ຊຸກຍູ້ສົ່ງເສີມເຕັກນິກການປູກມອນ-ລ້ຽງມ້ອນ ຜະລິດເປັນສິນຄ້າ

ສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ, ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບບໍລິສັດສອງມືນາງ ຈໍາກັດ ແລະ ມະຫາວິທະຍາໄລຊູໂຈ ໄດ້ຈັດຊຸດອົບຮົມກ່ຽວກັບເຕັກນິກການປູກມອນ-ລ້ຽງມ້ອນ ຂຶ້ນໃນວັນທີ 23-25 ກັນຍານີ້ ທີ່ສະຖາບັນ ນິເວດວິທະຍາ ແລະ ເຕັກໂນໂລຊີ ຊີວະພາບ,ໂດຍການເຂົ້າຮ່ວມຂອງ ທ່ານ ບໍ່ວຽງຄໍາ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ມີທ່ານ  ນາງ ແກ້ວສາຍໃຈ ໄຊຍະສອນ, ປະທານ ບໍລິສັດ ສອງມືນາງ ຈໍາກັດ ແລະ ທ່ານ Huang Xing, ຮອງອະທິການບໍດີ ມະຫາວິທະຍາໄລຊູໂຈ ລາວ ພ້ອມນັກສໍາມະນາກອນເຂົ້າຮ່ວມເປັຮຈານວນຫລາຍ.

    ເພື່ອຖ່າຍທອດຄວາມຮູ້ກ່ຽວກັບເຕັກນິກການປູກມອນ-ລ້ຽງມ້ອນ ແລະ ສ້າງໂອກາດອັນດີໃຫ້ແກ່ຜູ້ເຂົ້າຮ່ວມຝຶກອົບຮົມໃນການແລກປ່ຽນບົດຮຽນປະສົບການກ່ຽວກັບວຽກງານດັ່ງກ່າວ ແນໃສ່ຊຸກຍູ້ສົ່ງເສີມການຜະລິດເສັ້ນໄໝຈາກການປູກມອນ-ລ້ຽງມ້ອນເປັນສິນຄ້າ. ນອກນີ້, ຜູ້ເຂົ້າຮ່ວມໄດ້ຮັບຟັງການນໍາສະເໜີບົດຈາກຊ່ຽວຊານສະເພາະດ້ານຈາກມະຫາວິທະຍາໄລຊູໂຈ ສປ ຈີນ ແລະ ວິຊາການປູກມອນ-ລ້ຽງມ້ອນຈາກສະຖາບັນນິເວດວິທະຍາ ແລະ ເຕັກໂນໂລຊີຊີວະພາບພ້ອມລົງພາກປະຕິບັດຕົວຈິງກ່ຽວກັບບັນດາເຕັກນິກຕ່າງໆຂອງການປູກມອນ-ລ້ຽງມ້ອນທີ່ສວນສາທິດປູກມອນ-ລ້ຽງມ້ອນ ຫລັກ 18 ຂອງບໍລິສັດດັ່ງກ່າວແລະ ຜູ້ເຂົ້າຮ່ວມຈະໄດ້ຮັບເບ້ຍມອນນໍາໄປປູກທົດລອງທີ່ສວນຂອງຕົນເອງ ພ້ອມທັງນໍາເອົາບົດຮຽນໄປເຜີຍແຜ່ໃຫ້ເກີດດອກອອກຜົນຢູ່ຂັ້ນທ້ອງຖິ່ນຂອງຕົນ.