ລາວ ແລະອົງການ IUCN ທົບທວນຄວາມຄືບໜ້າກ່ຽວກັບການສະເໜີປ່າສະຫງວນແຫ່ງຊາດຫີນໜາມໜໍ່ເຂົ້າເປັນມໍລະດົກໂລກຮ່ວມຊາຍແດນ
ການຢ້ຽມຢາມຂອງອົງການສາກົນ ເພື່ອການອະນຸລັກທຳມະຊາດ (IUCN)ນຳໂດຍ ທ່ານ ປີເຕີ ຊາດີ (Peter Shadie), ຜູ້ອຳນວຍການຄົນໃໝ່ຂອງໂຄງການດັ່ງກ່າວໃນວັນທີ 18 ກັນຍານີ້ ເພື່ອເຂົ້າຮ່ວມກອງປະຊຸມດ້ານວິຊາການສະເພາະກິດ ເພື່ອທົບທວນຄືນຄວາມຄືບໜ້າຫລ້າສຸດກ່ຽວກັບການສະເໜີປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກທາງທຳມະຊາດຂອງ ສປປ ລາວ.
ທ່ານ ຊາດີ ມີຄວາມຮູ້ຄວາມຊ່ຽວຊານກ່ຽວກັບຂົງເຂດພາກພື່ນເປັນຢ່າງດີ ແລະ ທ່ານຍັງເປັນຜູ້ຂຽນກ່ຽວກັບ “ການປະເມີນຄວາມພ້ອມດ້ານມໍລະດົກໂລກຂອງອົງການອຸຍເນສໂກສຳລັບປ່າສະຫງວນແຫ່ງຊາດຫີນໜາມໜໍ່” (ເດືອນກຸມພາປີ 2017). ທ່ານໄດ້ນຳເອົາຄວາມຮູ້ທີ່ເລິກເຊິ່ງທີ່ທ່ານມີກ່ຽວກັບພື້ນທີ່ ແລະ ຄວາມຊ່ຽວຊານໃນຂະບວນການຂອງອຸຍເນສໂກ ເພື່ອມາແລກປ່ຽນຢູ່ໃນກອງປະຊຸມ. ຕາມຄຳແນະນຳ 50 ຂໍ້ ທີ່ທ່ານໄດ້ກ່າວໄວ້ໃນປີ 2017 ເພື່ອສ້າງຄວາມເຂັ້ມແຂງໃຫ້ແກ່ຫີນໜາມໜໍ່ໃຫ້ມີສະຖານະພາບມໍລະດົກໂລກ.
ທ່ານ Shadie ໄດ້ກ່າວວ່າ: “ອົງການ IUCN ມີຄວາມຍິນດີເປັນຢ່າງຍິ່ງຕໍ່ຄວາມມຸ່ງໝັ້ນຢ່າງແຮງກ້າຂອງລັດຖະບານລາວໃນທຸກລະດັບທີ່ເຮັດວຽກຮ່ວມກັບຄູ່ຮ່ວມງານຢ່າງໄກ້ຊິດ, ເພື່ອກຽມຄວາມພ້ອມ ໃນການສະເໜີປ່າສະຫງວນແຫ່ງຊາດຫີນໜາມໜໍ່ເຂົ້າໃນບັນຊີມໍລະດົກໂລກ. ພວກເຮົາຫວັງວ່າຈະໄດ້ເຫັນການສະເໜີດັ່ງກ່າວເຂົ້າສູ່ຂະບວນການປະເມີນຜົນຢ່າງເປັນທາງການຂອງພວກເຮົາ”.
