ຕ້ອງແກ້ຜູ້ທີ່ບໍ່ຢາກແກ້, ຜູ້ທີ່ຂັດຂວາງ

ໂດຍ: ຈ. ຈ​​ຳນຽນ​ການ

ສະບາຍດີ, ເພື່ອນຜູ້ອ່ານທີ່ຮັກແພງ, ນີ້ຄືຄວາມເວົ້າ ທີ່ເປັນຫລັກການ, ເປັນຍຸດທະສາດ ແລະ ເປັນຍຸດໂທບາຍຂອງທ່ານນາຍົກລັດຖະມົນຕີ  ສປປ ລາວ ກ່ຽວກັບວິໄສທັດ ໃນການແກ້ໄຂບັນຫາຂອງປະເທດຊາດເວົ້າລວມ ແລະ  ການແກ້ໄຂ ບັນຫາແນວຄິດ ແລະ ພຶດຕິກຳຂອງພະນັກງານເວົ້າສະເພາະ.

ປະຊາຊົນລາວຜູ້ທີ່ມີຈິດໃຈຮັກຊາດທີ່ແທ້ຈິງ ຂໍສະແດງຄວາມຊົມເຊີຍ ແລະ  ສະໜັບສະໜູນຢ່າງແຂງແຮງຕໍ່ກັບແນວທາງການແກ້ໄຂບັນຫາຕ່າງໆ ຂອງປະເທດຊາດທີ່ພັກ ແລະ ລັດຖະບານພວມດຳເນີນຢູ່ທຸກມື້ນີ້. ແຕ່ກໍພົບກັບບັນຫາ ຫລື ເປັນ ຄວາມຫຍຸ້ງຍາກ, ຍ້ອນມີກຸ່ມ ຄົນຈຳນວນໜຶ່ງ; ເຊິ່ງມີທັງ ຜູ້ມີອຳນາດ; ໜ້າທີ່ນັບແຕ່ຢູ່ສູນກາງລົງຮອດທ້ອງຖິ່ນ, ພະຍາຍາມຊອກທຸກວິທີເພື່ອ ກີດຂວາງກົດນ່ວງຈ່ອງດຶງ ບໍ່ໃຫ້ພັກ-ລັດ ແກ້ໄຂ.

ຕາມທັດສະນະຂອງ ທ່ານນາຍົກແມ່ນຈັດຄົນປະເພດນີ້ອອກເປັນ V ກຸ່ມແນວຄິດດ້ວຍກັນຄື:

1. ກຸ່ມບໍ່ຢາກແກ້: ແມ່ນຍ້ອນບໍ່ຢາກສູນເສຍອຳນາດ, ຕຳແໜ່ງ, ໜ້າທີ່ ແລະ ສິດຜົນປະໂຫຍດຂອງຕົນ  ເອງ ແລະ ພັກພວກ ທີ່ເຄີຍເປັນ ແລະ ເຄີຍໄດ້ຮັບໃນປັດ ຈຸບັນກໍຄືຜ່ານມາ.

2. ກຸ່ມບໍ່ກ້າແກ້: ຍ້ອນເປົ້າໝາຍແມ່ນຜູ້ໃຫຍ່ ຫລື  ເປັນຫົວໜ້າຂອງຕົນເອງ, ຖ້າຝືນແກ້ກໍລ້ຳບາກໃຈ ຫລື ບໍ່ກໍຈະຕົກຢູ່ໃນສະພາບທີ່ວ່າ  (ຕຳໜິນາຍ ພາຍຖົງໜີ ຫລື  ຕຳໜິນາຍຕາຍທັງຢືນ)  ແລະ ຍ້ອນຄວາມເຫັນອົກ ເຫັນໃຈກັນ.

3. ກຸ່ມບໍ່ຈິງໃຈແກ້:  ແມ່ນຍ້ອນໄດ້ເພິ່ງພາອາໄສ ເຊິ່ງກັນ ແລະ ກັນແບບ (ໄມ້ຄ້ຳກ້ວຍ ແລະ ຕົ້ນກ້ວຍ ແລະ ຕົ້ນກ້ວຍຄ້ຳໄມ້), ແລ້ວຮ່ວມກັນສ້າງ (ວິລະກຳຄວາມຜິດ ແລະ ຄອບຄອງຜົນປະໂຫຍດ).

4. ກຸ່ມບໍ່ມີຄວາມສາມາດແກ້: ກຸ່ມນີ້ ອາດຈະເບິ່ງ ຫລື ຕີລາຄາເປັນ 3 ດ້ານຄື:  

1. ແມ່ນຍ້ອນບໍ່ມີຄວາມຮູ້ຄວາມສາມາດແທ້, ບໍ່ຮູ້ຈັກຈຳແນກອັນຖືກອັນຜິດ, ບັນຫາໃດຄວນແກ້ກ່ອນ ແລະ ບັນຫາໃດຄວນແກ້ ຕາມຫລັງ.

