ປາກເຊປະຊາຊົນຫລາຍບ້ານແຄມເຊໂດນຕ້ອງອົບພະຍົບໜີນໍ້າຖ້ວມ
ແຫລ່ງຂ່າວທ້ອງຖິ່ນ ໃຫ້ຮູ້ວ່າ: ປະຊາຊົນຫລາຍບ້ານທີ່ຢູ່ລຽບຕາມແຄມແມ່ນໍ້າເຊໂດນນະຄອນປາກເຊ ຕ້ອງໄດ້ຍົກຍ້າຍວັດຖຸສິ່ງຂອງໄປຢູ່ເຂດປອດໄພ, ຫລັງຈາກລະດັບນໍ້າດັ່ງກ່າວໄດ້ສູງຂຶ້ນເກີນລະດັບອັນຕະລາຍແລ້ວ, ພາຍຫລັງມີຝົນຕົກໜັກຢູ່ເຂດພາກກາງ ແລະ ພາກໃຕ້ໃນໄລຍະ 2-3 ວັນຜ່ານມາໄດ້ເຮັດໃຫ້ລະດັບນໍ້າໃນສາຍນໍ້າຕ່າງໆຍື່ງສູງຂຶ້ນກາຍເຂດເຕືອນໄພ ແລະ ເຂດອັນຕະລາຍ, ໂດຍສະເພາະນໍ້າເຊໂດນ, ຊຶ່ງຈຸດທີ່ມີນໍ້າຖ້ວມໜັກກວ່າໝູ່ແມ່ນເຂດບ້ານໂພນສະອາດ, ບ້ານແກ, ທ່າຫີນ, ທ່າກົກໄຮ ແລະ ບ້ານໃກ້ຄຽງອື່ນໆຂອງນະຄອນປາກເຊ ເຮືອນຊານຫລາຍຫລັງຖືກນໍ້າຖ້ວມສູງກວ່າ 1 ແມັດແລ້ວ ແລະ ຄາດວ່າຈະສູງຂຶ້ນຕື່ມອີກ, ເນື່ອງຈາກຍັງຈະມີຝົນຕົກໜັກຕື່ມອີກໃນທົ່ວປະເທດ ຍ້ອນພະຍຸໝູນເຂດຮ້ອນຈະພັດຜ່ານພາກກາງ ແລະ ພາກໃຕ້ປະເທດລາວໃນວັນທີ 3-6 ກັນຍານີ້.
ຕໍ່ສະພາບທີ່ໜ້າເປັນຫວ່ງດັ່ງກ່າວ, ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນແຂວງຈໍາປາສັກ ໄດ້ອອກແຈ້ງການເຕືອນໃຫ້ອໍານາດການປົກຄອງທ້ອງຖິ່ນ ແລະ ປະຊາຊົນທົ່ວແຂວງກຽມຮັບມືກັບສະພາບໄພທໍາມະຊາດດັ່ງກ່າວ, ໂດຍສະເພາະຄະນະກໍາມະການປ້ອງກັນ ແລະ ຄວບຄຸມໄພພິບັດແຕ່ລະເມືອງ ຕ້ອງເປັນເຈົ້າການຕິດຕາມສະພາບ ແລະ ອຸຕຸນິຍົມຕື່ມອີກ, ພ້ອມທັງກະກຽມແຜນຍົກຍ້າຍປະຊາຊົນໃນເຂດທີ່ມີຄວາມສ່ຽງໄປຢູ່ເຂດປອດໄພໂດຍໄວ.
ນາຍບ້ານໂພນສະອາດ ໃຫ້ຮູ້ວ່າ: ປັດຈຸບັນ, ອໍານາດປົກຄອງນະຄອນປາກເຊ ໄດ້ເອົາຈັກສູບນໍ້າ 5 ເຄື່ອງ, ເລັ່ງສູບນໍ້າອອກຈາກພຶ້ນທີ່ຕໍ່າເພື່ອຊ່ວຍລະບາຍນໍ້າລົງສູ່ສາຍນໍ້າເຊໂດນ, ພ້ອມທັງໃຫ້ໜ່ວຍງ່ານກ່ຽວຂ້ອງຍົກຍ້າຍກົງເຕີໄຟຟ້າອອກຈາກພື້ນທີ່ສ່ຽງອັນຕະລາຍ. ສ່ວນປະຊາຊົນພາຍໃນບ້ານສ່ວຍໃຫຍ່ແມ່ນໄດ້ອົບພະຍົບຂົນຍ້າຍວັດຖຸສິ່ງຂອງ ແລະ ສັດລ້ຽງໄປຢູ່ບ່ອນປອດໄພແລ້ວ ແລະ ປັດຈຸບັນພວກເຂົາຕ້ອງການຄວາມຊ່ວຍເຫລືອເບື້ອງຕົ້ນປະເພດເຂົ້າສານອາຫານແຫ້ງ ແລະ ນໍ້າດື່ມຕ່າງໆ.
