ແມ່ນແທ້ບໍວ່າ: “ຜີບ້ານພ້ອມີປ່າ” ?

ສະບາຍດີ, ເພື່ອນຜູ້ອ່ານ ທີ່ຮັກແພງ, ໃນຜ່ານມາ ພວກເຮົາມັກຈະໄດ້ຢືນຄໍາເວົ້າທີ່ວ່າ: “ຜີບ້ານພ້ອມຜີປ່າ” ແມ່ນປາບກັນຍາກ, ໃນຄວາມຈິງມັນກໍແມ່ນແນວນັ້ນແທ້ຖ້າທຸກສິ່ງທຸກຢ່າງຫາກດໍາເນີນໄປດ້ວຍລະບຽບກົດຫມາຍ, ດ້ວຍຈັນຍາບັນຂອງພະນັກງານ ແລະດ້ວຍຄວາມຫວັງດີເພື່ອຮັບໃຊ້ຊາດ ຮັບໃຊ້ປະຊາຊົນ,ບໍ່ມີກົນອຸບາຍ ເລ່ຫຼ່ຽມ, ເຮັດວຽກດ້ວຍຄວາມບໍລິສຸດສັດຊື່, ບໍ່ສ້າງເງື່ອນໄຂ ແລະບໍ່ໃຫ້ການຮ່ວມມື ຫຼື ອັນທີ່ເອີ້ນວ່າ: ” ຜີບ້ານ ພ້ອມຜີປ່າ ” ແລ້ວ ທຸກສິ່ງທຸກ ຢ່າງຄົງຈະໂປ່ງໃສ. ” ຜີບ້ານ ພ້ອມຜີປ່າ ” ເປັນສັດຕູໂຕອັນຕະລາຍ ຮ້າຍກາດທີ່ສຸດຂອງ ປະເທດຊາດ, ມັນສາມາດເຮັດໃຫ້ປະເທດຊາດອ່ອນເພຍເປ້ຍລ່ອຍ, ຊຸດໂຊມ ແລະ ຄ່ອຍໆຫມົດແຮງໃນທີ່ສຸດ.

ຜ່ານມາມີຫຼາຍໂຄງການບໍ່ປະສົບຜົນສໍາເລັດຫຼື ຖ້າສໍາເລັດກໍບໍ່ຮັບປະກັນຄຸນນະພາບ, ຍ້ອນທຶນຮອນແລະ ງົບປະມານດັ່ງກ່າວຖືກຕັດຮອນເອົາເຂົ້າທັງຖົງຜີບ້ານ ແລະ ຖົງຜີປ່າ,ພ້ອມກັນໂກງກິນເງິນໂຄງການຕ່າງໆ ນັບທັງໂຄງການຊ່ວຍເຫຼືອຂອງຕ່າງປະເທດ ແລະ ໂຄງການຂອງລັດຖະບານເອງ, ຈຶ່ງເຮັດໃຫ້ສະພາບການພັດທະນາສ້າງສາປະເທດຊາດໃນ 40 ປີກ່ວາຜ່ານມາ ເດີນໄປດ້ວຍຄວາມລໍາບາກຍາກແຄ້ນ. ຜົນປະໂຫຍດທີ່ຊາດໄດ້ຮັບ ແມ່ນຫນ້ອຍກວ່າຜົນປະໂຫຍດຂອງຜີບ້ານແລະ ຜີປ່າໄດ້ຮັບ.

ພະນັກງານລັດຈໍານວນຫນຶ່ງລໍ້າລວຍ, ຮັ່ງມີດີໄດ້ຂຶ້ນຜິດປົກກະຕິ. ອັນນັ້ນມັນຢັ້ງຢືນໃຫ້ເຫັນວ່າການສໍ້ລາດບັງຫຼວງ, ຜີບ້ານພ້ອມຜີປ່າມີຈິງ. ຖ້າບໍ່ມີຜີບ້ານພ້ອມຜີປ່າ ການຜັນຂົ້ວຮັ່ງຂົ້ວທຸກຢູ່ລາວອາດຈະບໍ່ຫ່າງກັນຫຼາຍປານນີ້, ແທນທີ່ຈະແມ່ນປະຊາຊົນເປັນຜູ້ຮັ່ງມີກວ່າພະນັກງານລັດ ທີ່ມີເງິນເດືອນ1-2 ລ້ານກີບ/ເດືອນ. ແຕ່ກົງກັນຂ້າມພະນັກງານຊໍ້າເປັນຜູ້ລໍ້າລວຍກວ່າໃຜຫມົດ.

ເພື່ອສະກັດກັ້ນບໍ່ໃຫ້ຜີບ້ານພ້ອມຜີປ່າ, ແຕ່ລະໂຄງການ ແລະ ທຸກກິດຈະກໍາລົງທຶນຂອງລັດ ຕ້ອງແຕ່ງຕັ້ງຄະນະສະເພາະກິດຂຶ້ນເພື່ອກວດກາການເງິນ, ຕິດຕາມການດໍາເນີນໂຄງການ, ກວດກາເບິ່ງມູນຄ່າການລົງທຶນ,ຜົນໄດ້ຜົນເສຍ ແລະ ກໍາໄລແນວໃດ. ເຮັດໄດ້ຄືແນວນີ້ອາດຈະຜ່ອນຜັນ ພວກຜີບ້ານພ້ອມຜີປ່າບໍ່ຫຼາຍກໍຫນ້ອຍ./.