ຮ້ານດອກຮັກ ເວດດິງ ເນລິມິດທຸກງານແຕ່ງໃນຝັນໃຫ້ເປັນຈິງ
ກິດຈະການຕົກແຕ່ງໜ້າເວທີ ແລະ ການປະດັບປະດາສະຖານທີ່ຈັດງານຕ່າງໆ ເປັນໜຶ່ງໃນວຽກງານບໍລິການສັງຄົມ ທີ່ພວມເບັ່ງບານ ແລະ ໄດ້ຮັບຄວາມນິຍົມຊອມຊອບເປັນຢ່າງດີ ແລະ ມີຫລາກຫລາຍຫ້າງຮ້ານທີ່ໃຫ້ບໍລິການດັ່ງກ່າວໂດຍຜູ້ໃຊ້ບໍລິການສາມາດເລືອກຫາໄດ້ ແຕ່ຢູ່ຄຽງຄູ່ກັນນັ້ນທ່ານຮູ້ບໍ່ວ່າ “ຮ້ານດອກຮັກ” ເປັນໜຶ່ງໃນການໃຫ້ບໍລິການຈັດງານແຕ່ງງານໝັ້ນ ຫລື ເວທີຕ່າງໆທາງສັງຄົມທີ່ມີຄວາມອະລັງການຢ່າງ ສະດຸດຕາ ຕິດອົກຕິດໃຈຜູ້ເຂົ້າຮ່ວມງານ ເຊິ່ງຫລາຍຄົນ ຈົນຕ້ອງອຸທານໃນໃຈວ່າ “ນີ້ແມ່ນສະຫວັນ ຫລື ໃນເມືອງຄົນກັນແທ້” ເພາະພາບທີ່ຢູ່ເບື້ອງໜ້ານັ້ນເຕັມໄປດ້ວຍດອກໄມ້ ແລະ ແສງນິອອນທີ່ເຮັດໃຫ້ທ່ານເພີດເພີນໄປກັບບັນຍາກາດດັ່ງກ່າວ.
ດັ່ງທ່ານນາງ ອາລິສາ ມາໄລເພັດ (ນົກ ດອກຮັກ) ເຈົ້າຂອງຮ້ານ ດອກຮັກ ເວດດິງ ໃຫ້ຮູ້ວ່າ: ເມື່ອກ່ອນ ເປັນພະນັກງານອົງການຂອງລັດດ້ານວັດທະນະທຳທີ່ໄດ້ຕິດພັນກັບວຽກງານປະດັບປະດາ ແລະ ປະກອບກັບຄວາມມັກຮັກໃນສີສັນຂອງດອກໄມ້ ແລະ ວຽກງານການປະດັບປະດາທີ່ມີແລ້ວ ແຕ່ບໍ່ຄິດວ່າຈະຖືເອົາເປັນອາຊີບ ພຽງແຕ່ຮັບງານທົ່ວໄປທີ່ລູກຄ້າມີຄວາມຕ້ອງການ ຕໍ່ມາອີກໄລຍະໜຶ່ງໄດ້ມີໂອກາດໄປຮ່ວມງານຝຶກອົບຮົມສຳລັບງານປະດັບປະດາເລີຍເຮັດໃຫ້ຕົນເອງໄດ້ພັດທະນາສີມື ແລະ ຮຽນຮູ້ສີສັນຂອງດອກໄມ້ນານາຊະນິດ ຕື່ມອີກ ແລະ ເມື່ອສ້າງຜົນງານອອກມາກໍໜ້າພາກພູມໃຈ ແລະມີຄວາມສຸກກັບຮອຍຍິ້ມ, ຄຳຊົມ, ການຕຳໜິ ແລະ ຄຳແນະນຳ ຂອງຜູ້ເຂົ້າຮ່ວມງານຕ່າງໆ ເຊິ່ງມັນໄດ້ເປັນກຳລັງໃຈໃນການສ້າງສີສັນຂອງງານຕົກແຕ່ງນີ້ຂຶ້ນຕື່ມອີກ ເຮັດໃຫ້ຕົນໄດ້ມອງເຫັນຄວາມສຳຄັນ ແລະ ໂອກາດອັນດີຂອງວຽກງານດັ່ງກ່າວນີ້ ຈຶ່ງໄດ້ຕັດສິນໃຈອອກມາປະກອບກິດຈະການຢ່າງເອົາຈິງເອົາຈັງຕັ້ງແຕ່ປີ 2006 ເປັນຕົ້ນມາ ແລະ ກາຍມາເປັນ ດອກຮັກ ເວດດິງ ຈົນເຖິງປັດຈຸບັນ.
