ແຂວງເຊກອງ ໄດ້ຮັບຢາ ແລະອຸປະກອນສັດຕະວະແພດ

ພິທີມອບ-ຮັບຢາ ແລະອຸປະກອນສັດຕະວະແພດລະຫວ່າງພະແນກກະສິກໍາ-ປ່າໄມ້ແຂວງເຊກອງ ແລະ ກົມລ້ຽງ ແລະການປະມົງ, ກະຊວງກະສິກໍາ-ປ່າໄມ້ ໄດ້ຈັດຂຶ້ນໃນຕອນເຊົ້າວັນທີ 26 ກັນຍານີ້ທີ່ແຂວງເຊກອງ ລະຫວ່າງທ່ານ ສີແສງ ຂຸນສີ ຮອງຫົວໜ້າກົມລ້ຽງສັດ ແລະການປະມົງ ແລະ ທ່ານ ສົມຫວັງ ຂໍາມະວົງ ຫົວໜ້າພະແນກກະສິກໍາ-ປ່າໄມ້ແຂວງ ປະກອບມີຢາປ້ອງກັນພະຍາດເຕົ້າໂຮມເລືອດງົວ-ຄວາຍ 1.000 ກ໋ອງມູນຄ່າ 23 ລ້ານກີບ, ຢາຕ້ານເຊື້ອ (ເພັນສະເຕັບ) 100 ກ໋ອງມູນຄ່າ 10 ລ້ານກີບ, ເຂັມສັກ 60 ກັບ ສະແລັງ 30 ກັບມູນຄ່າ 4  ລ້ານກວ່າກີບ ແລະເງິນສົດຈໍານວນ 10 ລ້ານກີບ.

ເຄື່ອງອຸປະກອນ ແລະເງິນຈໍານວນດັ່ງກ່າວ ນີ້ແມ່ນຈະໄດ້ນໍາໃຊ້ເຂົ້າໃນການປະຕິບັດໜ້າທີ່ວຽກງານວິຊາສະ ເພາະລົງເຄື່ອນໄຫວສັກຢາໃຫ້ສັດລ້ຽງ ພາຍຫລັງນ້ຳບົກແຫ້ງລົງ.