ເປັນຫ່ວງ ເລື່ອງລ່ວງໄຟແດງ

ໂດຍ: ມຶກບໍ່ແຫ້ງ

ການສັນຈອນຢູ່ ບ້ານເຮົານັ້ນນັບມື້ນັບຕິດຂັດ, ຈຳນວນລົດໃຫຍ່ນ້ອຍ ເພີ່ມຂຶ້ນປານດອກເຫັດ ແຕ່ກໍເປັນ ສິ່ງຍອມ ຮັບວ່າ ການຂະຫຍາຍຕົວຂອງ ເສັ້ນທາງຍັງບໍ່ທັນສາມາດຮອງຮັບກັບການເພີ່ມຂຶ້ນຢ່າງວ່ອງໄວຂອງຈຳນວນລົດດັ່ງກ່າວ ແຕ່ນັ້ນມັນກໍເປັນປາກົດການຢູ່ຫລາຍປະເທດ ທີ່ແຕກຕ່າງຈາກປະ ເທດອື່ນຂອງພວກເຮົາກໍ ຄືການລ່ວງ ໄຟແດງນີ້ລະ.

ມີໄລຍະໜຶ່ງ ພວກເຮົາກະວ່າ ເອົາຈິງຈັງເລື່ອງການຢຽບທາງມ້າລາຍ ແຕ່ຍັງບໍ່ສາມາດຄວບຄຸມໄດ້, ມາບັດນີ້ການລ່ວງໄຟແດງໂດຍສະເພາະ ຢ່າງຍິ່ງຜູ້ຂັບຂີ່ລົດຈັກແມ່ນມີຢ່າງຫຼວງຫຼາຍ. ສິ່ງດັ່ງກ່າວແມ່ນທ້າທາຍ ຄວາມສັກສິດຂອງລະບຽບກົດໝາຍ ໂດຍສະເພາະກົດລະບຽບຈາລະຈອນ ແຕ່ສຳຄັນໄປກວ່ານັ້ນພຶດຕິກຳອັນນີ້ ເຮັດໃຫ້ບໍ່ສະເພາະແຕ່ຜູ້ທີ່ຂັບລົດລ່ວງ ໄຟແດງເທົ່ານັ້ນ ແຕ່ຍັງມີຄວາມສ່ຽງສູງຕໍ່ຝ່າຍໄດ້ຮັບສັນຍານ ໄຟຂຽວເກີດ ອຸປະຕິເຫດຕື່ມອີກ.

ການລ່ວງໄຟແດງຄືວ່ານີ້ມັກເກີດຂຶ້ນ ໃນເວລາການລໍຖ້າໄຟຂຽວ ແຕ່ໃນຂະນະທີຜູ້ເພິ່ນມັກລ່ວງໄຟແດງນີ້ສັງເກດເຫັນວ່າຢູ່ທາງດ້ານອື່ນ ບໍ່ເຫັນລົດມາ ກໍລ່ວງໄຟແດງໄປເລີຍ, ເຮັ່ງຮ້າຍໄປກວ່ານັ້ນເຫັນຜູ້ ໜຶ່ງເຮັດແລ້ວ ບາງຄັ້ງກໍມີຜູ້ທີສອງ, ສາມຕາມມາ.

ມາເບິ່ງເບື້ອງສະຖິຕິການເກີດອຸປະຕິເຫດໃນ ສປປ ລາວ ໂດຍສະເພາະ ໃນນະຄອນຫລວງວຽງຈັນ ນັບມື້ນັບເພີ່ມຫລາຍຂຶ້ນ, ອາທິດໜຶ່ງສະເລ່ຍ ແລ້ວບໍ່ຕໍ່າກວ່າ 100 ກໍລະນີ ແລະໃນນີ້ເຈົ້າໜ້າທີ່ຕຳຫລວດເພິ່ນກໍເວົ້າ ວ່າ ສາເຫດໜຶ່ງທີ່ມັກພົບເຫັນ ກໍແມ່ນການລ່ວງລະເມີດກົດລະບຽບຈາລະຈອນ ຕ່າງໆ.

