ທ່ານຮູ້ຈັກພະຍາດມະເຮັງປອດດີປານໃດ

ຄົນສ່ວນຫລາຍມີຄວາມເຂົ້າໃຈວ່າຜູ້ທີ່ຈະເປັນພະຍາດມະເຮັງປອດໄດ້ນັ້ນຕ້ອງເປັນຜູ້ທີ່ສູບຢາ ຫລື ຜູ້ທີ່ດົມຄັວນທີ່ເປັນມົນລະພິດມາເປັນເວລາດົນເທົ່ານັ້ນ, ແຕ່ຄວາມຈິງແລ້ວ ຍັງມີອີກຫລາຍສາເຫດທີ່ທ່ານບໍ່ໄດ້ຄາດຄິດ ເຊິ່ງສາມາດນຳໄປສູ່ການເປັນມະເຮັງປອດໄດ້ ເຊັ່ນ : ການສືບດົມຄັວນຈາກການປຸງແຕ່ງອາຫານ, ຄັວນທີ່ມາຈາກຮູບ ຫລື ທຽນ ແລະ ເກີດມີການກາຍພັນຂຶ້ນ ໃນຮ່າງກາຍ. ການໝັ່ນສັງເກດອາການຜິດປົກກະຕິທີ່ເກີດຂຶ້ນກັບໂຕເອງ ແລະ ຄົນອ້ອມຂ້າງ, ການໄອ ຖືເປັນສັນຍານເຕືອນໜຶ່ງທີ່ຄົນທົ່ວໄປຮັບຮູ້ກັນດີວ່າຜູ້ທີ່ມີອາການໄອ ອາດຈະມີບັນຫາສຸຂະພາບບາງຢ່າງເກີດຂຶ້ນຢູ່ປອດ, ແຕ່ສຳລັບພະຍາດມະເຮັງປອດນັ້ນຈຳເປັນຕ້ອງສັງເກດອາການອື່ນໆທີ່ເກີດຂຶ້ນກັບຮ່າງກາຍຂອງຕົນຮ່ວມນຳ ໂດຍຫາກທ່ານມີອາການໄອຊຳ້ເຮື້ອ, ໄອປົນເລືອດ, ນຳ້ໜັກຫລຸດໂດຍບໍ່ມີສາເຫດ, ເມື່ອຍງ່າຍ, ສຽງແຫບ ຫາກທ່ານມີອາການເຫລົ່ານີ້ສະແດງວ່າເຖິງເວລາແລ້ວທີ່ທ່ານຕ້ອງໄປຫາໝໍເພື່ອກວດໃຫ້ໝັ້ນໃຈວ່າມີຊີ້ນປົ່ງຢູ່ໃນປອດຂອງທ່ານຫລືບໍ່ ເພື່ອບົ່ງມະຕິການປິ່ນປົວໃຫ້ທັນເວລາ ເພາະມະເຮັງປອດເປັນພະຍາດທີ່ຍິ່ງຮູ້ໄວ ປິ່ນປົວໄວ ທ່ານຈະມີໂອກາດເຊົາໄດ້ຫລາຍຂຶ້ນ ຫາກຖືກບົ່ງມະຕິວ່າເປັນພຽງໃນໄລຍະທີ 1 ຫລື 2.

     ການບົ່ງມະຕິວ່າເປັນມະເຮັງປອດຫລືບໍ່ ຕ້ອງໃຊ້ວິທີການເອັກສະເຣປອດ ຫລື ສ່ອງກ້ອງເຂົ້າໄປເບິ່ງໃນຫລອດລົມ ແລ້ວພົບວ່າມີກ້ອນຢູ່ ຈາກນັ້ນຈຶ່ງຕັດກ້ອນຊີ້ນອອກມາກວດເພື່ອເບິ່ງຜົນວ່າເປັນຊີ້ນຮ້າຍຫລືບໍ່ ແລະ ອີກວິທີໜຶ່ງແມ່ນກວດໂດຍລັງສີ. ມະເຮັງປອດມີ 4 ໄລຍະ ເຊິ່ງຈະມີການປິ່ນປົວທີ່ແຕກຕ່າງກັນໄປຕາມສາເຫດ ແລະ ຄວາມຮຸນແຮງຂອງອາການ.

      – ໄລຍະທີ 1 ນັ້ນເປັນໄລຍະໜຶ່ງທີ່ຈະພົບວ່າມີກ້ອນບາງຢ່າງຢູ່ໃນປອດ ເຊິ່ງໄລຍະນີ້ພະຍາດມະເຮັງປອດມັກຈະບໍ່ມີການສະແດງອາການຄວາມຜິດປົກກະຕິຂອງຮ່າງກາຍອອກມາ.

     – ໄລຍະທີ 2 ນັ້ນເປັນໄລຍະທີ່ມະເຮັງມີການແຜ່ກະຈາຍເຂົ້າສູ່ຕ່ອມນຳ້ເຫລືອງຢູ່ຂັ້ວນປອດ ໂດຍໃນໄລຍະທີ 1 ແລະ 2 ເປັນໄລຍະທີ່ສາມາດປິ່ນປົວໄດ້ໂດຍການຜ່າຕັດເອົາກ້ອນຊີ້ນອອກຈາກຮ່າງກາຍ.

     – ໄລຍະທີ 3 ນັ້ນເປັນໄລຍະທີ່ພົບມະເຮັງແຜ່ກະຈາຍໄປຫາຕ່ອມນຳ້ເຫລືອງ ແລະ ໃນຜົ້ງເອິກ ເຊິ່ງໃນການປິ່ນປົວອາດໃຊ້ວິທີການຜ່າຕັດ ຫລື ສາຍລັງສີ ເພື່ອໃຫ້ແຊນມະເຮັງມີຂະໜາດນ້ອຍລົງ ແລະ ຫາກເຮັດໄດ້ແລ້ວຈຶ່ງຄ່ອຍຜ່າຕັດອອກຈາກຮ່າງກາຍ.

     – ໄລຍະທີ 4 ນັ້ນເປັນໄລຍະທີ່ມະເຮັງໄດ້ກະຈາຍໂຕໄປຍັງສ່ວນຕ່າງໆຂອງຮ່າງກາຍ ເຊັ່ນ : ສະໝອງ, ຕັບ, ກະດູກ ແລະ ຕ່ອມໝວກໄຕ ເປັນຕົ້ນ.

    ດັ່ງນັ້ນ ຄວນເອົາໃຈໃສ່ຕໍ່ການກວດສຸຂະພາບປະຈຳທຸກປີ.