ຂ່າວເສົ້າ ! Patrick Day ນັກມວຍຊາວອາເມລິກາ ເສຍຊີວິດເພາະສະໝອງຖືກກະທົບໜັກຫລັງການຊົກ
ໃນວັນທີ 16 ຕຸລານີ້ ວົງການມວຍໂລກພົບກັບຄວາມໂສກເສົ້າເປັນຄັ້ງທີ 4 ໃນປີນີ້ ເມື່ອນັກມວຍເສຍຊີວິດຍ້ອນການປະທະກັນຫລັງການຊົກ ລາຍຫລ້າສຸດແມ່ນ ແພັດທຣິກ ເດ (Patrick Day) ນັກມວຍຊາວອາເມລິກາ ໄວ 27 ປີ ເສຍຊີວິດຍ້ອນສະໝອງຖືກກະທົບໜັກລະຫວ່າງການຊົກກັບ ຊາວສ໌ ຄອນເວວ (Charles Conwell) ນັກມວຍດາວຮຸ່ງເພື່ອນຮ່ວມຊາດ ໄວ 21 ປີ ຊີງແຊ້ມລະດັບປະເທດ USBA Super Welterweighe Title ທີ່ຊິຄາໂກ້ ສະຫະລັດອາເມລິກາ ໃນວັນທີ 12 ຕຸລານີ້ ເຊິ່ງ ແພັດທຣິກ ເດ ຖືກນັອກໃນຍົກທີ 10 ຍ້ອນທົນກັບໝັດໜັກຂອງ ຊາວສ໌ ຄອນເວວ ບໍ່ໄຫວ ຈອບຊິໄປຫລາຍຮອບແຕ່ກັດແຂ້ວຢືນທົນສູ້ດ້ວຍນ້ຳໃຈນັກກິລາ ເຊິ່ງການອົດທົນຂອງ ແພັດ ທຣິກ ເດ ຍິ່ງເຮັດໃຫ້ຕົນເອງສ່ຽງເຈັບໜັກຫລາຍຂຶ້ນ ຈົນເຮັດໃຫ້ແພດຕ້ອງສົ່ງຕົວໄປໂຮງໝໍດ່ວນ ສຸດທ້າຍເສຍຊີວິດຫລັງຢູ່ໂຮງໝໍໄດ້ 4 ວັນ.
ແພັດທຣິກ ເດ ກາຍເປັນນັກມວຍຄົນທີ 4 ທີ່ເສຍຊີວິດຍ້ອນການປະທະຫລັງການຊົກ ຕໍ່ຈາກ Boris Stanchov ຊາວບຸນກາລີ ໃນວັນ ທີ 21 ກັນຍາ 2019, Hugo Alfredo “Dinamita” Santillan ຊາວອາກຊັງຕິນ ໃນວັນທີ 25 ກໍລະກົດ 2019 ແລະ Maxim Dadashev ຊາວຣັດເຊຍ ໃນວັນທີ 19 ກໍລະກົດ 2019. ປັດຈຸບັນມີນັກມວຍ 500 ກວ່າຄົນເສຍຊີວິດຍ້ອນການປະທະຫລັງການຊົກ ນັບມາແຕ່ປີ 1926, ໃນນີ້ ປີ 1953 ເສຍຊີວິດຫລາຍສຸດ 22 ຄົນ.
ສຳລັບ ແພັດທຣິກ ເດ ເລີ່ມຕົ້ນສູ່ການເປັນນັກມວຍໃນປີ 2012 ມີສະຖິຕິການຊົກດີ ຊະນະ 75 ເສຍ 5 ໄດ້ ແຊ້ມມວຍສະໝັກຫລິ້ນຂອງສະຫະລັດອາເມລິກາຫລາຍສະໄໝ, ສ່ວນສະຖິຕິການຊົກລະດັບອາຊີບ ເຄີຍໄດ້ແຊ້ມ WBC Continental Americas title ແລະ IBF Intercontinental title ລຸ້ນນ້ຳໜັກ 154 ປອນ ລວມສະຖິຕິການຊົກອາຊີບທັງໝົດ 22 ຄັ້ງ, ຊະນະ 17 ສະເໝີ 1 ເສຍ 4. ດ້ານຄູ່ຊົກຂອງ ແພັດທຣິກ ເດ ຄົນສຸດທ້າຍກໍຄື ຊາວສ໌ ຄອນເວວ ຊົກ 11 ຄັ້ງ ຊະນະລວດ ໃນນີ້ນັອກເຖິງ 8 ຄັ້ງ. h��’
