ສ້າງຫົນທາງບໍ່ມ້າງຄວາມຊອບທຳ
ໂດຍ: ມຶກບໍ່ແຫ້ງ
ການສ້າງຖະໜົນຫົນທາງນັ້ນແມ່ນຄວາມຈຳເປັນຢ່າງຍິ່ງຕໍ່ການພັດທະ ນາປະເທດຊາດແຕ່ສິ່ງທີ່ຄວນຄຳນຶງກໍຄືຄວາມຊອບທຳທີ່ມີຕໍ່ທຳມະຊາດ ແລະສັງຄົມ.
ພວກເຮົາເຄີຍໄດ້ເຫັນແລະໄດ້ຍິນກ່ຽວກັບການສ້າງທາງຜ່ານປ່າໄມ້ດົກໜາເພື່ອຊອກຊ່ອງວ່າງໃນການເກັບກູ້ ເອົາຊັບພະຍາກອນທຳມະຊາດໄປນຳ ໂດຍສະເພາະແມ່ນໄມ້ທ່ອນ, ຈົນມີຄຳເວົ້າຕິດປາກວ່າ “ທາງມາປ່າໝົດ” ຂາດຄວາມໄວ້ເນື້ອເຊື່ອໃຈຂອງປະຊາຊົນ.
ນອກນັ້ນ, ບັນຫາການສ້າງທາງທີ່ໄດ້ຮັບຄວາມສົນໃຈຫຼາຍທີ່ສຸດກໍຄືມູນ ຄ່າການກໍ່ສ້າງທີ່ສູງເກີນຄວາມເປັນຈິງແຕ່ຄຸນນະພາບບໍ່ຄ່ອຍດີນັ້ນໄດ້ປະ ກົດໃຫ້ເຫັນໃນຫຼາຍເສັ້ນທາງທີ່ຫຼັງຈາກສ້າງແລ້ວນຳໃຊ້ບໍ່ພໍເທົ່າໃດພັດເປເພ່ ແລະບໍ່ມີງົບປະມານສ້ອມແປງຄືນອັນເຮັດໃຫ້ ການໄປມາຫຍຸ້ງຍາກຂຶ້ນຕື່ມ.
ພ້ອມນັ້ນ, ເສັ້ນທາງບາງບ່ອນການກໍ່ສ້າງກໍລ່າຊ້າໄປກວ່າກຳນົດໄວ້ ຫຼາຍເຮັດໃຫ້ ການໄປມາຂອງປະຊາຊົນມີຄວາມຫຍຸ້ງຍາກ, ສ້າງຄວາມ ເສຍຫາຍທາງດ້ານການພັດທະນາເສດຖະກິດຫຼາຍປະການ, ອັນນີ້ ກໍແມ່ນ ການຂາດຄວາມຮັບຜິດຊອບຂອງພາກສ່ວນກ່ຽວຂ້ອງ ແລະ ກໍແນ່ນອນມັນຍັງ ກ່ຽວຂ້ອງກັບຄວາມໂລບນຳອີກ.
ເມື່ອເວົ້າເຖິງການຊົດເຊີຍກໍຍິ່ງເປັນສິ່ງທີ່ຕ້ອງໄດ້ຄຳນຶງແລະກວດສອບ ຢ່າງເຄັ່ງຄັດ. ໃນກອງປະຊຸມສະໄໝສາມັນເທື່ອ 5 ຂອງສະມາຊິກສະພາ ແຫ່ງຊາດຊຸດ VIII ກະຊວງໂຍທາທິການ ແລະ ຂົນສົ່ງໄດ້ນຳສະເໜີ ລາຍລະອຽດການກໍ່ສ້າງເສັ້ນທາງດ່ວນນະຄອນຫຼວງວຽງຈັນ-ວັງວຽງ ໂດຍແມ່ນບໍລິສັດຈາກສປຈີນເປັນຜູ້ສຳປະທານ.
ສະມາຊິກສະພາແຫ່ງຊາດໄດ້ເຫັນດີເຫັນພ້ອມນຳໃນແນວທາງຂອງລັດ ຖະບານໂດຍສະເພາະການກໍ່ສ້າງພື້ນຖານໂຄງລ່າງທີ່ເຫັນວ່າມີຄວາມຈຳ ເປັນໃນການພັດທະນາເສດຖະກິດຂອງປະເທດໃນໄລຍະຍາວ, ບໍ່ວ່າຈະເປັນ ການປະຢັດເລື່ອງເວລາ, ການຂົນສົ່ງສິນຄ້າສະດວກສະບາຍແລະວ່ອງໄວ, ສາມາດຊຸກຍູ້ຂະແໜງການອື່ນໆ ຂະຫຍາຍຕົວໄປນຳ ໂດຍສະເພາະວຽກ ງານການທ່ອງທ່ຽວ.