ການມາຢ້ຽມຢາມຂອງທ່ານ, ພ້ອມຜູ້ຕາງໜ້າອົງການ IUCN ໃນຄັ້ງນີ້, ແມ່ນໄດ້ກຳນົດການພຽງສອງອາທິດຫລັງຈາກກອງປະຊຸມຄະນະກຳມະການຊີ້ນຳມໍລະດົກລະດັບຊາດຄັ້ງທີ 8 ທີ່ກ່າວເຖິງການສະເໜີຊື່ຂອງຫີນໜາມໜໍ່ເຂົ້າໃນບັນຊີມໍລະດົກໂລກ. ສິ່ງດັ່ງກ່າວໄດ້ສະແດງໃຫ້ເຫັນເຖິງຄວາມມຸ້ງໝັ້ນ ແລະ ຄວາມທຸ້ມເທຂອງລັດຖະບານລາວ ແລະ ເປັນສິ່ງຢືນຢັນເຖິງການສະໜັບສະໜູນລະດັບຊາດຢ່າງຕໍ່ເນື່ອງ, ໃນການສົ່ງເສີມ ແລະ ປົກປ້ອງມໍລະດົກທາງທຳມະຊາດຂອງລາວ. ຖ້າການສະເໜີຊື່ເຂົ້າເປັນມໍລະດົກໂລກປະສົບຜົນສຳເລັດ, ປ່າສະຫງວນແຫ່ງຊາດຫີນໜາມໜໍ່ ແລະ ອຸທິຍານເເຫ່ງຊາດຟອງຍາແກບາງຂອງຫວຽດນາມ ກໍຈະກາຍເປັນມໍລະດົກໂລກທຳມະຊາດຮ່ວມຊາຍແດນແຫ່ງທຳອິດໃນອາຊີຕາເວັນອອກສຽງໃຕ້.
ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ເຊິ່ງເປັນປະທານກອງປະຊຸມວິຊາການດັ່ງກ່າວ ມີຄໍາເຫັນວ່າ: “ເນື່ອງຈາກມີການແລກປ່ຽນ ແລະ ການຮ່ວມມືຢ່າງຕໍ່ເນື່ອງລະຫວ່າງລັດຖະບານລາວ ແລະ ຫວຽດນາມ, ຂ້າພະເຈົ້າເຊື່ອຫມັ້ນວ່າ:ການສະເໜີປ່າສະຫງວນແຫ່ງຊາດຫີນຫນາມຫນໍ່ ເຂົ້າເປັນມໍລະດົກໂລກຮ່ວມຊາຍແດນຮ່ວມກັບອຸທິຍານແຫ່ງຊາດຟອງຍາແກບາງຈະປະສົບຜົນສຳເລັດ ແລະ ຈະເຮັດໃຫ້ພື້ນທີ່ດັ່ງກ່າວກາຍເປັນພູມສັນຖານຮ່ວມຊາຍແດນ ທາງດ້ານພູມີສາດ ແລະ ຊີວະວິທະຍາ ທີ່ໂດດເດັ່ນທີ່ສູດໃນໂລກ “ມັນເປັນສິ່ງທີ່ໜ້າປະທັບໃຈຫລາຍທີ່ເຫັນວ່າລັດຖະບານລາວໄດ້ມີຄວາມຄືບໜ້າຫຼາຍຕໍ່ການສະເໜີປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກຂອງອົງການອຸຍເນສໂກ, ຊຶ່ງມັນມີຄວາມສຳຄັນຫລາຍທີ່ປ່າສະຫງວນດັ່ງກ່າວ ຈະຖືກຍົກລະດັບໃຫ້ເປັນອຸທິຍານແຫ່ງຊາດ ແລະ ມີຄວາມຈຳເປັນ ທີ່ຈະຕ້ອງມີພະນັກງານ ແລະ ງົບປະມານໃນການດຳເນີນງານທີ່ພຽງພໍສຳລັບການຄຸ້ມຄອງເຂດຫີນໜາມໜໍ່ ໃຫ້ມີປະສິດທິພາບ. ລັດຖະບານເຢຍລະມັນມີຄວາມພາກພູມໃຈທີ່ໄດ້ເປັນຄູ່ຮ່ວມງານກັບລັດຖະບານລາວໃນການດຳເນີນການນີ້” ທ່ານ ເຢນສ໌ ລັກເຄັນເຮີມ (Jens Luetkenherm), ເອກອັກຄະລັດຖະທູດເຢຍລະມັນປະຈຳລາວໄດ້ກ່າວ.
ກົມມໍລະດົກ ແລະ ກົມປ່າໄມ້ ແມ່ນໄດ້ຮ່ວມມືກັນຢ່າງໃກ້ຊິດເພື່ອໃຫ້ບັນລຸການສະເໜີຊື່ປະສົບຜົນສຳເລັດ, ໂດຍໄດ້ຮັບການສະໜັບສະໜູນຈາກລັດຖະບານເຢຍລະມັນຜ່ານໂຄງການ “ການປົກປ້ອງ ແລະການນຳໃຊ້ລະບົບນິເວດປ່າໄມ້ ແລະ ຊີວະນາໆພັນແບບຍືນຍົງ”.
