ສອງພາກສ່ວນສືບຕໍ່ຊ່ວຍເຫຼືອແກ້ໄຂໄພນໍ້າຖ້ວມ
ເຊົ້າວັນທີ 15 ຕຸລານີ້,
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ວ່າການລັດຖະມົນຕີກະຊວງແຜນການ ແລະ ການລົງທຶນ
ໄດ້ຕາງໜ້າໃຫ້ລັດຖະບານຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມຈາກບໍລິສັດ ສະຕາລ ໂທລະຄົມ (Unitel) ຈໍານວນ 1 ຕື້ກີບ, ຈາກບໍລິສັດໄຟຟ້າຫົງສາ ຈໍາກັດ ຈຳນວນ 1 ລ້ານບາດ (ສະກຸນເງິນໄທ), ຊຶ່ງພິທີມອບ-ຮັບໄດ້ຈັດຂຶ້ນຢູ່ສໍານັກງານນາຍົກລັດຖະມົນຕີ ກ່າວມອບໂດຍທ່ານພົນຈັດຕະວາ ອຸລະຫາ ທອງວັນທາ ຮອງຜູ້ອໍານວຍການໃຫຍ່ບໍລິສັດສະຕາລໂທລະຄົມ ແລະ ທ່ານ ສະພາຍຸດ ທູພູນ ຜູ້ອໍານວຍການໃຫຍ່ ບໍລິສັດໄຟຟ້າຫົງສາ
ຈໍາກັດ.
ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ກ່າວຂອບໃຈຕໍ່ສອງພາກສ່ວນດັ່ງກ່າວ ທີ່ໄດ້ໃຫ້ການຊ່ວຍເຫລືອອັນລໍ້າຄ່າດັ່ງກ່າວໃຫ້ແກ່ຜູ້ປະສົບໄພນໍ້າຖ້ວມຢູ່ທ້ອງຖິ່ນຕ່າງໆໃນປີນີ້, ຊຶ່ງຖືວ່າເປັນການປະກອບສ່ວນອັນສຳຄັນ ເຮັດໃຫ້ປະຊາຊົນຜູ້ປະສົບໄພນໍ້າຖ້ວມໄດ້ຮັບການແກ້ໄຂບັນເທົາທຸກ ແລະ ປັບປຸງຊີວິດການເປັນຢູ່ຂອງຕົນໃຫ້ກັບຄືນສູ່ສະພາບປົກກະຕິໂດຍໄວ..
