ລາວ ຈະສະຫລອງວັນຕ້ານພະຍາດວໍ້ໂລກປະຈຳປີ 2019:

ໃນວັນທີ 20 ກັນຍານີ້ ທີ່ກະຊວງສທາລະນະສຸກ, ທ່ານ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກທ່ານ ບຸນຂວາງ ຄໍາບຸນເຮືອງ, ຮອງລັດຖະມົນຕີກະຊວງກະສິກໍາ ແລະ ປ່າໄມ້ ແລະ ທ່ານ ມາກແອນດິວ  ຈາຄົບ, ຜູ້ຕາງໜ້າອົງການອະນາໄມໂລກປະຈໍາລາວໄດ້ຮ່ວມກັນຖະແຫລງຂ່າວກ່ຽວກັບການສະເຫລີມສະຫລອງວັນຕ້ານພະຍາດວໍ້ໂລກ ປະຈໍາປີ 2019. ວ່າ: ພະຍາດວໍ້ ເປັນພະຍາດຕິດຕໍ່ຮ້າຍແຮງຊະນິດໜຶ່ງ ເຊິ່ງສາມາດຕິດຕໍ່ໄດ້ຈາກສັດສູ່ຄົນ; ຕົ້ນເຫດແມ່ນມາຈາກເຊື້ອ Rabies virus, ສາຍພັນ Lyssa virus, ໂດຍເຊື້ອພະຍາດດັ່ງກ່າວຍັງສາມາດຕິດແປດໃສ່ສັດເລືອດອຸ່ນທຸກຊະນິດໄດ້ອີກດ້ວຍເຊັ່ນ: ໝາ, ແມວ, ງົວ, ຄວາຍ, ຊະນີ, ກະຮອກ, ກະແຕ, ເສືອ,ໝີ, ໜູ, ແລະ ເຈຍ, ເປັນຕົ້ນ ລວມທັງຄົນເຮົານຳດ້ວຍ.

ການຕິດເຊື້ອຜ່ານທາງນໍ້າລາຍຂອງສັດທີ່ເປັນພະຍາດວໍ້ເຂົ້າສູ່ບາດແຜ ດ້ວຍການຖືກສັດກັດ ຫລື ຄູດ, ຫລື ເລຍ ໂດຍນໍ້າລາຍກະເດັນເຂົ້າທາງຜິວໜັງທີ່ມີບາດແຜ, ທາງຕາ ຫຼື ປາກ. ການລະບາດຂອງພະຍາດວໍ້ ສ່ວນໃຫຍ່ແມ່ນຢູ່ປະເທດທີ່ດ້ອຍພັດທະນາ ແລະ ປະເທດທີ່ກຳລັງພັດທະນາໃນຂົງເຂດທະວີບອາຟຣິກາ ແລະ ອາຊີ; ພາຫະນຳເຊື້ອທີ່ສຳຄັນແມ່ນ ສັດເລືອດອຸ່ນທຸກຊະນິດ ທີ່ເປັນສັດລ້ຽງລູກດ້ວຍນໍ້ານົມ (ຈຳພວກສັດກັດແຫ້ນ), ໂດຍສະເພາະແມ່ນໝາ. ພະຍາດດັ່ງກ່າວນີ້ ໄດ້ມີລາຍງານມາແຕ່ສະໄໝດຶກດຳບັນວ່າ “ເປັນນັກຂ້າມະນຸດ”.

ອີງຕາມຂໍ້ມູນຈາກອົງການອະນາໄມໂລກ (WHO) ໄດ້ລາຍງານວ່າ ໃນແຕ່ລະປີ ຈະມີຄົນເສຍຊີວິດຍ້ອນພະຍາດວໍ້ປະມານ 59.000 ຄົນຕໍ່ປີ, ໃນນີ້ 95% ແມ່ນຢູ່ອາຟຣິິກາ ແລະ ອາຊີ; ຄົນເສຍຊີວິດສ່ວນຫຼາຍແມ່ນຍ້ອນຖືກໝາກັດ; ປະມານ 30-60% ຂອງຜູ້ທີ່ໄດ້ຮັບຜົນກະທົບຍ້ອນຖືກໝາກັດ ແມ່ນເດັກນ້ອຍລະຫວ່າງ 5-14 ປີ, ໃນຂະນະທີ່ອັດຕາການຕາຍຍ້ອນເປັນພະຍາດວໍ້ແມ່ນ 100%.

ໃນປີ 2010, ລັດຖະບານລາວ ໄດ້ຮັບຮອງຍຸດທະສາດການລົບລ້າງພະຍາດວໍ້ໃນບັນດາປະເທດສະມາຊິກອາຊຽນ.

