ໂຣນັລໂດ້ ຍິງຄົບ 700 ລູກ ຍົກຜົນງານໃຫ້ເພື່ອນຮ່ວມທີມ-ຄູຝຶກ
ໂປຣຕຸເກສ ພາດເສຍໃຫ້ ຢູເຄຣນ 1-2 ແຕ່ປະຕູຈາກຈຸດໂທດ ເຮັດໃຫ້ ໂຣນັລໂດ້ ເພີ່ມສະຖິຕິໃນການຍິງປະຕູຄົບ 700 ໜ່ວຍ ທັງກັບທີມຊາດ ແລະ ສະໂມສອນ.
ການແຂ່ງຂັນຢູໂຣ 2020 ຮອບຄັດເລືອກ ໃນກຸ່ມ ບີ ຢູເຄຣນ ພົບ ໂປຣຕຸເກສ ເຈົ້າບ້ານນຳ 2 ປະຕູລວດ ຈາກ ໂຣມັນ ຢາເຣັມຊຸດ ແລະ ອັງເດຣ ຢາໂມແລນໂກ້ ເຄິ່ງຫລັງ ຢູເຄຣນ ເຫລືອຜູ້ຫລິ້ນ 10 ຄົນ ໂປຣຕຸເກສ ໄດ້ລູກໂທດຈາກ ຄຣິສເຕຍໂນ ໂຣນັລໂດ້ ແຕ່ໄລ່ບໍ່ທັນ ເສຍໄປ 1-2 ເຮັດໃຫ້ ຢູເຄຣນ ຄວ້າປີ້ໄປຫລິ້ນຮອບສຸດທ້າຍແນ່ນອນແລ້ວ.
ທັງນີ້ສ່ວນ ໂຣນັລໂດ້ ເຖິງວ່າຈະເສຍ ແຕ່ກໍສ້າງສະຖິຕິຍິງ 700 ປະຕູທັງໃນລະດັບສະໂມສອນ ແລະ ທີມຊາດຈາກການລົງສະໜາມທັງໝົດ 974 ນັດ ໂດຍແບ່ງເປັນໃນນາມທີມຊາດ 95 ປະຕູ, ສະປໍຕິ້ງ ລິສບອນ 5 ປະຕູ, ແມນເຊັສເຕີ ຢູໄນເຕັດ 118 ປະຕູ, ຣີລ ມາດຣິດ 450 ປະຕູ ແລະ ຢູເວນຕຸສ 32 ປະຕູ ແຕ່ ໂຣນັລໂດ້ ລະບຸວ່າ: ບໍ່ໄດ້ສົນໃຈສະຖິຕິພວກນີ້ ແຕ່ເສຍໃຈທີ່ທີມເສຍ ແລະ ຕໍ່ໃຫ້ຈະຊະນະພ້ອມສ້າງສະຖິຕິ ກໍຍົກໃຫ້ເປັນຜົນງານຂອງເພື່ອນຮ່ວມທີມ ແລະ ທີມຄູຝຶກ ເພາະບໍ່ແມ່ນທຸກຄົນທີ່ຈະສ້າງຕົນເອງຂຶ້ນມາຢູ່ໃນລະດັບນີ້ໄດ້ ຫາກບໍ່ມີທີມງານທີ່ດີ.
