ແມ່ນໍ້າຫລາຍສາຍສູງກາຍເຂດລະວັງໄພແລ້ວ
ກົມອຸຕຸນິຍົມ ແລະ ອຸທົກກະສາດ ລາຍງານວ່າ: ປັດຈຸບັນ ລະດັບແມ່ນໍ້າສາຍຕ່າງໆໄດ້ສູງກາຍເຂດລະວັງໄພແລ້ວ ຄື: ເຊຈໍາພອນ, ແກ້ງກອກແຂວງສະຫວັນນະເຂດ ຢູ່ລະດັບ 8,44 ແມັດ (ເຂດລະວັງໄພ 7,50 ແມັດ ແລະ ເຂດອັນຕະລາຍ 8,50 ແມັດ), ລ່ອງເຊບັ້ງໄຟແຂວງຄໍາມ່ວນມີລະດັບ 19,14 ແມັດ (ເຂດລະວັງໄພ 17,50 ແມັດ ແລະ ເຂດອັນຕະລາຍ 18,50 ແມັດ), ຂົວເຊບັ້ງໄຟມະຫາໄຊ ໃນລະດັບ 19,14 ແມັດ (ເຂດລະວັງໄພ 17,50 ແມັດ ແລະ ເຂດອັນຕະລາຍ 18,50 ແມັດ) ແລະ ຈຸດເຊບັ້ງໄຟເຂດຕົ້ນແຫນລະດັບນໍ້າປັດຈຸບັນ 13,32 ແມັດ (ເຂດລະວັງໄພ 12 ແມັດ ແລະ ເຂດອັນຕະລາຍ 13 ແມັດ.
ຂະນະທີ່ນໍ້າສາຍອື່ນໆກໍມີລະດັບສູງຂຶ້ນກາຍລະດັບເຕືອນໄພເຊັ່ນກັນ ແລະ ຄາດວ່າຈະສືບຕໍ່ສູງຂຶ້ນຕື່ມອີກ, ເນື່ອງຈາກໃນໄລຍະເດືອນສິງຫານີ້ຝົນຈະຕົກເປັນບໍລິເວນກວ້າງຢູ່ຫລາຍທ້ອງຖິ່ນ ແລະ ຕົກໜັກຢູ່ແຂວງພາກເໜືອຫາພາກກາງ ຍ້ອນຮ່ອງຄວາມກົດດັນອາກາດຕໍ່າຍັງຈະສືບຕໍ່ປົກຄຸມປະເທດລາວດ້ວຍກໍາລັງປານກາງ ສົມທົບກັບລົມມໍລະສຸມຕາເວັນຕົກສຽງໃຕ້ມີກໍາລັງແຮງພັດປົກຄຸມ. ດັ່ງນັ້ນ ຈຶ່ງເຕືອນໃຫ້ປະຊາຊົນທີ່ອາໃສຢູ່ລຽບຕາມແມ່ນໍ້າສາຂາຕ່າງໆຈົ່ງມີສະຕິລະວັງຕົວ ແລະ ມ້ຽນມັດວັດຖຸສິ່ງຂອງ, ສັດລ້ຽງໄປໄວ້ບ່ອນປອດໄພ, ພ້ອມທັງໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າຈາກອຸຕຸນິຍົມ ແລະ ອຸທົກກະສາດເປັນປະຈໍາໃນຊ່ວງລະດູຝົນນີ້.
