ຢ່າສວຍໃຊ້ກິລາກ໊ອຟ Golf ໄປແນວອື່ນ

ໂດຍ: ຈ. ຈຳ​ນຽມ​ການ

ສະບາຍດີເພື່ອນຜູ້ອ່ານທີ່ຮັກແພງ, ມື້ນີ້ຜູ້ຂຽນຂໍເອົາ ເລື່ອງກິລາກ໊ອຟ ມາແລກປ່ຽນກັນດັ່ງນີ້: ກ໊ອຟແມ່ນ ກິລາ ປະເພດໜຶ່ງ, ພວກເຮົາ ອາດຮູ້ດີ, ເພາະກິລາປະເພດນີ້ ອ່າວມີຕົ້ນທຶນໃນການຫລິ້ນສູງພໍສົມຄວນ; ອາດເວົ້າໄດ້ວ່າ ຄົນຜູ້ທີ່ມີຖານະແດ່  ແລະ ການເງິນດີຈຶ່ງຈະສາ ມາດຫລິ້ນກິລາປະເພດນີ້ໄດ້.

ສຳລັບຢູ່ລາວເຮົາກິລາ ກ໊ອຟ ໄດ້ມີຄົນຫລິ້ນ ບໍ່ພໍເທົ່າ ໃດທົດສະວັດມານີ້, ຄົນຫລິ້ນສ່ວນຫລາຍ ກໍແມ່ນນັກທຸລະກິດ ແລະ ພະນັກງານ ຜູ້ມີລາຍຮັບສູງ ແລະ ຜູ້ເປັນການ ນຳຈຳນວນໜຶ່ງ ທີ່ມີຜູ້ລ້ຽງດູ, ສ່ວນຄົນທົ່ວໄປແມ່ນບໍ່ສາ ມາດຫລິ້ນ.

ຕາມທັດສະນະຂອງຂ້າພະເຈົ້າ; ເຖິງວ່າການຕີກ໊ອຟ ຈະເປັນການຫລິ້ນກິລາປະ ເພດໜຶ່ງກໍຕາມ, ແຕ່ບາງຄັ້ງ ຄາວການຫລິ້ນກິລາປະເພດນີ້ ຍັງມີບາງຢ່າງທີ່ບໍ່ເໝາະສົມ ບົ່ມຊ້ອນຢູ່; ເຊິ່ງບັນຫາດ່ັງ  ກ່າວ ຂ້າພະເຈົ້າຂໍແລກປ່ຽນ ຄວາມເຫັນນຳບັນດາທ່ານ ດັ່ງນີ້: ກ່ອນອື່ນ ຂ້າພະເຈົ້າ ຂໍອະນຸຍາດ ຕັ້ງຄຳຖາມວ່າ: ຍ້ອນຫຍັງຜູ້ນຳຈີນ ຈຶ່ງຫ້າມ ພະນັກງານການນຳຂັ້ນສູງ ຂອງຕົນ ບໍ່ໃຫ້ຫລິ້ນກິລາ ປະເພດນີ້ ທັງໆທີ່ປະເທດເພິ່ນເປັນປະເທດທີ່ຮ່ັງມີ ອັນດັບໜຶ່ງອັນດັບສອງຂອງ ໂລກ!. ເຫດຜົນທີ່ແທ້ຈິງບັນ ດາທ່ານກໍຄົງຈະຮູ້ດີກວ່າ.

ການຫລິ້ນກິລາ ຕີກ໊ອຟ ຢູ່ລາວເຮົາ ຖ້າວ່າເປັນຄົນທົ່ວ ໄປຫລິ້ນ ແລະ ມີລັກ ສະນະ ກິລາ ຢ່າງແທ້ຈິງ ກໍຄົງຈະບໍ່ ເປັນຫຍັງ, ແຕ່ຖ້າວ່າ ບຸກຄົນ ທີ່ເປັນການນຳ ແມ່ນ ຈະບໍ່ ເໝາະສົມ ຢ່າງຍິ່ງ, ເຊິ່ງ ຕາມຄວາມເຫັນຂອງຂ້າພະເຈົ້າ ແມ່ນດ້ວຍເຫດຜົນດັ່ງນີ້:

1.ເປັນການເສຍເວລາ ທີ່ຈະຄິດ ແລະ ແກ້ໄຂບັນຫາ ສຳຄັນໆ ຂອງຊາດຫລາຍໆ ຢ່າງ, ເຊິ່ງບັນຫາເຫລົ່ານັ້ນ ຍັງລໍຄອຍ ແລະ ຮຽກຮ້ອງ ໃຫ້ພັກ, ລັດ ແກ້ໄຂໂດຍດ່ວນ.

2.ເປັນກິລາ ທີ່ມີລາຍ ຈ່າຍສິ້ນເປືອງສູງ ຫລື ແບບ ຟຸມເຟືອຍ ພໍສົມຄວນ; ເຖິງວ່າ ທ່ານອາດຈະບໍ່ໄດ້ຈົກເງິນຢູ່ ຖົງຕົນເອງອອກຈ່າຍ; ແຕ່ກໍ ມີຜູ້ອື່ນຈ່າຍໃຫ້ເພື່ອຜົນປະ ໂຫຍດໃດໜຶ່ງ.

3.ເປັນການເຂົ້າ ຂ່າຍ ຫລິ້ນການພະນັນແບບໜຶ່ງ ທີ່ມີການເດີມພັນສູງພໍສົມ ຄວນ ແລະ ມີບັນຫາຫຍໍ້ທໍ້ ທາງສັງຄົມອື່ນໆ ທີ່ບໍ່ດີຕາມ ມາກໍເປັນໄດ້.

4.ເປັນຊ່ອງຫວ່າງ ເຮັດໃຫ້ຄົນຈຳນວນໜຶ່ງທີ່ ບໍ່ຫວັງດີ ເຂົ້າເຖິງການນຳ ໄດ້ງ່າຍທີ່ສຸດ.

5.ເປັນການລະເມີດຂໍ້ ຫ້າມຂອງສະມາຊິກພັກ ແລະ ພາໃຫ້ເຊື່ອມເສຍພາບພົດ ອັນດີງາມຂອງການເປັນຜູ້ ນຳໄປໂດຍປະລິຍາຍ.

ສົມຄວນບໍ່ທີ່ປະເທດເຮົາຈະອອກກົດລະບຽບ ຫ້າມພະນັກງານການນຳຂັ້ນສູງບໍ່ໃຫ້ຫລິ້ນກິລາປະເພດນີ້, ເພາະ ວ່າ ມັນມີດ້ານລົບຫລາຍກວ່າ ດ້ານບວກດັ່ງນັ້ນຂໍໃຫ້ຜູ້ສະຫລາດສ່ອງໃສທັງຫລາຍ ຊ່ວຍກັນພິຈາລະນາເບິ່ງ./.