ທ່ານນາຍົກລັດຖະມົນຕີຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມ
ແລງວັນທີ 17 ກັນຍານີ້ ທີ່ສຳນັກງານນາຍົກລັດຖະມົນຕີ (ສນຍ),
ທ່ານ ທອງລຸນ ສີສຸລິດ,
ນາຍົກລັດຖະມົນຕີ
ໄດ້ຕາງໜ້າລັດຖະບານ ຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມ ຈາກ
ເຂດເສດຖະກິດພິເສດສາມຫຼ່ຽມຄຳຈຳນວນ 3 ຕື້ກີບ, ມອບໂດຍທ່ານ ຈ້າວ ເຫວີຍ, ປະທານສະພາບໍລິຫານເຂດ; ທະນາຄານ ICBC ມອບເງິນ 180.000 ໂດລາ, ໂດຍທ່ານ ຊຸ່ນ ເຟີງເລ (MR. Sun Fenglei), ຜູ້ອຳນວຍການທະນາຄານ ICBC ສາຂານະຄອນຫຼວງວຽງຈັນ; ບໍລິສັດ ໄຟຟ້ານໍ້າເທີນ 2 ມີຈຳນວນເງິນ 1 ຕື້ກີບ, ກ່າວມອບໂດຍທ່ານ ໂຟລ້ອງ ເປໂລ້ (MR.
Florent Perrot), ຮອງອຳນວຍການ
ບໍລິສັດ ໄຟຟ້າດັ່ງກ່າວ.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ແຈ້ງສະພາບຜົນກະທົບຈາກໄພນໍ້າຖ້ວມ ໃນປີນີ້ ແມ່ນໜັກໜ່ວງ ແລະ ກວມເອົາພື້ນທີ່ກວ້າງຂວາງ, ສ້າງຄວາມເສຍຫາຍ ຕໍ່ຊີວິດ ແລະ ຊັບສິນ ຂອງປະຊາຊົນ ເປັນຈຳນວນຫຼວງຫຼາຍ, ຊຶ່ງລັດຖະບານ ກໍ່ຄືບັນດາຂະແໜງການ, ທ້ອງຖິ່ນ ແລະ ພາກສ່ວນຕ່າງໆ ໃນທົ່ວສັງຄົມ ໄດ້ສຸມໃສ່ ໃຫ້ການຊ່ວຍເຫຼືອ ແກ່ປະຊາຊົນ ຜູ້ປະສົບໄພດັ່ງກ່າວ ພ້ອມກັນນັ້ນ ທ່ານ ນາຍົກລັດຖະມົນຕີ ກໍໄດ້ສະແດງຄວາມຂອບໃຈ ຕໍ່ການ ເພື່ອຊ່ວຍເຫຼືອຂອງສາມພາກສ່ວນ, ຊຶ່ງຈະເປັນສ່ວນປະກອບສຳຄັນໃຫ້ປະຊາຊົນຜູ້ປະສົບໄພຮ້າຍແຮງຄັ້ງນີ້ມີກຳລັງໃຈ, ແກ້ໄຂຜົນກະທົບ ແລະ ຟື້ນຟູຊີວິດການເປັນຢູ່ຂອງຕົນໃຫ້ກັບຄືນສູ່ສະພາບປົກກະຕິໂດຍໄວ. ລັດຖະບານ ຈະນຳເອົາເງິນຈຳນວນດັ່ງກ່າວ ມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫຼືອບັນເທົາທຸກ ແກ່ຜູ້ປະສົບໄພຢູ່ທ້ອງຖິ່ນຕ່າງໆໃຫ້ທ່ວງທັນເວລາ.
