ປະທານຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ເນັ້ນໃຫ້ທຸກພາກສ່ວນເອົາໃຈໃສ່ຊ່ວຍເຫລືອຜູ້ປະສົບໄພນໍ້າຖ້ວມຢູ່ 6 ແຂວງພາກກາງ ແລະ ພາກໃຕ້
ໃນວັນທີ 10 ກັນຍານີ້, ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ທັງເປັນປະທານຄະນະກໍາມະການປ້ອງການ ແລະ ຄວບຄຸມໄພພິບັດແຫ່ງຊາດ ໄດ້ຖະແຫລງຂ່າວ ຕໍ່ສື່ມວນຊົນວ່າ: ຕໍ່ກັບສະພາບຜົນກະທົບ ແລະ ຄວາມເສຍຫາຍທີ່ເກີດຂຶ້ນຈາກໄພນໍ້າຖ້ວມໃນຄັ້ງນີ້, ອໍານາດການປົກຄອງ ແລະ ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ປະຕິບັດການຊ່ວຍເຫລືອສຸກເສີນທັນທີ ແລະ ຮີບດ່ວນໂດຍໄດ້ນໍາໃຊ້ກໍາລັງແຮງຂອງພະນັກງານ, ທະຫານ, ຕໍາຫລວດ ແລະ ມວນຊົນຊ່ວຍຍົກຍ້າຍຄົນ ແລະ ຊັບສິນ ໄປບ່ອນປອດໄພແລ້ວ, ພ້ອມເລັ່ງຈັດສັນສະຖານທີ່ພັກເຊົ່າຊົ່ວຄາວ ແລະ ສະໜອງບັນເທົາທຸກສຸກເສີນຂັ້ນພື້ນຖານດ້ານເຄື່ອງອຸປະໂພກ-ບໍລິໂພກ, ເປັນຕົ້ນແມ່ນອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ ແລະ ອື່ນໆ ເພື່ອຮັບປະກັນໃຫ້ການແກ້ໄຂສຸກເສີນໄດ້ທັນການ ແລະ ມີປະສິດທິພາບ.
ສະເພາະຄະນະກໍາມະການປ້ອງກັນ ແລະ
ຄວບຄຸມໄພພິບັດແຫ່ງຊາດ, ກໍໄດ້ປະສານງານຢ່າງໃກ້ສິດກັບບັນດາແຂວງທີ່ຖືກກະທົບຈາກໄພພິບັດ
ພ້ອມທັງໄດ້ປະຕິບັດໃຫ້ການຊ່ວຍເຫລືອບັນເທົາທຸກສຸກເສີນ ໂດຍສົມທົບກັບກອງທັບນໍາໃຊ້ລົດ ແລະ ຍົນ ເພື່ອຈັດສົ່ງພາຫະນະ, ອຸປະ ກອນ ແລະ ເຄື່ອງ
ບັນເທົາທຸກສຸກເສີນໄປຊ່ວຍເຫລືອປະຊາຊົນທີ່ຖືກກະທົບຢູ່ບັນດາແຂວງດັ່ງກ່າວຄື: ເຮືອກູ້ໄພ ຈໍານວນ 39 ລໍາ, ເພື່ອນໍາໃຊ້ເຂົ້າໃນການກູ້ໄພ ແລະ
ຍົກຍ້າຍປະຊາຊົນ ພ້ອມທັງສັບສິນຂອງເຂົາເຈົ້າໄປຢູ່ບ່ອນປອດໄພ, ເຕັ້ນນອນຄອບຄົວ 120 ຊຸດ, ນໍ້າດື່ມ 3 ພັນກວ່າແພັກ, ເຄື່ອງໃຊ້ຄົວເຮືອນ 300 ກວ່າຊຸດ ພ້ອມໄດ້ນໍາໃຊ້ເງິນທີ່ລັດຖະບານຈັດສັນໃຫ້ຈໍານວນ
5 ຕື້ກີບ ນໍາໄປຊ່ວຍເຫລືອໄດ້ຢ່າງທັນເຫດການພ້ອມທັງມອບເງິນໃນບ້ວງກອງທຶນແຮນໍ້າມັນສຸກເສີນໃຫ້ແຂວງລະ 50 ລ້ານກີບ, ເພື່ອນໍາໃຊ້ເຂົ້າໃນການບໍລິຫານຂົນສົ່ງເຄື່ອງຊ່ວຍເຫລືອບັນເທົາທຸກໄປໃຫ້ຜູ້ປະສົບໄດ້ທົ່ວເຖິງ.
