ຮອງນາຍົກເນັ້ນການເງິນອຸດົມໄຊ ສູ້ຊົນເກັບລາຍຮັບໃຫ້ໄດ້ຕາມແຜນ

ໃນໂອກາດເດີນທາງໄປຢ້ຽມຍາມ ແລະ ເຄື່ອນໄຫວເຮັດວຽກ ຢູ່ແຂວງອຸດົມໄຊ ໃນວັນທີ 4 ກັນຍາ 2019 ທີ່ຜ່ານມາ, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ພົບປະໂອ້ລົມ ແລະ ເນັ້ນໃຫ້ຄະນະພັກ, ຄະນະນຳຂອງຂະແໜງການເງິນ ຕະຫລອດຮອດພະນັກງານທຸກຂັ້ນ ແຂວງອຸ ດົມໄຊ, ພ້ອມກັນເອົາໃຈໃສ່ຕໍ່ໜ້າທີ່ວຽກງານທີ່ວຽກງານວິຊາສະເພາະ ໃຫ້ມີຜົນສໍາເລັດ, ເພີ່ມທະວີຄວາມຮັບຜິດຊອບ, ປຸກລະດົມຊຸກຍູ້ການຜະລິດພາຍໃນໃຫ້ຫລາຍຂຶ້ນ, ທີ່ສຳຄັນເອົາໃຈໃສ່ຂຸ້ນຂ້ຽວໃນການຈັດຕັ້ງປະຕິບັດລາຍຮັບເຂົ້າງົບປະມານແຫ່ງລັດ ໃຫ້ບັນລຸຕາມແຜນ ການທີ່ໄດ້ຮັບມອບໝາຍຈໍານວນ 129 ຕື້ກວ່າກີບ.

ແນວໃດກໍຕາມ ເຖິງແມ່ນວ່າສະພາບເສດຖະກິດຝືດເຄື່ອງ, ສະພາບການເງິນມີຄວາມຫຍຸ້ງ ຍາກ, ແຕ່ດ້ວຍຄວາມຮັບຜິດຊອບ, ຄະນະພັກ ຄະນະນໍາ, ພ້ອມດ້ວຍພະນັກງານ-ລັດຖະກອນທຸກຂັ້ນຕ້ອງເພີ່ມທະວີສຸມໃສ່ຈັດຕັ້ງປະຕິບັດໜ້າທີ່ວຽກງານ ໃນການຈັດເກັບລາຍຮັບຂອງແຕ່ລະຂະແໜງໃຫ້ໄດ້ຕາມແຜນການທີ່ວາງໄວ້. ພ້ອມດຽວກັນນີ້, ຕ້ອງເພີ່ມຄວາມຮັບຜິດຊອບ, ເອົາໃຈໃສ່ປະຢັດມັດທະ ຍັດ, ປຸກລະດົມຊຸກຍູ້ການຜະລິດພາຍໃນ, ຫັນມານຳໃຊ້ ແລະ ສົ່ງເສີມຜະລິດຕະພັນພາຍໃນໃຫ້ຫລາຍຂຶ້ນ ເພື່ອທົດແທນການນໍາເຂົ້າ, ຫັນວຽກງານການເກັບລາຍຮັບໄປສູ່ລະບົບທີ່ທັນສະໄໝ, ຍົກລະດັບຄວາມຮູ້ຄວາມສາມາດຂອງພະນັກງານ, ເພີ່ມຄວາມຮັບຜິດຊອບໃຫ້ສູງຂຶ້ນໃນການເຮັດວຽກງານໃຫ້ມີປະສິດທິພາບ ແລະ ໄດ້ຜົນສໍາເລັດດ້ວຍດີ.

ຈາກນັ້ນ, ໄດ້ຮັບຟັງການລາຍງານ ຂອງທ່ານ ສຸລິຍາ ສຸພິທັກ ຮອງຫົວໜ້າພະແນກການເງິນແຂວງອຸດົມໄຊ ໃຫ້ຮູ້ວ່າ: ຄະນະນຳ, ພະແນກການເງິນ ແລະ ສາມຂະແໜງສາຍຕັ້ງ ຖືສຳຄັນວຽກ​ງານ​ການເມືອງແນວ​ຄິດ​ໃຫ້​ແກ່​ພະນັກງານ-ລັດຖະກອນ, ໂດຍ​ການ​ນໍາ​ເອົາລະບຽບ, ກົດໝາຍ, ມະຕິ,ຄໍາສັ່ງແຜນ​ພັດທະນາ​ເສດຖະກິດ-ສັງຄົມ​ ແລະ ແຜນງົບປະມານແຫ່ງລັດ​ຫັນ​ເປັນ​ແຜນການ​ລະອຽດເພື່ອ​ຊີ້​​ຈັດ​ຕັ້ງ​ປະຕິບັດດ້ວຍຄວາມຮັບຜິດຊອບສູງ​. ໃນໄລຍະ 8 ເດືອນຜ່ານມາ ໄດ້ເອົາໃຈໃສ່ຊີ້ນໍາ-ນໍາພາຢ່າງໃກ້ສິດ,ໃນການຄຸ້ມຄອງ ແລະ ຈັດຕັ້ງປະຕິບັດແຜນງົບປະມານ ກໍຄື 12 ມາດຕະການດ້ານລາຍຮັບ, 7 ມາດຕະການດ້ານລາຍຈ່າຍ ເຮັດໃຫ້ການຈັດຕັ້ງຜັນຂະຫຍາຍ ບັນດາວຽກງານຂອງຂະແໜງການເງິນເປັນຮູບປະທໍາ ແລະ ບັນລຸຕາມເປົ້າໝາຍດີສົມຄວນ. ສຳລັບຕົວເລກແຜນການຈັດເກັບລາຍຮັບ ໃນປີ 2019 ຈໍານວນ 129 ຕື້ກວ່າກີບນັ້ນ, ໄລຍະ 8 ເດືອນຜ່ານມາ ລວມທັງພູດສູນກາງ ແລະ ທ້ອງຖິ່ນປະຕິບັດໄດ້ 80 ຕື້ກວ່າກີບ, ທຽບໃສ່ແຜນການປີເທົ່າກັບ 62,08%.