ປະເທດລຸ່ມແມ່ນ້ຳຂອງ-ແມ່ນ້ຳລ້ານຊ້າງ ຫາລືບັນຫາເສດຖະກິດຂ້າມແດນ
ໃນວັນທີ 9 ຕຸລານີ້, ທີ່ນະຄອນຫລວງວຽງຈັນ, ກົມແຜນການ ແລະ ການຮ່ວມມືກະຊວງອຸດສາຫະກຳ ແລະ ການຄ້າ ໄດ້ເປັນເຈົ້າພາບຈັດກອງປະຊຸມກອບການຮ່ວມມືດ້ານເສດຖະກິດຂ້າມແດນໃນກອບອະນຸພາກພື້ນແມ່ນ້ຳຂອງ-ແມ່ນ້ຳລ້ານຊ້າງ, ໂດຍມີປະ ເທດ ກຳປູເຈຍ, ຈີນ, ລາວ, ໄທ, ມຽນມາ ແລະ ຫວຽດນາມ ເຂົ້າຮ່ວມເພື່ອປຶກສາຫາລືແຜນການ 5 ປີ ຂອງບັນດາໜ່ວຍງານຕ່າງໆ, ເຊິ່ງກວມເອົາຫລາຍຂົງເຂດເສດຖະກິດ, ໂດຍສະເພາະການຂົນສົ່ງ, ພະລັງງານໄຟຟ້າ, ການຄ້າທາງເອເລັກໂທຣນິກ, ກະສິກຳ, ອຸດສາຫະກຳ ແລະ ການຝຶກອົບຮົມໃຫ້ແກ່ພະນັກງານຕ່າງໆ ທີ່ກ່ຽວຂ້ອງ.
ທ່ານ ພູວຽງ ພົງສາ ວ່າການຫົວໜ້າກົມດັ່ງກ່າວມີຄໍາເຫັນວ່າ: ກອງປະຊຸມກອບການຮ່ວມມືດ້ານເສດຖະກິດຂ້າມແດນ ໃນກອບອະນຸພາກພື້ນແມ່ນ້ຳຂອງ-ແມ່ນ້ຳລ້ານຊ້າງຄັ້ງນີ້ເປັນຄັ້ງທີ 3, ເຊິ່ງຄັ້ງທໍາອິດໄດ້ຈັດຢູ່ ສປ ຈີນ, ຄັ້ງທີສອງ ຈັດຢູ່ກໍາປູເຈຍ. ສ່ວນຄັ້ງທີ 4 ຈະຈັດຢູ່ປະເທດມຽນມາ ໂດຍຈະໄດ້ປຶກສາຫາລືບັນຫາຕ່າງໆ ກ່ຽວກັບເສດຖະກິດຂ້າມແດນ ໃນ 6 ປະເທດລຸ່ມແມ່ນໍ້າຂອງ-ແມ່ນ້ຳລ້ານຊ້າງ. ສຳລັບກອງປະ ຊຸມຄັ້ງນີ້, ສປປ ລາວ ຈະໄດ້ສະເໜີກ່ຽວກັບນະໂຍບາຍ ໃນການສ້າງເຂດເສດຖະກິດພິເສດ ວ່າເຮົາຈະມີນະໂຍບາຍຫຍັງແດ່ໃນການດຶງດູດນັກລົງທຶນຈາກ ສປຈີນ ແລະ ບັນດາປະເທດລຸ່ມແມ່ນ້ຳຂອງໃຫ້ຫລາຍຂຶ້ນ.
ທ່ານ ພູວຽງ ພົງສາ ກ່າວຕື່ມວ່າ: ໃນອະນາຄົດ ຈະໃຫ້ມີການຮ່ວມມືຢູ່ກອບແມ່ນ້ຳຂອງ-ແມ່ນ້ຳລ້ານຊ້າງນີ້ຫລາຍຂຶ້ນ, ເຊິ່ງຝ່າຍຈີນແມ່ນໄດ້ເລືອກເອົາເຂດພັດທະນາເສດຖະກິດກວມລວມໄຊເສດຖາທີ່ນະຄອນຫລວງວຽງຈັນເປັນຈຸດເລີ່ມຕົ້ນ.
