ເຮືອບິນສຸດປິດລັບຂອງສະຫະລັດ ເຄື່ອນໄຫວຢູ່ຮ່ວງອາວະກາດດົນທີ່ສຸດ

ຮຽບຮຽງໂດຍ: ລູກເມືອງພວນ

ເຮືອບິນ X-37B ຂອງສະຫະລັດ ເຄື່ອນໄຫວຢູ່ຮ່ວງອາວະກາດໄດ້ 718 ວັນຢ່າງຕໍ່ເນື່ອງ.

ໂຄສົກກອງທັບສະຫະລັດ William Russell ອອກມາຖະແຫຼງໃນວັນທີ 27 ສິງຫານີ້ວ່າ: ເຮືອບິນ X-37B ໄດ້ກັບຄືນລົງສູ່ພື້ນດິນ ພາຍຫຼັງໄດ້ເຮັດສຳເລັດໜ້າທີ່ໄດ້ຮັບມອບໝາຍ, ແຕ່ເຂົາບໍ່ໄດ້ໃຫ້ລາຍລະອຽດກ່ຽວກັບການເຄື່ອນໄຫວຂອງມັນຢູ່ເທິງເສັ້ນສູນສູດຕະຫຼອດການເຄື່ອນໄຫວນັ້ນ.

ຂ່າວຈາກ Russell ໃຫ້ຮູ້ວ່າ: ເຮືອບິນ X-37B ເຄີຍບິນຂຶ້ນໄປເຄື່ອນໄຫວຢູ່ບົນເສັ້ນສູນສູດ 5 ເທື່ອແລ້ວໃນຮອບ 10 ປີທີ່ຜ່ານມາ ແລະ ຖ້ຽວນີ້ ເປັນຖ້ຽວທີ່ດົນກ່ວາໝູ່. ຄັ້ງທຳອິດແມ່ນບິນຂຶ້ນໃນປີ 2010 ແລະ ເຄື່ອນໄຫວຢູ່ເທິງອາວະກາດເປັນເວລາ 224 ວັນ. ພາລະກິດຄັ້ງທີສີ່ຂອງ X-37B ແມ່ນ 717 ວັນ ແລະ 20 ຊົ່ວໂມງ ແລະ ສຳເລັດລົງໃນເດືອນພຶດສະພາ 2017.

ການຂຶ້ນໄປໃນຄັ້ງທີ 5 ໃນປີ 2017 ນັ້ນ, ມັນໄດ້ບິນອ້ອມໜ່ວຍໂລກເປັນເວລາ 20 ເດືອນ, ແຕ່ກອງທັບອາກາດຂອງສະຫະລັດຍັງຮັກສາຄວາມລັບອັນແທ້ຈິງຂອງເຮືອບິນ X-37B ໄວ້ຢູ່, ກໍເຊັ່ນດຽວກັນກັບການເຄື່ອນໄຫວຢູ່ໃນເສັ້ນສູນສູດ.

NASA ພັດທະນາ X-37B  ໃນປີ 1999 ປຽບສະເໝືອນກັບຍານອາວະກາດກະສວຍ ທີ່ມີຄວາມສາມາດນຳໃຊ້ໄດ້ຫຼາຍເທື່ອ. ປີ 2006 ກອງທັບອາກາດຂອງສະຫະລັດຈື່ງເປີດເຜີຍຕົ້ນສະບັບຂອງເຮືອບິນ X-37B ຊະນິດນີ້ ແມ່ນກອງທັບອາກາດສະຫະລັດເປັນຜູ້ພັດທະນາ ແລະ ຜະລິດຂຶ້ນ.

ທຸກການເຄື່ອນໄຫວຂອງໂຄງການດັ່ງກ່າວ ລ້ວນແຕ່ຖືກຮັກສາຄວາມລັບ. ກອງທັບອາກາດຂອງສະຫະລັດໃຫ້ຮູ້ວ່າ: ໂຄງການດັ່ງກ່າວເປັນໂຄງການທົດລອງເທັກໂນໂລຢີເພື່ອຊອກຫາພື້ນຖານພາຫະນະໃຫ້ຍານອາວະກາດທີ່ບໍ່ມີຄົນຂັບລຸ່ນໃໝ່. ນັກຊ່ຽວຊານຈຳນວນໜຶ່ງໃຫ້ຮູ້ວ່າ: X-37B ເປັນພາຫະນະນຳສົ່ງອາວຸດເທິງອາກາດ ຫຼື ຍານອາວະກາດລຸ່ນສອດແນມອື່ນໆ. X-37B ອາດຈະຖືກສົ່ງຂຶ້ນເປັນຄັ້ງທີ 6 ໃນທ້າຍປີ 2019 ນີ້ ດ້ວຍລູກສອນໄຟນຳສົ່ງ Atlas V.