ພ້ອມນີ້, ກະຊວງແຮງງານ ແລະ ສະຫວັດດີການສັງຄົມ ກໍໄດ້ອອກແຈ້ງການລະດົມການບໍລິຈາກຂອງສັງຄົມຜ່ານສື່ມວນຊົນ, ເຊິ່ງໄດ້ເລີ່ມປະຕິບັດມາແຕ່ວັນທີ
7 ກັນຍານີ້ ແລະ ໄດ້ມີຫລາຍພາກສ່ວນເຂົ້າມາໃຫ້ການຊ່ວຍເຫລືອທັງເປັນເງິນ ແລະ ເຄື່ອງອຸປະໂພກ-ບໍລິໂພກຕ່າງໆ,
ປັດຈຸບັນໄດ້ຂົນສົ່ງເຄື່ອງດັ່ງກ່າວລວມມູນຄ່າ 1 ຕື້ກີບ,
ໄປຊ່ວຍເຫລືອຜູ້ປະສົບໄພພິບັດໃນບັນດາແຂວງດັ່ງກ່າວແລ້ວຄື: ໃນວັນທີ
11 ກັນຍານີ້ ໂດຍການປະສານສົມທົບຂອງກະຊວງ ຮສສ, ກໍຈະມີເຄື່ອງຊ່ວຍເຫລືອບັນເທົາທຸກສຸກເສີນຈາກສູນປະສານງານຊ່ວຍເຫລືອດ້ານມະນຸດສະທໍາອາຊຽນ
ຫລື ສູນອາຮາ ຈະຂົນສົ່ງເຄື່ອງມາດ້ວຍຍົນລົງສະໜາມບິນສາກົນປາກເຊ ເພື່ອນໍາຊ່ວຍເຫລືອຜູ້ປະສົບຕື່ມອີກ. ສ່ວນບັນດາຂະແໜງການ
ອື່ນໆໃນຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ກໍໄດ້ມີແຜນ ແລະ
ດໍາເດີນໃຫ້ການຊ່ວຍເຫລືອຢູ່ແຕ່ລະແຂວງທີ່ຖືກກະທົບດັ່ງກ່າວຢ່າງເປັນຂະບວນກວ້າງຂວາງ.
ໃນໂອກາດນີ້, ທ່ານລັດຖະມົນຕີ ຍັງໄດ້ຮຽກຮ້ອງໃຫ້ທຸກພາກສ່ວນ ເອົາໃຈໃສ່, ສືບຕໍ່ຕິດຕາມພະຍາກອນອາກາດ ແລະ ແຈ້ງຂ່າວເຕືອນໄພລ່ວງໜ້າໃຫ້ທັນເວລາ ແລະ ນໍາໃຊ້ເຄື່ອງມືທີ່ມີຢູ່, ສືບຕໍ່ປະສານໃຫ້ການຊ່ວຍເຫລືອສຸກເສີນ ແລະ ຟື້ນຟູຮີບດ່ວນ ລວມທັງການສົ່ງທີມປະເມີນສຸກເສີນ ເພື່ອເຮັດການປະເມີນຄວາມເສຍຫາຍ ແລະ ຄວາມຕ້ອງການສ້າງແຜນຊ່ວຍເຫລືອ ແລະ ຟື້ນຟູຄືນຫລັງໄພພິບັດ, ເລັ່ງສືບຕໍ່ປົວແປງສິ່ງອໍານວຍຄວາມສະດວກຕ່າງໆ ເປັນຕົ້ນແມ່ນເສັ້ນທາງ, ຂົວ, ໄຟຟ້າ, ນໍ້າປະປາ, ແຫລ່ງນໍ້າກິນ ນໍ້າໃຊ້, ໂຮງຮຽນ, ໂຮງໝໍ, ສຸກສາລາ, ອື່ນໆ, ຮັບປະກັນໃຫ້ຜູ້ປະສົບໄພພິບັດ ທີ່ອາໃສຢູ່ສູນພັກຊົວຄາວໄດ້ເຂົ້າເຖິງປັດໃຈອາຫານ, ນໍ້າດື່ມ, ການຢູ່ກິນທີ່ປອດໄພ, ສຸຂະອານາໄມ, ບັນຫາສຸຂະພາບ ແລະ ອື່ນໆ, ສືບຕໍ່ນໍາໃຊ້ກໍາລັງແຮງຂອງກອງທັບ, ຕໍາຫລວດ, ຊ່າວໜຸ່ມ, ແມ່ຍິງ, ກາແດງ, ອາສາສະໝັກ ເພື່ອປະຕິບັດໃຫ້ການຊ່ວຍເຫລືອສຸກເສີນ ແລະ ຟື້ນຟູຫລັງໄພພິບັດ, ສະເໜີຂໍນໍາໃຊ້ເຂົ້າສານໃນຂອບໂຄງການອາຊຽນບວກສາມ, ລວມທັງເຂົ້າໃນຄັງສະສົມຂອງກະຊວງການເງິນ ສະເໜີໃຫ້ປະສານກັນລະອຽດ ລວມທັງການມອບໂອນໂຄງການຄັງແຮເຂົ້າ ລະຫວ່າງກະຊວງການເງິນ ໃຫ້ ກະຊວງ ຮສສ ເພື່ອຊ່ວຍເຫລືອຟື້ນຟູຊີວິດການເປັນຢູ່ຂອງຜູ້ປະສົບໄພຄັ້ງຮ້າຍແຮງນີ້ໃຫ້ກັບສູ່ສະ ພາບປົກກະຕິໂດຍໄວ.
