ນາຍົກຊົມເຊີຍແມ່ຍິງລາວໄດ້ຕັ້ງໜ້າປະກອບສ່ວນພັດທະນາປະເທດ
ໃນໂອກາດໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມພົບປະນັກທຸລະກິດແມ່ຍິງທົ່ວປະເທດຂອງທ່ານນາຍົກລັດຖະມົນຕີ ທອງລຸນ ສີສຸລິດ ເມື່ອທ້າຍອາທິດຜ່ານມານີ້, ເຊິ່ງທ່ານໄດ້ກ່າວສະແດງຄວາມຍ້ອງຍໍຊົມເຊີຍໝາກຜົນຕ່າງໆທີ່ແມ່ຍິງລາວໃນທຸກຂົງເຂດວຽກງານຍາດມາໄດ້ໃນຜ່ານມາ, ເວົ້າສະເພາະແມ່ນນັກທຸລະກິດ, ຜູ້ປະກອບການເພດຍິງ ໄດ້ມີບົດບາດສໍາຄັນໃນການປະກອບສ່ວນນັບທັງດ້ານທຶນຮອນ, ເຫື່ອແຮງ, ສະຕິປັນຍາເຂົ້າໃນການພັດທະນາສ້າງສາປະເທດຊາດຢ່າງມີປະສິດທິຜົນ.
ທ່ານນາຍົກ ທອງລຸນ ສີສຸລິດ ໄດ້ຍົກໃຫ້ເຫັນວ່າ: ໃນຍຸກສະໄໝໃໝ່ນີ້,ແມ່ຍິງລາວ ໄດ້ພັດທະນາຕົນເອງໃຫ້ມີຄວາມເຕີບໃຫຍ່ເຂັ້ມແຂງ ແລະ ມີຄວາມສະເໝີພາບຍິງ-ຊາຍ ຄື: ມີແມ່ຍິງຈໍານວນຫລາຍກາຍເປັນນັກບໍລິຫານ, ນັກທຸລະກິດທີ່ດີເດັ່ນ, ເປັນນັກການທູດ, ນັກວິທະຍາສາດ, ນັກປະດິດຄິດແຕ່ງ, ນັກອະນຸລັກ ແລະ ເປັນຜູ້ຮັກສາຮີດຄອງປະເພນີອັນດີງາມຂອງຊາດ, ສະນັ້ນ ຂໍໃຫ້ແມ່ຍິງຈົ່ງສືບຕໍ່ເສີມຂະຫຍາຍມູນເຊື້ອວັດທະນະທໍາອັນດີງາມຂອງແມ່ຍິງລາວໃຫ້ຄົງຢູ່ຕະຫລອດໄປ, ຄຽງຄູ່ກັນນັ້ນ ກໍຕ້ອງໄດ້ບຸກບືນຕົວຫລາຍກວ່າເກົ່າໃນການດໍາລົງຊີວິດ ດ້ວຍການນຳໃຊ້ຈຸດແຂງທີ່ມີຂອງແມ່ຍິງລາວຄື: ຄວາມດຸໝັ່ນຂະຫຍັນພຽນ, ຄວາມອ່ອນໂຍນ, ຄວາມສັດຊື່, ປະຢັດມັດທະຍັດ ແລະ ມີຈະລິຍະທຳ ເພື່ອມາໝູນໃຊ້ເຂົ້າໃນວຽກງານຕ່າງໆໃຫ້ເກີດຜົນປະໂຫຍດຫລາຍຂຶ້ນ, ພ້ອມນັ້ນກໍຮຽກຮ້ອງນັກທຸລະກິດຍິງສືບຕໍ່ເພີ່ມທະວີຄວາມເອົາໃຈໃສ່ໃນການດໍາເນີນທຸລະກິດໃຫ້ເຂັ້ມແຂງ, ໂດຍສະເພາະເອົາໃຈໃສ່ການພັດທະນາຜະລິດສິນຄ້າຂອງຕົນໃຫ້ມີຄຸນນະພາບ, ມີການບໍລິການທີ່ດີ ເພື່ອໃຫ້ເປັນທີ່ຕ້ອງການຂອງຜູ້ບໍລິໂພກທັງພາຍໃນ ແລະ ຕ່າງປະເທດໃຫ້ຫລາຍຂຶ້ນ, ກໍສ້າງເງື່ອນໄຂໃຫ້ຜູ້ປະກອບການໄດ້ໄປຊຸກຍູ້ສົ່ງເສີມໃຫ້ປະຊາຊົນຜະລິດເປັນສິນຄ້າແລ້ວເກັບຊື້ເປັນວັດຖຸດິບ ຫລື ສິນຄ້ານໍາເຂົາເຈົ້າ ເພື່ອມາແປຮູບ ຫລືຈຳໜ່າຍຕໍ່ ເພື່ອສ້າງວຽກເຮັດງານທຳໃຫ້ປະຊາຊົນທ້ອງຖິ່ນ ແນໃສ່ແກ້ໄຂຄວາມທຸກຍາກຂອງເຂົາເຈົ້າຕາມແນວທາງນະໂຍບາຍຂອງພັກ ແລະ ລັດຖະບານ ໃຫ້ບັນລຸເປົ້າໝາຍວາງໄວ້.
