ລາວເອົາໃຈໃສ່ສະກັດກັ້ນຢາເສບຕິດຢ່າງແຂງແຮງ
ທ່ານພົນຕີ ສົມຫວັງ ທໍາມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ຜູ້ປະຈໍາການຄະນະກໍາມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ໄດ້ໃຫ້ຮູ້ວ່າ:ໄລຍະຜ່ານມາ, ພັກ ແລະ ລັດຖະບານ ກໍຄືກໍາລັງປ້ອງກັນຄວາມສະຫງົບ ລວມທັງພາກສ່ວນຕ່າງໆທີ່ເຮັດໜ້າທີ່ສະກັດກັ້ນ ແລະ ຕ້ານຢາເສບຕິດ ໄດ້ເອົາໃຈໃສ່ປະຕິບັດມາດຕະການດ້ານກົດໝາຍຕໍ່ຜູ້ກະທໍາຜິດໃນການຄ້າ-ຂາຍຢາເສບຕິດ ແລະ ນັບແຕ່ເດືອນມັງກອນຫາກັນຍາປີ 2019 ນີ້, ເຈົ້າໜ້າທີ່ໃນຂອບເຂດທົ່ວປະເທດສາມາດມ້າງຄະດີຢາເສບຕິດໄດ້ 2.899 ເລື່ອງ, ມີຜູ້ຖືກຫາ 4.220 ຄົນ (ຍິງ 495 ຄົນ), ຕ່າງປະເທດ 76 ຄົນ, ສາມາດຢຶດຢາດສບຕິດປະເພດຕ່າງໆຄື: ຢາບ້າ 15 ລ້ານກວ່າເມັດ, ເຮໂຣອິນ 139 ກິໂລ, ຢາໄອສ໌ 3.869 ກິໂລ, ຝິ່ນ 36 ກິໂລ, ກັນຊາ 1.677 ກິໂລ, ແປ້ງປະສົມຜະລິດຢາເສບຕິດຫລາຍກວ່າ 10 ພັນກິໂລ. ໃນຂະນະດຽວກັນ, ສານປະຊາຊົນທົ່ວປະເທດໄດ້ຕັດສິນຄະດີຢາເສບຕິດຢ່າງເດັດຂາດແລ້ວມີ 2.069 ເລື່ອງ, ມີນັກໂທດ 2.842 ຄົນ. ນອກນີ້, ຍັງພົບເຫັນເນື້ອທີ່ລັກລອບ
ປູກຝິ່ນໃນປີ 2018 ຫລາຍກວ່າ 4.920 ເຮັກຕາ, ໃນນີ້ ໄດ້ທໍາລາຍຖິ້ມແລ້ວ 486 ກວ່າເຮັກຕາ ແລະ ມາຮອດປັດຈຸບັນ, ທົ່ວປະເທດມີສູນບໍາບັດປິ່ນປົວຜູ້ຕິດຢາເສບຕິດ 17 ແຫ່ງ, ໃນນີ້ເປີດບໍລິການແລ້ວ 14 ແຫ່ງ, ມີຜູ້ມາບໍາບັດປິ່ນປົວຫລາຍກວ່າ 2.380 ກວ່າຄົນ. ໄປຄຽງຄູ່ກັນນັ້ນ, ກໍໄດ້ເອົາໃຈໃສ່ປະຕິ
ບັດວຽກງານສືກສາອົບຮົມໃຫ້ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈກ່ຽວກັບພິດໄພ ແລະ ຜົນຮ້າຍຂອງຢາເສບຕິດດ້ວຍຫລາຍຮູບການ, ພ້ອມທັງສ້າງເງື່ອນໄຂໃຫ້ປະຊາຊົນທີ່ຢູ່ເຂດພູດອຍຫ່າງໄຫສອກຫລີກທາງພາກເໜືອຢຸດຕິການປູກຝິ່ນແລ້ວຫັນໄປປູກພືດຊະນິດອື່ນທົດແທນ ຫລື ປະກອບອາຊີບອື່ນໆທີ່ໝັ້ນຄົງແທນການປູກຝິ່ນ. ນອກນີ້ໄດ້ປະກາດໂຮງຮຽນປອດຢາເສບຕິດແລ້ວ 1.276 ແຫ່ງ, ບ້ານປອດຢາເສບຕິດມີ 5.781 ບ້ານ ກວມເອົາ 58% ຂອງບ້ານທົ່ວປະເທດ.
ທ່ານຮອງລັດຖະມົນຕີກ່າວວ່າ: ເພື່ອເຮັດໃຫ້ຢາເສບຕິດໝົດໄປຈາກສັງຄົມລາວເຮົາ, ໃນຕໍ່ໜ້ານີ້, ທຸກພາກສ່ວນສັງຄົມຕ້ອງເພີ່ມທະວີຄວາມເປັນເຈົ້າການໂຄສະນາ-ສຶກສາອົບຮົມບັນດາລູກຫລານ, ນັກຮຽນ-ນັກສຶກສາ, ຊາວຄ້າຂາຍ, ພະນັກງານ, ກໍາມະກອນ ເພື່ອໃຫ້ເຂົາເຈົ້າເຫັນໄດ້ເຖິງພິດໄພ, ຄວາມອັນຕະ
ລາຍ ແລະ ຜົນຮ້າຍຂອງຢາເສບຕິດ, ກໍາລັງເຈົ້າໜ້າທີ່ທຸກຂັ້ນຕ້ອງເພີ່ມທະວີສະກັດກັ້ນ ແລະ ປາບປາມຜູ້ຄ້າຂາຍຢາເສບຕິດຢ່າງເດັດຂາດ.
