ທະນາຄານນະໂຍບາຍ (ທນບ) ມີແຜນຜ່ອນຊໍາລະ, ສະໜອງທຶນເພີ່ມໃຫ້ລູກຄ້າທີ່ຮັບຜົນກະທົບຈາກນ້ຳຖ້ວມແລະພະຍາດລະບາດ
ຜູ້ອຳນວຍການທະນາຄານ ນະໂຍບາຍ (ທນບ) ໄດ້ຊີ້ແຈງວ່າ: ເພື່ອປະກອບສ່ວນແກ້ໄຂຄວາມທຸກຍາກໃຫ້ປະຊາຊົນບັນດາເຜົ່າ ໂດຍການຄຸ້ມຄອງແລະນຳແຫຼ່ງທຶນນະໂຍບາຍລັດຖະບານ ປ່ອຍສິນເຊື່ອໃຫ້ປະຊາຊົນຜູ້ທຸກຍາກດ້ວຍອັດຕາດອກເບ້ຍນະໂຍບາຍຂອງລັດຖະບານຢູ່ເມືອງເປົ້າໝາຍທຸກຍາກ, ຈຸດສຸມພັດທະນາຂອງລັດຖະບານ-ທ້ອງຖິ່ນ ແລະບ້ານສາມສ້າງ ແນໃສ່ປະ ກອບສ່ວນຫັນປ່ຽນພື້ນຖານເສດຖະກິດທຳມະຊາດໄປສູ່ການຜະລິດເປັນສິນຄ້າໃນຂົງເຂດກະສິກຳ-ປ່າໄມ້, ອຸດສາຫະກຳຂະໜາດນ້ອຍ, ຫັດຖະກຳ ແລະບໍລິການໃນຊົນນະບົດໃຫ້ມີການຂະຫຍາຍຕົວ ສາມາດຫຼຸດພົ້ນອອກຈາກຄວາມທຸກຍາກລົງເທື່ອລະກ້າວ.
ທ່ານຜູ້ອຳນວຍການ ທນບ ເປີດເຜີຍວ່າ: ເພື່ອແກ້ໄຂຜົນກະທົບຈາກໄພນ້ຳຖ້ວມ ແລະພະຍາດລະບາດອະຫິວາໝູອາຟຼິກກາ ທີ່ສົ່ງຜົນເສຍຫາຍຢ່າງໜັກໂດຍສະເພາະແມ່ນໄພນ້ຳຖ້ວມຢູ່ 2 ແຂວງພາກກາງແລະ 4 ແຂວງພາກໃຕ້ເມື່ອຕົ້ນເດືອນກັນຍານີ້ ສົ່ງຜົນໃຫ້ຫຼາຍບ້ານໄດ້ຮັບຜົນກະທົບຢ່າງໜັກໜ່ວງຕໍ່ຊີິວິດການເປັນຢູ່ຂອງປະຊາຊົນເຂດດັ່ງກ່າວ ແລະ ຕໍ່ສະພາບທີ່ຮ້າຍແຮງນີ້ ແລະ ທີ່ຜ່ານການສັງລວມຂໍ້ມູນໃນເບື້ອງຕົ້ນມີຜົນເສຍຫາຍ ກວມເອົາ 24 ເມືອງ, 220 ບ້ານ,
13.854 ຄອບຄົວ ມີຍອດສິນເຊື່ອທີ່ຖືກຜົນກະທົບ 202,67 ຕື້ກີບພາຍຫຼັງນ້ຳແຫ້ງເປັນປົກກະຕິທນບຈະໄດ້ເກັບກຳຂໍ້ມູນຕົວຈິງ
ເພື່ອມີນະໂຍບາຍທີ່ເໝາະສົມສຳລັບຜູ້ກູ້ຢືມເງິນທີ່ໄດ້ຮັບຜົນກະທົບໄພໃນຄັ້ງນີ້.
ສໍາລັບຜົນກະທົບຈາກການລະບາດຂອງພະຍາດອະຫິວາໝູອາຟຣິກາ ໃນໄລຍະຜ່ານມາທີ່ເກີດຂຶ້ນຢູ່ຫຼາຍພື້ນທີ່ເປັນເຫດໃຫ້ກະທົບຕໍ່ລູກຄ້າຜູ້ກູ້ຢືມເງິນເພື່ອເປົ້າໝາຍລ້ຽງໝູ ຄື: ກວມເອົາ 6 ເມືອງ, 42 ບ້ານ, 207 ກຸ່ມ, 1.174 ຄອບຄົວ, ມູນຄ່າທີ່ຖືກຜົນກະທົບທັງໝົດຫຼາຍກວ່າ 10 ຕື້ກີບ.
ຕໍ່ການແກ້ໄຂ 2 ເຫດການດັ່ງກ່າວ; ທ່ານຜູ້ອຳນວຍການ ເວົ້າວ່າ, ຈະກວດກາລະອຽດຕື່ມ ພາຍຫຼັງນ້ຳບົກແຫ້ງ ໂດຍພວກເຮົາຈະປະຕິບັດຕາມທິດຊີ້ນໍາຂອງຄະນະພັກ-ຄະນະນໍາທະນາຄານແຫ່ງ ສປປ ລາວ ກໍ່ຄືລະບຽບການຂອງ ທນບ ເປັນຕົ້ນ ຈະປະຕິບັດໃນການເລື່ອນການຊໍາລະເງິນກູ້ໃຫ້ຜູ້ທີ່ກູ້ເງິນຈາກ ທນບ ທີ່ເກີດໄພພິບັດ ຕົວຢ່າງ ກູ້ຢືມປີໜຶ່ງ ພວກເຮົາຈະເລື່ອນເປັນ 2 ປີ, ກູ້ 3 ປີ ຈະເລື່ອນເປັນ 5 ປີ, ຖ້າກູ້ 5 ປີ ກໍຈະເລື່ອນເປັນ 7 ປີ ອັນນີ້ ກໍ່ຂຶ້ນກັບຜົນເສຍຫາຍໜ້ອຍ-ຫຼາຍປານໃດ; ພ້ອມກັນນັ້ນຈະມີນະໂຍບາຍໃນການຜ່ອນຜັນ, ຍົກເວັ້ນດອກເບ້ຍປັບໃໝ ແລະນອກຈາກນັ້ນ ຜູ້ທີ່ມີຈຸດປະສົງຕ້ອງການທຶນໃນການຜະລິດທົດແທນ ພວກເຮົາກໍ່ມີນະໂຍບາຍໃນການສ້າງແຜນສິນເຊື່ອໃຫ້ເຂົາເຈົ້າ, ໂດຍສະເພາະການປູກພືດທົດແທນ ຫຼື ການລ້ຽງສັດອື່ນໆແມ່ນຂຶ້ນກັບທ່າແຮງຂອງແຕ່ລະຄອບຄົວ ສັງລວມມີນະໂຍບາຍ 1. ຜ່ອນການຊໍາລະ, 2. ມີນະໂຍບາຍສະໜອງທຶນເພີ່ມຕື່ມຕໍ່ປະຊາຊົນເຮົາທີ່ໄດ້ຮັບກະທົບໂຕຈິງຍ້ອນໄພທຳມະຊາດ ແລະ ພະຍາດລະບາດດັ່ງກ່າວຕາມຄວາມເໝາະສົມ
