງດັ່ງກ່າວເປັນການເລືອກຕັ້ງທີ່ໜ້າລັງກຽດ, ເພາະຜູ້ສ້າງເລື່ອງຂຶ້ນແມ່ນ James Comey, Andrew McCabe, Peter Strzok ນັບທັງຄົນຮັກເກົ່າຂອງເຂົາເຊັ່ນ Lisa Page ອີກດ້ວຍ ”

ທຣຳ ກ່າວຫາຄົນ “ຮຸ່ນກ່ອນ” ວ່າ: “ ມີຫຼາຍອັນທີ່ຜິດພາດ ແລະ ຂ້ອຍຄິດວ່າ ທັງໝົດນັ້ນລ້ວນແຕ່ອອກມາຈາກ ອະດີດປະທານາທິບໍດີ ໂອບາມາ ທັງນັ້ນ ” , “ ຂ້ອຍຄິດວ່າທຸກຄົນຈະເຫັນບັນຫາ ແລະ ບໍ່ເຊື່ອວ່າຈະມີຄວາມຜິດພາດເຖິງຂະໜາດນັ້ນ. ຈົ່ງຕິດຕາມເບິ່ງວ່າມັນແມ່ນຄວາມຜິດພາດຂອງ ໂອບາມາ ຫຼື ບໍ່”

ໃນຂະນະທີ່ນັກຂ່າວຖາມເຖິງ ສະມາຊິກສະພາສູງຄົນໜຶ່ງ Lindsey Graham ຊຶ່ງເປັນຜູ້ໃກ້ສິດກັບ ທຣຳ, ເຂົາປະກາດວ່າ: ປະທານາທິບໍດີສະຫະລັດກຳລັງສ້າງເລື່ອງ “ຜິດພາດຢ່າງໃຫ່ຍ”ໃນເມື່ອຕັດສິນໃຈຖອນກຳລັງທະຫານອອກຈາກ ຊີຣີ, ທຣຳ ຕອບໂຕ້ວ່າ: Graham ຄວນໃຊ້ເວລາໄປກວດສອບ ໂອບາມາ ຈະດີກ່ວາ ເພາະເຂົາເປັນຫ່ວາງນຳ ຕາເວັນອອກກາງ.

Robert Mueller ອະດີດຫົວໜ້າອົງການ FBI ຖືກແຕ່ງຕັ້ງໃຫ້ເປັນໂຈດຮ້ອງຟ້ອງພິເສດ ເພື່ອສືບສວນການກ່ຽວຂ້ອງກັບລັດເຊຍໃນການເລືອກຕັ້ງໃນປີ 2016. ທຣຳ ອອກມາປະຕິເສດຢ່າງແຂງແຮງວ່າບໍ່ໄດ້ມີສ່ວນກ່ຽວຂ້ອງລະຫ່ວາງເຂົາກັບລັດເຊຍ, ທຣຳ ກ່າວວ່າ: “ມັນເປັນການໄລ່ລ່າ” ຕົນເອງເທົ່ານັ້ນ.

ໃນບົດລາຍງານການສືບສວນໃນເດືອນ ເມສານັ້ນ, Mueller ສະຫຼຸບວ່າ: ບໍ່ມີຂໍ້ມູນພຽງພໍທີ່ຈະຕູ່ຫາວ່າ ທຣຳ ກ່ຽວຂ້ອງກັບລັດເຊຍ ແລະ ບໍ່ສາມາດຈະຮ້ອງຟ້ອງທາງກົດໝາຍໄດ້.