ລູກາກູ ຍັງບໍ່ພ້ອມຕໍ່ສັນຍາກັບ ເອຟເວີຕັນ

ໂຣເມລູ ລູກາກູ ດາວຍິງຄົນ ສຳຄັນຂອງ ເອຟເວີຕັນ ຕົກເປັນ ຂ່າວວ່າລາວຍັງບໍ່ພ້ອມທີ່ຈະຕໍ່ສັນຍາສະບັບໃໝ່ກັບຕົ້ນສັງກັດອອກໄປ ເຖິງວ່າມີລາຍງານກ່ອນໜ້າ ນີ້ວ່າໃກ້ທີ່ຈະເຊັນແລ້ວກໍຕາມ.

ກອງໜ້າທີມຊາດ ເບລ ຢຽມ ອາຍຸ 23 ປີ ຕົກເປັນຂ່າວ ວ່າຈະຂະຫຍາຍສັນຍາກັບຕົ້ນ ສັງກັດເພີ່ມອີກ 5 ປີ ມາຫລາຍ ອາທິດແລ້ວ ຂະນະທີ່ ມິໂນ່ ໄຣ ໂອລາ ຜູ້ຈັດການສ່ວນໂຕຂອງ ນັກເຕະກໍອ້າງວ່າ ເລື່ອງການຂະ ຫຍາຍສັນຍາຂອງ ລູກາກູ ກັບ ເອຟເວີຕັນ ສຳເລັດໄປແລ້ວເຖິງ 99%.

ແນວໃດກໍຕາມ ຫລັງຈົບ ເກມທີ່ ເອຟເວີຕັນ ຖະຫລົ່ມ ເວສ ບຣອມວິດ ອັລບຽນ 3-0 ໃນວັນ ເສົາທີ 11 ມີນາຜ່ານມານັ້ນ ລູກາກູ ຖືກຜູ້ສື່ຂ່າວສຳພາດເຖິງ ເລື່ອງຄວາມເປັນໄປໄດ້ທີ່ຈະຂະຫຍາຍສັນຍາກັບຕົ້ນສັງກັດ ແຕ່ ເມື່ອຖືກຖາມວ່າພ້ອມຕໍ່ສັນຍາ ຫລື ບໍ່ ນັກເຕະກັບຕອບວ່າບໍ່.

ທັງນີ້ ລູກາກູ ກຳລັງນຳ ເປັນດາວຍິງສູງສຸດຂອງພຣີເມຍລີກລະດູການນີ້ທີ່ຈຳນວນ 19 ປະຕູ ແລະ ກາຍເປັນນັກເຕະຄົນ ທຳອິດຂອງ ເອຟເວີຕັນ ໃນຮອບ ກວ່າ 30 ປີ ທີ່ຍິງປະຕູໄດ້ຫລາຍ ຂະໜາດນີ້ໃນລີກ.