ຕະຫລອດໄລຍະ 13 ປີ ທີ່ໄດ້ປະກອບທຸລະກິດ ດັ່ງກ່າວນີ້ຕົນເອງກໍໄດ້ສ້າງທີມງານຂຶ້ນມາເຊິ່ງລ້ວນແຕ່ມີອຸດົມການ ແລະ ມີໃຈມັກຮັກຄວາມຫລູຫລານີ້ເຊັ່ນດຽວກັນ ຈຶ່ງພ້ອມກັນສຸມໃສ່ເກັບກ່ຽວປະສົບການຈາກຜົນງານທີ່ເຮັດ, ຈາກຄຳຕຳໜິ, ຄຳຍ້ອງຍໍໃຫ້ກຳລັງໃຈ ແລະ ກໍໄດ້ພັດທະນາຄວາມຮູ້, ທັງສຶກສານຳຕ່າງປະເທດ ເພື່ອໃຫ້ມີຄວາມທັນສະໄໝ ແລະ ເປັນທີ່ຍອມຮັບຂອງສັງຄົມມາໂດຍຕະຫລອດ ເປັນຕົ້ນແມ່ນ ສາມາດຕອບສະໜອງຄວາມຕ້ອງການຂອງລູກຄ້າບໍ່ວ່າຈະເປັນຮູບແບບຂອງງານ, ດອກໄມ້, ສີສັນ ແລະ ຄວາມເໝາະສົມທາງດ້ານງົບປະມານ.
ງານແຕ່ງງານດອງຕ່າງໆແມ່ນຕ້ອງໄດ້ມີການຈັບຈອງລ່ວງໜ້າຢ່າງໜ້ອຍ 3 ເດືອນ ທັງນີ້ກໍເພື່ອຈະໄດ້ມີການກະກຽມ ເຊັ່ນ: ການອອກແບບໂທນສີຂອງງານ, ການຈັດສາກໂຄງຮ່າງຂອງງານ, ດອກໄມ້ ແລະ ດອກໄຟທີ່ໃຊ້ປະດັບ ແລະອື່ນໆໃຫ້ກົມກືນກັນ ເຊິ່ງລູກຄ້າສາມາດເລືອກເອົາຕາມແບບທີ່ທາງຮ້ານອອກແບບໃຫ້ ແລະ ຕາມລູກຄ້າຕ້ອງການ ເຊິ່ງໃນໜຶ່ງຊຸດຈະປະກອບດ້ວຍ ການແຕ່ງໜ້າ, ຈັດເວທີ, ທາງຍ່າງ, ຂອບບ່ອນຖ່າຍຮູບ, ແຕ່ງລົດ, ເຄື່ອງປະດັບ, ຊໍ່ດອກໄມ້ ແລະ ເຄັກງານແຕ່ງ. ສຳລັບງານທົ່ວໄປເຊັ່ນ: ຂຶ້ນເຮືອນໃໝ່, ງານເປີດໂຕລົດ, ງານລ້ຽງອື່ນໆ ໄວສຸດກໍຕ້ອງສາມມື້ ເພື່ອກະກຽມໃຫ້ດີທີ່ສຸດແລະ ໃຫ້ຖືກໃຈຕາມຄວາມຕ້ອງການຂອງລູກຄ້າທີ່ສຸດ.
ທ່ານກ່າວຕື່ມວ່າ:
ຮ້ານດອກຮັກ ເປັນຮ້ານທີ່ສ້າງຄວາມປະທັບໃຈໃຫ້ກັບລູກຄ້າມາເປັນຈຳນວນຫລາຍ ແລະ ເຕີບໃຫຍ່ມາຍ້ອນ ທຸກຊິ້ນຂອງງານແມ່ນໄດ້ເຮັດໃຫ້ດີທີ່ສຸດ ແລະ ຄົງໄວ້ເຊິ່ງຄວາມປັນເອກະລັກ ເຮັດໃຫ້ລູກຄ້າເພິ່ງພໍໃຈ ທັງນີ້ກໍເພາະວ່າ ຮ້ານໄດ້ເຫັນຄວາມສຳຄັນຂອງວຽກງານການບໍລິການ ແລະ ຫົວໃຈຂອງການບໍລິການກໍຄືຄວາມມີ ໃຈມັກຮັກໃນສິ່ງທີ່ເຮັດ, ເຮັດດ້ວຍຄວາມລະອຽດ, ມີຄວາມພິຖິພິຖັນ ເອົາໃຈໃສ່ທຸກຂັ້ນຕອນ ແລະ ສິ່ງສຳຄັນຄືຮູ້ຍອມຮັບໃນສິ່ງທີ່ຜິດພາດ, ຮັບເອົາຄຳຕຳໜິຕິຊົມຂອງລູກຄ້າເພື່ອເປັນບົດຮຽນໃຫ້ແກ່ການພັດທະນາສີມື ແລະ ສ້າງສັນຜົນງານໃຫ້ເປັນເລີດຢູ່ສະເໝີ ເພາະວຽກງານນີ້ເຕັມໄປດ້ວຍສິ່ງທ້າທາຍ.
ສຳລັບທ່ານທີ່ສົນໃຈ ແລະ ຕ້ອງການເນລະມິດງານແຕ່ງໃນຄວາມຝັນຂອງຕົນໃຫ້ເປັນຈິງ ກໍສາມາດຕິດຕໍ່ຫາຮ້ານດອກຮັກໄດ້ຫລາຍຊ່ອງທາງຄື: ເຟສບຸກເພຈ: ດອກຮັກ Dokhak Wedding, e-mail. Toto601.2558@gmail.com, Tel: 020 7772 2202 ຫລື ຖ້າທ່ານສະດວກ ກໍສາມາດເຂົ້າໄປພົວພັນ ທາງຮ້ານໂດຍກົງ, ສະຖານທີ່ຕັ້ງຢູ່ບ້ານໂພນຕ້ອງ ຮ່ອມ 8 ກາຍໂຮງຮຽນວົງຄຳສີໄປປະມານ 20 ແມັດ.