ການລ່ວງໄຟແດງຄືວ່ານີ້ອາດກາຍເປັນສາເຫດຂອງການເກີດອຸປະຕິເຫດ ແລະ ຄວາມບໍ່ເປັນລະບຽບຮຽບຮ້ອຍຂອງການຈາລະຈອນໃນລາວ, ມັນສະແເດງເຖິງລະດັບຄຸນສົມບັດ ແລະການສຶກສາຂອງສ່ວນບຸກຄົນທີ່ມີ ສ່ວນຮັບຜິດຊອບຕໍ່ສັງຄົມ, ຈາກບັນຫາເລັກນ້ອຍເຊັ່ນນີ້ ເຮົາຍັງສາມາດຕີ ແຜ່ຄວາມໝາຍເຊື່ອມໂຍງກັບພຶດຕິກຳອື່ນທີ່ສະທ້ອນເຖິງຄຸນນະພາບຂອງ ການບໍລິການສາທາລະນະ ແລະ ຄວາມສັກສິດຂອງນິຕິກໍາພວກເຮົາ.

ຜ່ານມາເຈົ້າໜ້າທີ່ຕຳຫລວດ ເພິ່ນກໍຮັບຮູ້ບັນຫານີ້ ແລະ ໃຫ້ການສຶກສາ ອົບຮົມ, ໃຫ້ຄວາມຮູ້ແກ່ຜູ້ໃຊ້ລົດໃຊ້ຖະໜົນເປັນຢ່າງດີ ໂດຍສະເພາະ ຕອນເຊົ້າ ເຊິ່ງພວກເຮົາອາດເຫັນອ້າຍຕໍາຫລວດເພິ່ນຢືນບັນຍາຍຢູ່ຕາມສາຍ ທາງຕ່າງໆເພື່ອເຕືອນສະຕິໃນການຂັບຂີ່, ເຄົາລົບກົດລະບຽບຈາລະຈອນ, ພ້ອມນັ້ນກໍຍັງຫ້າມຜູ້ຂັບຂີ່ເອົາຕີນລົດໄປແປະໃສ່ ຫລື ຢຽບເຂດເສັ້ນທາງ ມ້າລາຍແຕ່ປານນັ້ນກໍຍັງບໍ່ສາມາດດັດສັນດານຜູ້ທີ່ມັກ ລ່ວງໄຟແດງນັ້ນ ໄດ້ພໍປານໃດ.

ພວກເຮົາບໍ່ອາດໃຫ້ຖືບັນຫາດັ່ງກ່າວ ເປັນເລື່ອງເລັກນ້ອຍແຕ່ຂໍໃຫ້ສະ ກັດກັ້ນປາກົດການນີ້ ດ້ວຍຫລາຍວິທີ ແລະ ໃສ່ລະບຽບຜູ້ລ່ວງລະເມີດ ໄຟແດງນີ້ຢ່າງເຄັ່ງຄັດ, ຜູ້ຂັບຂີ່ກໍຄວນມີຄວາມເຄົາລົບຕໍ່ກົດຈະລາຈອນ ຫລາຍຂຶ້ນ, ຢ່າໄດ້ມັກງ່າຍເອົາຊີວິດໄປສ່ຽງກັບການໄດ້ໄປໄວ ແຕ່ ພາດມາມັນຈະເດືອດຮ້ອນທັງຕົນເອງ ແລະ ຜູ້ອື່ນ, ພ້ອມນັ້ນ ກໍເປັນການປະກອບສ່ວນໃຫ້ບັນຍາກາດໃນການສັນຈອນບ້ານເຮົາເປັນລະ ບຽບຮຽບຮ້ອຍຈົບງາມຂຶ້ນຕື່ມ.