ແຕ່ເຖິງຢ່າງໃດກໍຕາມສະມາຊິກສະພາກໍໄດ້ສະແດງຄວາມເປັນຫ່ວງ ເລື່ອງການຈ່າຍຄ່າຊົດເຊີຍແກ່ຜູ້ທີ່ໄດ້ຮັບຜົນກະທົບເຊິ່ງມີຈຳນວນຫຼາຍຮ້ອຍຄອບຄົວທີ່ຢູ່ແຂວງວຽງຈັນ ແລະ ນະຄອນຫຼວງ ເຊິ່ງຕ້ອງມີການ ກວດສອບຢ່າງລະອຽດໃນໄລຍະການກໍ່ສ້າງເພື່ອຮັບປະກັນຄວາມໂປ່ງໃສ.
ຄວາມຈິງແລ້ວລັດຖະບານກໍຄືຜູ້ພັດທະນາໂຄງການກໍ່ສ້າງທາງດ່ວນດັ່ງກ່າວກໍເຫັນໄດ້ຄວາມສຳຄັນໃນການເສຍຄ່າຊົດເຊີຍຕໍ່ປະຊາຊົນໂດຍໄດ້ວ່າຈ້າງບໍລິສັດທີ່ປຶກສາທາງດ້ານສິ່ງແວດລ້ອມ-ສັງຄົມໃນການເກັບກຳຂໍ້ມູນຜູ້ທີ່ ໄດ້ຮັບຜົນກະທົບເພື່ອການຄົ້ນຄວ້າຄິດໄລ່ ຄ່າຊົດເຊີຍຕາມຄວາມເໝາະສົມ.
ກ່ອນການກໍ່ສ້າງເສັ້ນທາງດ່ວນດັ່ງກ່າວໃນທ້າຍປີ 2018 ນັ້ນ, ວັນທີ 20 ກັນຍາ 2018 ໄດ້ມີພິທີມອບ-ຮັບຄ່າຊົດເຊີຍໃຫ້ປະຊາຊົນເຂດເມືອງ ຫີນເຫີບແຂວງວຽງຈັນເຊິ່ງມີມູນຄ່າ 11 ກວ່າຕື້ກີບເຊິ່ງໄດ້ເປັນນິມິດໝາຍອັນດີ.
ແຕ່ຢ່າງໃດກໍຕາມຍ້ອນວ່າມີປະຊາຊົນຈຳນວນຫຼາຍໄດ້ຮັບຜົນກະທົບຈາກໂຄງການເຊິ່ງໃນການຈັດຕັ້ງປະຕິບັດຕົວຈິງກໍບໍ່ແນ່ໃຈວ່າປະຊາຊົນຈະໄດ້ຮັບການຊົດເຊີຍທີ່ໜ້າຍິນດີແທ້ບໍ່ ໂດຍສະເພາະຂ່າວຄາວການຂໍຄວາມເປັນ ທຳຂອງປະຊາຊົນເຂດເມືອງນາຊາຍທອງທີ່ບໍ່ຍອມມອບໂອນເນື້ອທີ່ດິນໃຫ້ກັບໂຄງການຍ້ອນບໍ່ໄດ້ຮັບຄ່າຊົດເຊີຍທີ່ເໝາະສົມ, ຖ້າຫາກແມ່ນຄວາມຈິງ ກໍອາດແມ່ນຊ່ອງວ່າງການຈັດຕັ້ງປະຕິບັດວຽກງານຂອງກຸ່ມຄົນທີ່ບິດບ້ຽວຕໍ່ແນວທາງຂອງລັດຖະບານ ໂດຍສະເພາະຕໍ່ນິຕິກຳກ່ຽວກັບການຊົດເຊີຍ ຂອງລັດຖະບານທີ່ໄດ້ວາງອອກ.
ເພາະສະນັ້ນ, ການຂາດຄວາມຊອບທຳທີ່ພົວພັນກັບການກໍ່ສ້າງເສັ້ນທາງ ຍັງມີຫຼາຍຂອດຫຼາຍບັນຫາທີ່ຕ້ອງໄດ້ມີການກວດສອບ, ລາຍງານດ້ວຍ ຄວາມໂປ່ງໃສກວ່າເກົ່າໂດຍສະເພາະໄລຍະການລິເລີ່ມໂຄງການ.
