ລາວມີອັດຕາການຕິດເຊື້ອພະຍາດຕັບອັກເສບສູງ
ຫົວໜ້າກົມປິ່ນປົວ ແລະ ຟື້ນຟູໜ້າທີ່ການກະຊວງສາທາລະນະສຸກ ໃຫ້ຮູ້ໃນພິທີສະຫລອງວັນອັກເສບຕັບໂລກ ເມື່ອບໍ່ດົນມານີ້ວ່າ: ສປປ ລາວເຮົາ, ເປັນປະເທດທີ່ມີອັດຕາການຕິດເຊື້ອພະຍາດຕັບອັກເສບສູງ, ໂດຍສະເພາະຊະນິດ B ແລະ C. ໃນນີ້ຊະນິດ B ແມ່ນມີປະມານ 8,7% ແລະ ຊະນິດ C ແມ່ນ 0,7% ຕໍ່ 49.000 ຄົນ, ສ່ວນໃຫຍ່ແມ່ນຕິດຕໍ່ຈາກແມ່ສູ່ລູກ. ແນວໃດກໍຕາມ ອົງການອານາໄມໂລກ ຈະສູ້ຊົນລົບລ້າງພະຍາດດັ່ງກ່າວໃຫ້ໄດ້ໃນປີ 2030, ໂດຍໄດ້ກໍານົດໃຫ້ເດັກທຸກຄົນເຂົ້າຮັບວັກແຊງປ້ອງກັນພະຍາດຕັບອັກເສບຕັບ B ໃຫ້ເດັກເກີດໃໝ່ພາຍໃນ 24 ຊົ່ວໂມງຫລັງເກີດ ແລະ ອີກ 3 ຄັ້ງໃນເວລາຕໍ່ມາ.
ຫົວໜ້າກົມດັ່ງກ່າວ ໃຫ້ຮູ້ວ່າ: ຕັບອັກເສບ ແມ່ນພະຍາດທີ່ເກີດຈາກໄວຣັສທີ່ທໍາລາຍຕັບ, ເຊິ່ງເປັນບັນຫາດ້ານສຸຂະພາບທີ່ຄົນເຮົາໄດ້ເບິ່ງຂ້າມ, ເນື່ອງຈາກບາງຄັ້ງກໍບໍ່ສະແດງອາການ, ບາງຄົນຖືເຊື້ອໄດ້ຫລາຍປີໂດຍບໍ່ໄດ້ມີອາການເຈັບປ່ວຍ ຫລື ອາການສະແດງອອກ. ແນວໃດກໍຕາມ, ຖ້າບໍ່ໄດ້ຮັບການປິ່ນປົວ ເຊື້ອໄວຣັສຈະທໍາລາຍຕັບຂອງຜູ້ທີ່ຕິດເຊື້ອຢ່າງຊ້າໆ, ສ່ວນໃຫຍ່ຈະພາໃຫ້ເກີດເປັນພະຍາດມະເຮັງຕັບ.
ເຊື້ອໄວຣັສຕັບອັກເສບມີທັງໝົດ 5 ຊະນິດຄື: A, B, C, D ແລະ E ໃນນັ້ນຊະນິດ B ແລະ C ເຮັດໃຫ້ເສຍຊີວິດຫລາຍກວ່າໝູ່. ສຳລັບການຕິດຕໍ່ຂອງເຊື້ອໄວຣັດຕັບອັກເສບຊະນິດ A ແລະ E ແມ່ນ ຍ້ອນຂາດສຸຂະອະນາໄມທີ່ດີ, ກິນອາຫານ ແລະ ນ້ຳທີ່ບໍ່ສະອາດ. ສ່ວນການຕິດຕໍ່ຂອງເຊື້ອໄວຣັດຕັບຊະນິດ B ແມ່ນຜ່ານເລືອດເຊັ່ນ: ແມ່ສູ່ລູກ, ການຮັບສົ່ງເລືອດທີ່ມີເຊື້ອໄວຣັສ, ອຸປະກອນທາງການແພດບໍ່ອະເຊື້ອ ຫລື ໃຊ້ເຂັມສັກຢາຮ່ວມກັນ,ໂດຍສະເພາະກຸ່ມທີ່ໃຊ້ສານເສບຕິດ ແລະ ຊະນິດ B ສາມາດປ້ອງກັນໄດ້ໂດຍການຮັບຢາວັກຊີນທີ່ປອດໄພ. ສ່ວນຊະນິດ C ຈະຕິດຕໍ່ຜ່ານການສຳຜັດເລືອດທີ່ມີເຊື້ອ. ມີພຽງເລັກໜ້ອຍທີ່ຕິດຕໍ່ທາງເພດສຳພັນ. ປັດຈຸບັນ ຜູ້ທີ່ເປັນພະຍາດຕັບອັກເສບ C ສາມາດປິ່ນປົວໃຫ້ຫາຍຂາດໄດ້ພາຍໃນສາມເດືອນໂດຍການກິນຢາຕ້ານໄວຣັສ.
