ມູນນິທິ ເຟຣດ ຮາໂລ ຈັດກິດຈະກຳກວດສຸຂະພາບຕາໂດຍບໍ່ເສຍຄ່າ
ໃນວັນທີ 8 ຕຸລາຜ່ານມານີ້, ມູນນິທິ ເຟຣດ ຮາໂລ (Fred hollows) ໄດ້ຈັດກິດຈະກຳກວດສຸຂະພາບຕາໃຫ້ກັບມວນຊົນ, ໂດຍສະເພາະນັກຮຽນພິເສດທີ່ມີຄວາມບົກພ່ອງທາງສາຍຕາ ເພື່ອກວດສາຍຕາ, ປິ່ນປົວສາຍຕາ, ຜ່າຕັດ ແລະ ຕັດແວ່ນຕາໂດຍບໍ່ເສຍຄ່າ ທີ່ສູນປິ່ນປົວ ແລະ ຮັກສາສຸຂະພາບຕາທົ່ງປົ່ງນະຄອນຫລວງວຽງຈັນ.
ວິຊາການມູນນິທິ ເຟຣດ ຮາໂລ ລາວ ໃຫ້ຮູ້ວ່າ: ກິດຈະກຳດັ່ງກ່າວ, ຈັດຂຶ້ນເພື່ອສະເຫລີມສະຫລອງວັນສາຍຕາໂລກ, ເຊິ່ງເປັນໂຄງການເປີດກວ້າງຮັກສາສຸຂະພາບຕາແບບຢືນຍົງ, ເປັນໂຄງການພາກຂະຫຍາຍໄລຍະ II (2019-2020) ພາຍຫລັງທີ່ໄດ້ສໍາເລັດໂຄງການໄລຍະທີ I ທີ່ໄດ້ເລີ່ມຈັດຕັ້ງປະຕິບັດມາແຕ່ປີ 2015-2018, ດ້ວຍການປິ່ນປົວ ແລະ ຮັກສາສຸຂະພາບຕາ, ໂດຍສະເພາະແມ່ນແກ່ນຕາຂຸ່ນ, ຊີ້ນຕາປົ່ງ, ພະຍາດຕາກະດັນ, ສາຍຕາບົກຜ່ອງ ແລະ ອື່ນໆ ໃຫ້ປະຊາຊົນໂດຍບໍ່ເສຍຄ່າໃຊ້ຈ່າຍໃດໆ, ເຊິ່ງໄດ້ຮັບການຈັດຕັ້ງປະຕິບັດຢູ່ 10 ແຂວງຄື: ແຂວງຜົ້ງສາລີ, ຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ, ໄຊຍະບູລີ, ວຽງຈັນ, ບໍລິຄໍາໄຊ, ຄໍາມ່ວນ, ສະຫວັນນະເຂດ ແລະ ນະຄອນຫລວງວຽງຈັນ. ພ້ອມນີ້, ໂຄງການດັ່ງກ່າວ, ຍັງໄດ້ສົ່ງເສີມການພັດທະນາຊັບພະຍາກອນມະນຸດ, ສະໜັບສະໜູນອຸປະກອນການແພດທີ່ຈໍາເປັນ ແລະ ຊ່ວຍເຫລືອພື້ນຖານໂຄງລ່າງລວມທັງການຜ່າຕັດໃຫ້ປະຊາຊົນຜູ້ທີ່ຢູ່ເຂດຫ່າງໄກສອກຫລີກຕ່າງໆ, ເຊິ່ງໃນໄລຍະຜ່ານມາ ມູນນິທິເຟຣດ ຮາໂລ ສາມາດປິ່ນປົວຄົນເຈັບໄດ້ເກືອບ 40 ພັນຄົນ. ໃນນັ້ນ, ໄດ້ປິ່ນປົວພະຍາດແກ່ນຕາຂຸ່ນ ຫລາຍກວ່າ 4 ພັນຄົນ/ປີ, ຜ່າຕັດພະຍາດແກ່ນຕາຂຸ່ນໄດ້ 1.400 ຄົນຕໍ່ປະຊາກອນ 1 ລ້ານຄົນ ແລະ ອີກ 20 ພັນຄົນ ຍັງບໍ່ທັນໄດ້ຮັບການປິ່ນປົວນັ້ນ ມູນນິທິ ເຟຣດ ຮາໂລ ຈະໄດ້ສົມທົບກັບກະຊວງສາທາລະນະສຸກ ໃນການຂະຫຍາຍການບໍລິການໃນການເຂົ້າເຖິງຄົນເຈັບໃຫ້ຫລາຍຂຶ້ນ.
ໃນຕອນບ່າຍຂອງວັນດຽວກັນນີ້, ມູນນິທິ ດັ່ງກ່າວ ຍັງໄດ້ຈັດກິດຈະກໍາເຜີຍແຜ່ຄວາມຮູ້ ກ່ຽວກັບການຮັກສາສຸຂະພາບຕາ ຢູ່ໂຮງຮຽນມັດທະຍົມສົມບູນວຽງຈັນ ເພື່ອໃຫ້ຄວາມຮູ້ພື້ນຖານກ່ຽວກັບສຸຂະພາບຕາ, ວິທີປ້ອງກັນຕາ ແລະ ວິທີການຮັກສາຕາໃຫ້ຖືກວິທີ.