ສຳລັບ ສປປ ລາວ, ກໍໄດ້ມີການຮ່າງຍຸດທະສາດແຫ່ງຊາດວ່າດ້ວຍການກັນ ແລະ ຄວບຄຸມພະຍາດວໍ້ ໄປຄຽງຄູ່ກັບຍຸດທະສາດວ່າດ້ວຍການກັນ ແລະ ຄວບຄຸມພະຍາດວໍ້ຂອງບັນດາປະເທດອາຊຽນ, ເຊິ່ງກວມເອົາອົງປະກອບທາງດ້ານສຸຂະພາບຄົນ, ສຸຂະພາບສັດ ແລະ ການປະສານງານກັບຫຼາຍຝ່າຍເພື່ອໃຫ້ປະສົບຜົນສຳເລັດໃນການລົບລ້າງພະຍາດວໍ້ພາຍໃນປີ 2030 ຂອງອົງການອະນາໄມໂລກວາງອອກ ແລະ ອີງຕາມແຜນຍຸດທະສາດແຫ່ງຊາດ ກ່ຽວກັບພະຍາດຕິດຕໍ່ ແລະ ພະຍາດຊຶມເຊື້ອທີ່ເກີດຂຶ້ນໃໝ່ ແລະ ກັບຄືນມາເກີດຂຶ້ນອີກ, ພາຍໃຕ້ການຮ່ວມມື ແລະ ການປະສານງານຂອງ ກະຊວງສາທາລະນະສຸກ ແລະ ກະຊວງກະສິກຳ ແລະ ປ່າໄມ້ລາວ, ໂດຍໄດ້ກຳນົດເອົາ 5 ພະຍາດບຸລິມະສິດ, ເຊິ່ງໃນນີ້ ພະຍາດວໍ້ແມ່ນພະຍາດໜຶ່ງທີ່ນອນຢູ່ໃນພະຍາດບຸລິມະສິດດັ່ງກ່າວ ແລະ ພະຍາດວໍ້ ກໍໄດ້ຖືກຈັດເຂົ້າຢູ່ໃນລະບົບເຝົ້າລະວັງແຫ່ງຊາດໃນທ້າຍປີ 2018 ແລະ ເລີ່ມຈັດຕັ້ງປະຕິບັດຕັ້ງແຕ່ເດືອນມັງກອນ 2019 ເປັນຕົ້ນມາ.

ຢູ່ສປປ ລາວ ແມ່ນໄດ້ຮັບຜົນກະທົບຈາກພະຍາດວໍ້ ຕະຫລອດມາ ໃນແຕ່ລະປີ ແລະ ມີຂໍ້ມູນລາຍງານຈາກຄົນທີ່ຖືກໝາກັດ ແລະ ທີ່ພົບເຊື້ອໄວຣັດວໍ້ໃນຕົວຢ່າງຂອງແຕ່ລະປີ, ເຊິ່ງໄດ້ຮັບການລາຍງານຈາກບາງແຂວງຫາສູນວິເຄາະ ແລະ ລະບາດວິທະຍາທີ່ມີຕົວເລກສະສົມແຕ່ປີ 2012-2019 ສະແດງໃຫ້ເຫັນວ່າ: ກໍລະນີທີ່ຖືກສັດກັດມີທັງໝົດ 270 ຄົນ ແລະ ເສຍຊີວິດ 29 ຄົນ. ໃນກໍລະນີທີ່ຖືກສັດກັດ (ໝາ, ແມວ) ແມ່ນຄວນໄປພົບແພດດ່ວນ ເພື່ອຮັກສາປີ່ນປົວ ແລະ ສັກຢາວັກຊີນກັນພະຍາດວໍ້.

ເລີ່ມແຕ່ປີ 2008 ເປັນຕົ້ນມາ, ກະຊວງສາທາລະນະສຸກ ແລະ ກະຊວງກະສິກຳ ແລະ ປ່າໄມ້ ໄດ້ຜັດປ່ຽນກັນເປັນເຈົ້າພາບຈັດພິທີສະເຫຼີມສະຫຼອງວັດຕ້ານພະຍາດວໍ້ໂລກຢູ່ ສປປ ລາວ, ເພື່ອໃຫ້ຄວາມຮູ້ກ່ຽວກັບພະຍາດວໍ້ແກ່ປະຊາຊົນ, ຜົນກະທົບຂອງພະຍາດວໍ້, ວິທີປະຕິບັດ ແລະ ວິທີການກັນພະຍາດວໍ້.

ສຳລັບປີນີ້, ກະຊວງສາທາລະນະສຸກຈະເປັນເຈົ້າພາບ ຮ່ວມກັບກະຊວງກະສິກຳ ແລະ ປ່າໄມ້ ໂດຍຈະໄດ້ຈັດງານຊຸມນຸມສະເຫຼີມສະຫຼອງວັດຕ້ານພະຍາດວໍ້ໂລກຂຶ້ນ ທີ່ສວນເຈົ້າຟ້າງຸ່ມ, ບ້ານຂຸນຕາທ່າ, ເມືອງສີໂຄດຕະບອງ, ໃນວັນທີ 27 ກັນຍາທີ່ຈະມາເຖິງນີ້, ເລີ່ມແຕ່ເວລາ 8:30-16:00 ໂມງ; ສຳລັບຄຳຂວັນຂອງວັນຕ້ານພະຍາດວໍ້ໂລກປີນີ້ແມ່ນ “ສັກຢາກັນພະຍາດວໍ້ ເພື່ອກ້າວໄປເຖິງການລົບລ້າງພະຍາດວໍ້”.

ດັ່ງນັ້ນ, ຈຶ່ງຂໍເຊີນຊວນທຸກທ່ານ ຈົ່ງນຳເອົາສັດລ້ຽງ, ເປັນຕົ້ນ ແມ່ນໝາ ແລະ ແມວຂອງທ່ານໃຫ້ໄປສັກຢາກັນວໍ້ໂດຍບໍ່ໄດ້ເສຍຄ່າ