2. ຍ້ອນບໍລິມາດຄວາມຜິດແມ່ນມີຫລາຍ; ທັງມີມູນຄ່າສູງ ແລະ ພົວພັນກັບ ຫລາຍພາກສ່ວນ.

3. ຍ້ອນວ່າເປົ້າໝາຍ ແມ່ນຜູ້ທີ່ມີອິດທິພົນ ຫລື ເປັນຜູ້ທີ່ມີອຳນາດມືດ.  (ນອກລະບົບ).

5. ກຸ່ມຜູ້ທີ່ຂັດຂວາງ: ແມ່ນເປັນຜູ້ມີສ່ວນກ່ຽວຂ້ອງກັບ 4 ກຸ່ມຄົນ ທີ່ໄດ້ ກ່າວມາ ຂ້າງເທິງ (ພວກທີ່ ມັນຍ້ອນ ເປັດ), ເພາະສະນັ້ນກຸ່ມຄົນນີ້ ຈຶ່ງຊອກທຸກວິທີເພື່ອ: ຄ້ານທຸກກໍລະນີ, ຂັດ ທຸກວິທີ ແລະ ກີດຂວາງທຸກ ຊ່ອງທາງເພື່ອບໍ່ໃຫ້ພັກ- ລັດໄດ້ແກ້ໄຂບັນຫາທີ່ ບໍ່ດີຂອງປະເທດຊາດ.

ທັງນີ້ກໍຍ້ອນຢາກຮັກ ສາອຳນາດ ແລະ ໜ້າທີ່ໃຫ້ຜູ້ທີ່ ຕົນເອງມີສ່ວນຮ່ວມໃນການ ສ້າງ (ມູນຄ່າເພີ່ມ) ໄວ້ໃຫ້ໄດ້ນານເທົ່າໃດກໍຍິ່ງເປັນຜົນ ດີໃຫ້ແກ່ຕົນເອງ ແລະ ພັກພວກຫລາຍເທົ່ານັ້ນ.

ສະຫລຸບລວມແລ້ວກໍ ຄື: ຖ້າວ່າພະນັກງານຜູ້ໃດ ຫາກມີແນວຄິດ ແລະ ພຶດຕິກຳ ດັ່ງກ່າວແມ່ນລ້ວນແຕ່ເປັນອັນຕະລາຍ ແລະ ບໍ່ ເປັນຜົນດີໃຫ້ແກ່ປະເທດຊາດທັງສິ້ນ.

ກຸ່ມຄົນເຫລົ່ານີ້ຍາມໃດພວກເຂົາກໍມັກຖືຕົນເອງສຳ  ຄັນກວ່າຜູ້ອື່ນ ແລະ ມັກມີ ເຫດຜົນ ແລະ ຂໍ້ອ້າງທີ່ວ່າ:   (ບໍ່ມີໃຜມາເຮັດວຽກປ່ຽນແທນຕົນເອງ, ຖ້າຂາດຂ້ອຍ ແລ້ວວຽກກໍຈະຢຸດສະງັກ ແລະ ເດີນຕໍ່ໄປບໍ່ໄດ້) ນີ້ຄືເປັນຄວາມຄິດ ແລະ ຄວາມເຂົ້າໃຈທີ່ບໍ່ຖືກຕ້ອງ. ເພາະວ່າຄົນດີມີຄວາມຮູ້ມີຄວາມ ສາມາດທີ່ຈະເຮັດວຽກໃຫ້ແກ່ປະເທດຊາດຢ່າງມີປະສິດທິພາບ ແລະ ມີປະສິດທິຜົນຍັງມີຫລາຍຮ້ອຍ ຫລາຍພັນຄົນ.  ແຕ່ເຂົາເຈົ້າບໍ່ມີໂອກາດໄດ້ນຳໃຊ້ຄວາມຮູ້ຄວາມສາມາດທີ່ມີເພື່ອຮັບໃຊ້ຊາດ ຫລື ຜູ້ ທີ່ມີກໍບໍ່ໄດ້ຮັບການຊຸກຍູ້ສົ່ງເສີມໃຫ້ກາຍເປັນກຳລັງແຮງສຳຄັນຕົ້ນຕໍຂອງຊາດຢ່າງ ແທ້ຈິງ, ດ້ວຍເຫດຜົນຍ້ອນ ບໍ່ແມ່ນເຊື້ອສາຍວົງຕະກຸນຂອງຜູ້ເປັນຫົວໜ້າຢູ່ແຕ່ລະບ່ອນ, ປະກົດການແບບນີ້ ແມ່ນມີຢູ່ທົ່ວໄປນັບແຕ່ຢູ່ສູນ ກາງລົງຮອດຂັ້ນພື້ນຖານແຕ່ຈະແກ້ໄຂແນວໃດມະຕິຂອງພັກໄດ້ກຳນົດໄວ້ແລ້ວ ຂໍໃຫ້ເປັນຈິງ./.