ນາຍົກຊີ້ນໍາຫລາຍບັນຫາໃຫ້ສະມາຊິກລັດຖະບານເອົາໃຈໃສ່
ໃນກອງປະຊຸມລັດຖະບານປະຈໍາເດືອນນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຊີ້ນໍາຫລາຍບັນຫາໃຫ້ສະມາຊິກລັດຖະບານສືບຕໍ່ເອົາໃຈໃສ່ປະຕິບັດດ້ວຍຄວາມຮັບພິຊອບສູງໃນຕໍ່ໜ້ານີ້ຄື: ເອົາໃຈໃສ່ຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ເພີ່ມທະວີການຕິດຕາມ ແລະ ແກ້ໄຂບັນຫາຕ່າງໆຢູ່ຕາມຊາຍແດນ, ເອົາໃຈໃສ່ສະກັດກັ້ນປາກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນແມ່ນການກໍ່ອາຊະຍາກໍາທຸກຮູບແບບ, ການຄ້າຂາຍຢາເສບຕິດ, ປຸ້ນຈີ້-ຊິງຊັບ, ຂີ້ລັກງັດແງະ ແລະ ອຸປະຕິເຫດບົນທ້ອງຖະໜົນໃຫ້ຫລຸດລົງ.
ເອົາໃຈໃສ່ຊຸກຍູ້ການຜະລິດກະສິກໍາ, ການປຸງແຕ່ງຜົນຜະລິດກະສິກໍາ, ການຄຸ້ມຄອງນໍາເຂົ້າສິນຄ້າໃຫ້ສອດຄ່ອງຕາມລະບຽບກົດໝາຍ ຕິດພັນກັບການສົ່ງເສີມການຜະລິດພາຍໃນໃຫ້ແຂງແຮງ, ຊຸກຍູ້ສົ່ງເສີມການຊົມໃຊ້ພາຍໃນ ແລະ ປຸກລະດົມການປະຢັດມັດທະຍັດ, ພ້ອມທັງກະກຽມຊ່ວຍເຫລືອດ້ານເຕັກນິກວິຊາການ ແລະ ແນວພັນ ໃຫ້ປະຊາຊົນທີ່ຖືກຜົນກະທົບຈາກໄພນໍ້າຖ້ວມສາມາດຟື້ນຟູການຜະລິດ ແລະ ດຳລົງຊີວິດເປັນປົກກະຕິ, ເອົາໃຈໃສ່ຄຸ້ມຄອງອັດຕາແລກປ່ຽນ ແລະ ມີວິທີບໍລິຫານການດຸນດ່ຽງໃນການແຊກແຊງອັດຕາແລກປ່ຽນ, ຄຸ້ມຄອງບັນດາທະນາຄານທຸລະກິດໃຫ້ດໍາເນີນທຸລະກິດມີປະສິດທິຜົນ, ສືບຕໍ່ສຸມໃສ່ການເກັບລາຍຮັບ ແລະ ປະຕິບັດລາຍຈ່າຍງົບປະມານໃຫ້ໄດ້ຕາມແຜນທີ່ກໍານົດໄວ້, ໂດຍເຂັ້ມງວດປະຕິບັດບັນດາມາດຕະການທີ່ໄດ້ກຳນົດແລ້ວ.
