ພາຍໃນຂາດທຶນ ຍ້ອນຝ່າຝືນນຳເຂົ້າ
ໂດຍ: ມຶກບໍ່ແຫ້ງ
ການສົ່ງເສີມ ການຜະລິການຄ້າພາຍໃນປະເທດແມ່ນບູລິມະສິດໜຶ່ງຂອງລັດຖະບານແຕ່ເຖິງປານນັ້ນຜູ້ປະກອບການພາຍໃນຫຼາຍຂະແໜງການຍັງພົບອຸປະສັກໃນການດຳເນີນທຸລະກິດດ້ວຍຫຼາຍປັດໄຈໜຶ່ງໃນນັ້ນກໍແມ່ນການລັກລອບນຳເຂົ້າສິນຄ້າທີ່ຜິດກົດໝາຍນັ້ນເອງ.
ພວກເຮົາມີນະໂຍບາຍສົ່ງເສີມການຜະລິດສິນຄ້າພາຍໃນແຕ່ການສົ່ງເສີມການຂາຍພາຍໃນພັດຍັງເຮັດບໍ່ທັນໄດ້ດີເທົ່າທີ່ຄວນ. ສິ່ງນີ້ ກໍຍ້ອນວ່າການລັກລອບນຳເຂົ້າສິນຄ້າທີ່ຜິດກົດໝາຍນັ້ນຍັງມີຢ່າງຫຼວງຫຼາຍມີທັງເຄື່ອງບໍລິໂພກ ແລະ ອຸປະໂພກເຮັດໃຫ້ ການຜະລິດພາຍໃນບໍ່ສາມາດແຂ່ງຂັນໄດ້ເທົ່າທີ່ຄວນ.
ພືດຜັກ, ໝາກໄມ້ ແລະຜະລິດຕະພັນຊີ້ນທີ່ນຳເຂົ້າຢ່າງຜິດກົດໝາຍຈາກປະເທດອ້ອມຂ້າງເຮັດໃຫ້ ສິນຄ້າທີ່ຜະລິດພາຍໃນປະເທດບໍ່ສາມາດຂາຍໄດ້ ດ້ວຍລາຄາທີ່ເໝາະສົມ, ເພາະສະນັ້ນຈຶ່ງເຮັດໃຫ້ ການຈຳໜ່າຍຂອງປະຊາຊົນຜູ້ທີ່ມີຄວາມຸ່ງໝັ້ນໃນການຜະລິດນັ້ນບໍ່ໄດ້ດີເທົ່າທີ່ຄວນ.
ນອກນັ້ນ, ການຫຼັ່ງໄຫຼແລະເຂົ້າມາປະເທດເຮົາເພື່ອປະກອບອາຊີບທີ່ສະຫງວນໄວ້ໃຫ້ຄົນລາວນັ້ນກໍເປັນຮູບແບບໜຶ່ງທີ່ເຮັດໃຫ້ ຄົນລາວຂາດໂອາກາດ ໃນການປະກອບອາຊີບແລະຈຳໜ່າຍສິນຄ້າເຂົາເຈົ້າ.
ຜູ້ຂຽນໄດ້ລົມນຳປະຊາຊົນລ້ຽງປານິນຕາມແຄມນ້ຳງຶ່ມນັ້ນເຂົາເຈົ້າເວົ້າສູ່ຟັງວ່າໃນປັດຈຸບັນມີຄົນຕ່າງປະເທດເຂົ້າມາປະກອບອາຊີບໃນ ສປປລາວໂດຍສະເພາະຊາວຈີນທີ່ປະກອບອາຊີບລ້ຽງປາຄືກັນແຕ່ ບໍ່ແນ່ໃຈວ່າເຂົາເຈົ້າເອົາຫຍັງເກືອປາທີ່ເຂົາເຈົ້າລ້ຽງຈຶ່່ງໃຫຍ່ໄວ ແລະ ສາມາດຂາຍໄດ້ລາຄາຖືກກວ່າປາຂອງຄົນລາວລ້ຽງ.
ເພາະສະນັ້ນ, ປາຂອງຄົນລາວຈຶ່ງບໍ່ສາມາດຂາຍໄດ້ດີເທົ່າປາຂອງຄົນຈີນທີ່ມີລາຄາຖືກກວ່າແຕ່ກໍຍັງສົງໄສຢູ່ວ່າເຂົາເຈົ້າເອົາຫຍັງເກືອເພາະກະໂຕຄົນລ້ຽງເອງກໍບໍ່ກິນແຕ່ເອົາໄປຂາຍໃຫ້ປະຊາຊົນລາວກິນອັນນີ້ ກໍຕ້ອງໄດ້ມີການກວດສອບຕຶ່ມອີກ.
ດັ່ງທ່ານດາວວອນ ພະຈັນທະວົງງປະທານສະພາການຄ້າແລະອຸດສາຫະກຳແຫ່ງຊາດໄດ້ໃຫ້ສຳພາດຕໍ່ໜັງສືພິມວຽງຈັນທາມ ເມື່ອທ້າຍເດືອນສິງຫາຜ່ານມາວ່າບໍລິສັດຮ້າງຮ້ານຂອງລາວນັ້ນສູນເສຍທຸລະກິດເຂົາເຈົ້າຍ້ອນບໍ່ສາມາດແຂ່ງຂັນໄດ້ ເມື່ອມີຄູ່ແຂ່ງທີ່ນຳສິນຄ້າຈາກຕ່າງປະເທດ ທີ່ຜິດກົດໝາຍ.
ແນ່ນອນການນຳເຂົ້າສິນຄ້າທີ່ຜິດກົດໝາຍອາດບໍ່ສາມາດເກີດຂຶ້ນໄດ້ ຫຼືມີໜ້ອຍກວ່ານີ້ ຖ້າການບັງຄັບໃຊ້ ກົດໝາຍແລະນິຕິກຳທີ່ກ່ຽວຂ້ອງຢ່າງເຄັ່ງຂັດ. ສິ່ງດັ່ງກ່າວກໍ ອາດມາຈາກການສວຍໃຊ້ໂອກາດຂອງເຈົ້າໜ້າທີ່ ທີ່ກ່ຽວຂ້ອງໃນການຊອກຜົນປະໂຫຍດແກ່ຕົນເອງແລະພັກພວກເຊິ່ງກໍໃຫ້ເກີດຜົນເສຍຫາຍໂດຍລວມຕໍ່ປະເທດ
ສິ່ງດັ່ງກ່າວກໍຕ້ອງໄດ້ຮັບການແກ້ໄຂຢ່າງເຄັ່ງຮ້ອນຖ້າຫາກຢາກໃຫ້ ຜູ້ຜະລິດໄດ້ຂາຍສິນຄ້າ, ທຸລະກິດເດີນໜ້າແລະຜູ້ບໍລິໂພກກໍສາມາດຊົມໃຊ້ສິນຄ້າພາຍໃນ ດ້ວຍລາຄາ ແລະຄຸນນະພາບທີ່ສົມເຫດສົມຜົນ.
