ລາວ-ໄທເພີ່ມທະວີການຮ່ວມມືຮັກສາຄວາມສະຫງົບຕາມຊາຍແດນ

ເມື່ອທ້າຍອາທິດຜ່ານມານີ້, ທ່ານພົນຈັດຕະວາ ສີພັນ ພຸດທະວົງ ຫົວໜ້າກົມທະຫານຊາຍແດນ ກົມໃຫຍ່ເສນາທິການກອງທັບປະຊາຊົນລາວ ທັງເປັນປະທານຄະນະອະນຸ ກໍາມະການຮ່ວມມືຮັກສາຄວາມ ສະຫງົບຮຽບຮ້ອຍຕາມຊາຍ ແດນທົ່ວໄປ ລາວ-ໄທ ພ້ອມຄະນະ, ໄດ້ເຂົ້າຮ່ວມກອງປະຊຸມ ຄະນະອະນຸກໍາມະການຮ່ວມມືຮັກສາ ຄວາມສະຫງົບຮຽບຮ້ອຍຕາມ ຊາຍແດນທົ່ວໄປ ລາວ-ໄທ ຄັ້ງທີ 2 ປະຈຳປີ 2019 ແລະ ເຂົ້າຮ່ວມກອງປະຊຸມແກ້ ໄຂບັນຫາຢາເສບຕິດຕາມຊາຍ ແດນລາວ-ໄທ ຄັ້ງທີ 3 ທີ່ແຂວງມຸກດາຫານຣາຊະອາ

ນາຈັກໄທ. ໂດຍຝ່າຍໄທນໍາ​ໂດຍທ່ານ ພົນໂທ ຄໍາຣົນ ເຄຣືອວິຊະຍາຈານເຈົ້າ ກົມກິດຈະການຊາຍແດນທະຫານ ແລະ ປະທານຄະນະອະນຸ ກໍາມະການຮ່ວມມືຮັກສາຄວາມ ສະຫງົບຮຽບຮ້ອຍຕາມຊາຍ ແດນທົ່ວໄປ ໄທ-ລາວ    

  ໃນການພົບປະປຶກສາຫາລືສອງຝ່າຍ ໄດ້ຍົກໃຫ້ເຫັນການຮ່ວມມືຖານບ້ານໃກ້ເຮືອນຄຽງທີ່ດີລະຫວ່າງສອງຊາດສອງກອງທັບລາວ-ໄທ, ໄທ-ລາວ ໃນໄລຍະຜ່ານມາ ພ້ອມທັງຕີລາຄາ ແລະ ແລກປ່ຽນສະພາບການພົ້ນເດັ່ນທີ່ເກີດຂຶ້ນຢູ່ຕາມບໍລິເວນຊາຍແດນຂອງສອງປະເທດ; ທັງສອງຝ່າຍໄດ້ປຶກສາຫາລື ແລະ ຕີລາຄາຄືນຜົນຂອງການຮ່ວມມືໃນການຮັກສາຄວາມສະຫງົບຮຽບຮ້ອຍຕາມບໍລິເວນຊາຍແດນ ແລະ ການພົວພັນຂອງສອງປະເທດລາວ ແລະ ໄທ ຕາມບົດບັນທຶກຂອງກອງປະຊຸມຄະນະອະນຸກໍາມະການຮ່ວມມືຮັກສາຄວາມສະຫງົບ ຮຽບຮ້ອຍຕາມຊາຍແດນທົ່ວໄປລາວ-ໄທ ຄັ້ງທີ 1 ທີ່ແຂວງສະຫວັນນະເຂດ ສປປ ລາວ ໃນຕົ້ນປີ 2019 ຜ່ານມານີ້. ຜ່ານການຈັດຕັ້ງປະຕິບັດຕົວຈິງເຫັນວ່າການພົວພັນຮ່ວມມືຂອງທັງສອງຝ່າຍໄດ້ມີຄວາມຄືບໜ້າຢ່າງເປັນຮູບປະທໍາຫລາຍຂຶ້ນບົນພື້ນຖານແຫ່ງຄວາມສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ສາມາດແກ້ໄຂບັນຫາ ແລະ ເສີມຂະຫຍາຍຄວາມໝັ້ນຄົງຕາມຊາຍແດນຂອງສອງປະເທດໃຫ້ມີຄວາມເປັນລະບຽບຮຽບຮ້ອຍດີ.

   ສໍາລັບກອງປະຊຸມຄະນະປະຕິບັດງານ ເພື່ອແກ້ໄຂບັນຫາຢາເສບຕິດຕາມຊາຍແດນ ລາວ-ໄທ, ໄທ-ລາວ ຄັ້ງທີ 3, ທັງສອງຝ່າຍເຫັນດີຮ່ວມກັນປະຕິບັດຕາມບົດບັນທຶກຂອງກອງປະຊຸມຄະນະປະຕິບັດງານ ເພື່ອແກ້ໄຂບັນຫາຢາເສບຕິດຕາມຊາຍແດນລາວ-ໄທ ຄັ້ງ ທີ 2 ເພື່ອເປັນທິດທາງໃນການປະຕິບັດງານຂອງຄະນະປະຕິບັດງານຮ່ວມດັ່ງກ່າວໃຫ້ເກີດຜົນເປັນຮູບປະທໍາໂດຍໄວ ແລະ ຝ່າຍລາວຈະໄດ້ເປັນເຈົ້າພາບຈັດກອງປະຊຸມຄັ້ງຕໍ່ໄປໃນປີ 2020. ສໍາລັບການຮ່ວມມືໃນຕໍ່ໜ້າທັງສອງຝ່າຍຢືນຢັນຈະສືບຕໍ່ເປັນເຈົ້າການໃນການຈັດກອງປະຊຸມກອງເລຂານຸການຄະນະກໍາມະການຮ່ວມມືຮັກສາຄວາມ ສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ ຄັ້ງທີ 3 ແລະ ກອງປະຊຸມຄະນະອະນຸກໍາມະການຮ່ວມມືຮັກສາຄວາມສະຫົງບຮຽບຮ້ອຍຕາມຊາຍແດນ ທົ່ວໄປ ລາວ-ໄທຄັ້ງທີ 26 ແລະ ກອງປະຊຸມເພື່ອແກ້ໄຂບັນຫາຢາເສບຕິດຕາມຊາຍແດນ ລາວ-ໄທ ຄັ້ງທີ 4 ທີ່ຝ່າຍລາວຈະເປັນເຈົ້າພາບ.

  ພາຍຫລັງສໍາເລັດກອງປະຊຸມປະທານຮ່ວມທັງສອງຝ່າຍກໍໄດ້ເຊັນບົດບັນທຶກຄວາມເຂົ້າໃຈຮ່ວມກັນທັງສອງສະບັບຄື: ກອງປະຊຸມຄະນະອະນຸກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທຄັ້ງທີ 2 ປີ 2019 ແລະ ກອງປະຊຸມແກ້ໄຂບັນຫາຢາເສບຕິດຕາມຊາຍແດນລາວ-ໄທຄັ້ງທີ 3 ທີ່ແຂວງມຸກດາຫານຣາຊະອານາຈັກໄທ ເພື່ອເປັນບ່ອນອີງໃຫ້ສອງຝ່າຍໃນການຈັດຕັ້ງປະຕິບັດໃນຂັ້ນຕອນຕໍ່ໄປ.