ເພີ່ມທະວີການເຝົ້າລະວັງ, ແກ້ໄຂການລະບາດຂອງພະຍາດອະຫິວາໝູອາຟຣິກາໃນຂອບເຂດທົ່ວປະເທດ ເມື່ອພົບການຕິດເຊື້ອຕ້ອງຮີບຮ້ອນທໍາລາຍຖິ້ມທັນທີ, ພ້ອມນັ້ນກໍສືບຕໍ່ເອົາໃຈໃສ່ປ້ອງກັນສັດຕູພືດ ເປັນຕົ້ນ: ຕັກແຕນສາລີ ແລະ ບົ້ງທໍາລາຍຜົນລະປູກຂອງປະຊາຊົນ, ເອົາໃຈໃສ່ການບໍລິຫານຈັດການນໍ້າອອກຈາກບັນດາເຂື່ອນໄຟຟ້າແຕ່ຫົວທີ ເພື່ອຮັບປະກັນການປ່ອຍນ້ຳບໍ່ໃຫ້ສົ່ງຜົນກະທົບຕໍ່ປະຊາຊົນ, ຮີບຮ້ອນປັບປຸງຮ່າງດຳລັດວ່າດ້ວຍທຸລະກິດຂະໜາດນ້ອຍ ແລະ ກາງ (SME) ແລະ ສ້າງນິຕິກຳຕ່າງໆເພື່ອຄຸ້ມຄອງກອງທຶນ (SME) ໃຫ້ສຳເລັດໂດຍໄວ ເພື່ອເປັນເຄື່ອງມືຊຸກຍູ້ສົ່ງເສີມການເຄື່ອນໄຫວຂອງ SME ໃຫ້ເປັນຂະບວນກວ້າງຂວາງ ປະກອບສ່ວນເຂົ້າໃນການຂະຫຍາຍຕົວຂອງເສດຖະກິດ.
ພ້ອມນີ້ກໍເພີ່ມທະວີການຕິດຕາມ, ເຝົ້າລະວັງ ແລະ ແກ້ໄຂບັນຫາການລະບາດຂອງພະຍາດໄຂ້ຍຸງລາຍ, ພ້ອມທັງເອົາໃຈໃສ່ກຳຈັດແຫລ່ງເພາະພັນຂອງຍຸງລາຍ ໂດຍໃຫ້ຖືເປັນໜ້າທີ່ຂອງທຸກຄົນໃນສັງຄົມ, ຕິດຕາມສະພາບການປ່ຽນແປງດິນຟ້າອາກາດເປັນປົກກະຕິ ພ້ອມທັງມີການແຈ້ງເຕືອນແນະນໍາປະຊາຊົນໃນເຂດທີ່ມີຄວາມສ່ຽງ, ເອົາໃຈໃສ່ກະກຽມການເປີດສົກຮຽນໃໝ່ໃຫ້ມີບັນຍາກາດ ແລະ ມີເນື້ອໃນ, ໂດຍການສ້າງກິດຈະກໍາເພື່ອເປັນແຮງຈູງໃຈໃຫ້ນັກຮຽນ-ນັກສຶກສາ ມີຄວາມກະຕືລືລົ້ນ ແລະ ເອົາໃຈໃສ່ຕໍ່ການຮໍ່າຮຽນຂອງຕົນ, ເອົາໃຈໃສ່ໂຄສະນາການທ່ອງທ່ຽວໃຫ້ຫລາຍຂຶ້ນ, ພ້ອມທັງປັບປຸງຂອດຂັ້ນທີ່ສ້າງຄວາມຫຍຸ້ງຍາກໃຫ້ນັກທ່ອງທ່ຽວ, ສືບຕໍ່ປັບປຸງການບໍລິການລັດ ບົນຈິດໃຈບໍລິການ ແລະ ຮັບໃຊ້ປະຊາຊົນ ແລະ ແກ້ໄຂການສະເໜີຂອງປະຊາຊົນ ແລະ ສັງຄົມ ຜ່ານສາຍດ່ວນຂອງລັດຖະບານ, ບັນດາຂະແໜງການ ແລະ ສື່ມວນຊົນຕ່າງໆຕາມພາລະບົດບາດຂອງຕົນ, ເອົາໃຈໃສ່ປະຕິບັດຄໍາຕັດສິນຂອງສານທີ່ມີຜົນສັກສິດທາງດ້ານກົດໝາຍໃຫ້ເຂັ້ມງວດ ແລະ ສັກສິດ, ແກ້ໄຂຂໍ້ຂັດແຍ່ງຕ່າງໆທາງສັງຄົມ ບົນພື້ນຖານຄວາມສະເໝີພາບຕໍ່ໜ້າກົດໝາຍ.
