ຕຳຫລວດຈະສືບຕໍ່ມ້າງຂະບວນການປອມແປງປ້າຍລົດໃຫ້ໝົດໄປ

  ກະຊວງປ້ອງກັນຄວາມສະຫງົບ, ຈະຈັດກໍາລັງສືບຕໍ່ລົງເຄື່ອນໄຫວກວດກາມ້າງຂະບວນການປອມແປງປ້າຍລົດໃຫ້ໝົດໄປ, ເພື່ອສະກັດກັ້ນບໍ່ໃຫ້ກຸ່ມຄົນບໍ່ດັ່ງກ່າວສ້າງຄວາມເສຍຫາຍແກ່ປະຊາຊົນກໍຄືກໍຄວາມບໍ່ສະຫງົບໃນສັງຄົມ.

ການຢືນຢັນດັ່ງກ່າວມີຂຶ້ນໃນໂອກາດຖະແຫລງຂ່າວຕໍ່ສື່ມວນຊົນຂອງທ່ານພັນໂທ ດວງຈັນ ວົງວິໄຊ ຮອງຫົວໜ້າກົມຕຳຫລວດສືບສວນ-ສອບສວນໃນກໍລະນີຈັບກຸ່ມແກ້ງປອມແປງປ້າຍລົດອັນຕະລາຍໄດ້ເມື່ອບໍ່ດົນມານີ້ຄື: ນາງ ປິ່ນຄຳ ອາຍຸ 53 ປີຢູ່ບ້ານດອນກອຍ, ເມືອງສີສັດຕະນາກ, ນະຄອນຫລວງວຽງຈັນ, ນາງ ດຳ ອາຍຸ 28 ປີອາຊີບນັກສຶກສາຢູ່ບ້ານນາປົ່ງ, ເມືອງຄົງເຊໂດນ, ທ້າວ ເຫລືອງ ອາຍຸ 33 ປີສັນຊາດຫວຽດນາມພັກເຊົາຢູ່ບ້ານຄົງນະຄອນ, ເມືອງຄົງເຊໂດນ ແຂວງສາລະວັນ ແລະ ທ້າວ ໝອນ ອາຍຸ 24 ປີຢູ່ບ້ານແກ້ງກອກ, ເມືອງຈຳພອນ, ແຂວງສະຫວັນນະເຂດ, ພ້ອມຂອງກາງປ້າຍລົດປອມແປງເປັນຈຳນວນຫລາຍ.

ທ່ານຮອງຫົວໜ້າກົມຕຳຫລວດສືບສວນ-ສອບສວນ ໃຫ້ຮູ້ວ່າ: ໃນໄລຍະຜ່ານມາ, ໄດ້ຮັບລາຍງານຈາກພົນລະເມືອງດີວ່າມີສະພາບການຄ້າຂາຍປ້າຍລົດຈັກ-ລົດໃຫຍ່ ແລະ ເອກະສານນຳໃຊ້ລົດປອມແປງຢ່າງແຜ່ຫລາຍໃນນະຄອນຫລວງວຽງຈັນ, ຈຶ່ງໄດ້ຈັດກໍາລັງລົງຕິດຕາມພົບວ່າຂະບວນການດັ່ງກ່າວມີການຈັດຕັ້ງເຄື່ອນໄຫວເປັນເຄືອຂ່າຍໃຫຍ່, ຈຶ່ງນຳກຳລັງເຂົ້າຈັບຕົວນາງ ປິ່ນຄຳ ຢູ່ບ້ານດອນກອຍ ແລະ ກວດຄົ້ນເຮືອນພົບເຫັນປ້າຍລົດປອມຈຳນວນໜຶ່ງ ແລະ ຜ່ານການສອບສວນຂະຫຍາຍຜົນກໍສາມາດມ້າງກຸ່ມປອມແປງປ້າຍລົດດັ່ງກ່າວມາດໍາເນີນຄະດີ.

ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ໄດ້ຮ່ວມກັນເຄື່ອນໄຫວລັກລອບຄ້າຂາຍປ້າຍລົດປອມ ແລະ ເອກະສານນຳໃຊ້ລົດແທ້, ໂດຍຈ້າງຄົນຢູ່ປະເທດເພື່ອນບ້ານເປັນຜູ້ຜະລິດໃຫ້ເພື່ອມາຈໍາໜ່າຍໃນລາຄາ 5-6 ແສນກີບສໍາລັບລົດຈັກ ແລະ  1-2 ລ້ານກີບ, ສໍາລັບລົດໃຫຍ່ ພ້ອມທັງ ປອມແປງລາຍເຊັນ ແລະ ກາປະທັບຂອງເຈົ້າໜ້າທີ່ກ່ຽວຂ້ອງ.

ທ່ານຮອງຫົວໜ້າກົມຕຳຫລວດສືບສວນ-ສອບສວນ ໃຫ້ຮູ້ວ່າ: ເຈົ້າໜ້າທີ່ຍັງຈະສືບຕໍ່ຕິດຕາມຂະບວນການປອມແປງປ້າຍລົດ ກໍຄືການຄ້າຂາຍລົດທີ່ບໍ່ຖືກຕ້ອງຕາມລະບຽບກົດໝາຍໃຫ້ໝົດໄປ, ເຊິ່ງໄລຍະຜ່ານມາບັນຫາດັ່ງກ່າວໄດ້ສ້າງຄວາມເສຍຫາຍໃຫ້ປະຊາຊົນ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມຫລາຍສົມຄວນ. ຈຶ່ງຮຽກຮ້ອງມາຍັງພະນັກງານ, ທະຫານ, ຕຳຫລວດ ແລະ ປະຊາຊົນ ຖ້າໄດ້ຊື້ ແລະ ນຳໃຊ້ບັນດາປ້າຍລົດທີ່ບໍ່ຖືກຕ້ອງຂໍໃຫ້ຢຸດເຊົາ ແລະ ຖ້າພົບເຫັນບຸກຄົນທີ່ເຄື່ອນໄຫວຂາຍປ້າຍລົດບໍ່ຖືກຕ້ອງໃຫ້ລາຍງານເຈົ້າໜ້າທີ່ດ່ວນເພື່ອແກ້ໄຂໃຫ້ທັນເວລາ.