ໄຊຍະບູລີການປູກພືດລະດູຝົນປີນີ້ບໍ່ບັນລຸຕາມແຜນ

ຂະແໜງການປູກຝັງພະແນກກະສິກໍາແລະປ່າໄມ້ ແຂວງໄຊຍະບູລີໃຫ້ຮູ້ວ່າ: ການປູກພືດລະດູຝົນໃນປີນີ້ຄາດວ່າຈະບໍ່ບັນລຸຕາມແຜນການທີ່ຕັ້ງໄວ້ໃນເນື້ອທີ່ທັງໝົດ 165.767 ເຮັກຕາ, ໃນນີ້ແຜນການປູກເຂົ້ານາປີມີ 34.287 ເຮັກຕາ, ປູກເຂົ້າໄຮ່ 10.480 ເຮັກຕາແລະແຜນປູກພືດຕ່າງໆ 112.000 ເຮັກຕາ.ມາຮອດປັດຈຸບັນປະຕິບັດໄດ້ພຽງແຕ່ 70% ຂອງເນື້ອທີ່ແຜນການດັ່ງກ່າວ. ສໍາລັບການປູກເຂົ້າມາຮອດປັດຈຸບັນສາມາດປັກດໍາໄດ້ພຽງ 66%.ສ່ວນການປູກພືດຕ່າງໆປັດຈຸບັນປະຕິບັດໄດ້ແລ້ວ 102.051 ເຮັກຕາເທົ່າກັບ 91,72% ແລະຄາດວ່າການປູກພືດລະດູຝົນໃນທົ່ວແຂວງໄຊຍະບູລີຈະໃຫ້ສໍາເລັດໃນທ້າຍເດືອນສິງຫານີ້.ສາເຫດທີ່ການປູກພືດລະດູຝົນບໍ່ໄດ້ຕາມແຜນທີ່ກໍານົດໄວ້ກໍເພາະດິນຟ້າອາກາດມີການປ່ຽນແປງຜິດປົກກະຕິ, ເກີດໄພແຫ້ງແລ້ງ, ຝົນຕົກຂາດຊ່ວງຢູ່ຫລາຍເຂດໃນທົ່ວແຂວງ, ນັບແຕ່ເດືອນມິຖຸນາເປັນຕົ້ນມາຝົນບໍ່ຕົກຈຶ່ງເຮັດໃຫ້ການຜະລິດຫລ້າຊ້າກວ່າແຕ່ລະປີແລະໄດ້ສົ່ງຜົນກະທົບຕໍ່ການຜະລິດເຂົ້ານາປີ, ໂດຍສະເພາະແມ່ນນາ, ນໍ້າຝົນແລະພືດຊະນິດຕ່າງໆຍ້ອນຂາດນໍ້າ, ເມືອງເງິນປັກດໍາສໍາເລັດພຽງ 49,98% ຂອງແຜນການ, ເມືອງແກ່ນທ້າວປັກດໍາສໍາເລັດພຽງ 23,9% ຂອງແຜນການປີແລະເມືອງບໍ່ແຕນສໍາເລັດພຽງ 37,05% ຂອງແຜນການປີ. ຕໍ່ສະພາບດັ່ງກ່າວພະແນກກະສິກໍາ-ປ່າໄມ້ ແຂວງໄຊຍະບູລີໄດ້ມີການກະກຽມແນວພັນເຂົ້າແລະພືດຊະນິດຕ່າງໆ ເພື່ອປູກທົດແທນເຊັ່ນ: ແນວພັນເຂົ້າ 600 ໂຕນ, ແນວພັນສາລີ 200 ໂຕນ, ຖົ່ວດິນ 10 ໂຕນ, ຖົ່ວແດງ 2 ໂຕນແລະຖົ່ວດໍາ 2 ໂຕນ.