ກົມລ້ຽງສັດລົງກວດກາການປະຕິບັດມາດຕະການດ້ານສຸຂະອະນາໄມຢູ່ສະຖານກັກກັນສັດແຂວງຫລວງນໍ້າທາ

ເມື່ອທ້າຍອາທິດຜ່ານມານີ້, ຫົວໜ້າກົມລ້ຽງສັດກະຊວງກະສິກໍາ ແລະ ປ່າໄມ້ ພ້ອມຄະນະວິຊາການກົມ ໄດ້ລົງໄປຕິດຕາມກວດກາການປະຕິບັດມາດຕະການດ້ານສຸຂານາໄມຂອງບໍລິສັດ ໂກທົງ ລາວພັດທະນາການລ້ຽງສັດຈຳກັດ, ເຊິ່ງບໍລິສັດດັ່ງກ່າວໄດ້ຮັບອະນຸຍາດຈາກອໍານາດການປົກຄອງແຂວງໃຫ້ລົງທຶນລ້ຽງງົວຊີ້ນ ແລະ ກໍ່ສ້າງສະຖານທີ່ກັກກັນສັດ ເພື່ອສົ່ງອອກໄປ ສປຈີນ, ເພື່ອໃຫ້ປະຕິບັດຕາມຂໍ້ຕົກລົງວ່າດ້ວຍການກັກກັນ, ກວດກາສຸຂະພາບສັດໃຫຍ່ ເພື່ອສົ່ງອອກໄປຕ່າງປະເທດໃຫ້ຖືກຕ້ອງຕາມລະບຽບຫລັກການ.

ທ່ານ ຫວາງ ເຊິງ ລີ ປະທານບໍລິສັດດັ່ງກ່າວ ລາຍງານວ່າ: ຕົນເອງໄດ້ລົງທຶນເຂົ້າໃນການກໍ່ສ້າງພື້ນຖານໂຄງລ່າງ ແລະ ສິ່ງອຳນວຍຄວາມສະດວກແກ່ໂຄງການລ້ຽງງົວຊີ້ນ ແລະ ສະຖານທີ່ກັກກັນສັດ ກ່ອນສົ່ງອອກໄປ ສປຈີນ ຕົກເປັນມູນຄ່າຫລາຍກວ່າ 36 ລ້ານຢວນ (ສະກຸນເງິນຈີນ) ແລະ ເຫັນວ່າ ໂຄງການທັງໝົດແມ່ນຄືບໜ້າແລ້ວ 90%, ພ້ອມທັງຢືນຢັນວ່າຈະເອົາໃຈໃສ່ປະຕິບັດຕາມລະບຽບຫລັກການ ແລະ ມາດຕະການຕ່າງໆຕາມກົດໝາຍ ສປປ ລາວ ກໍານົດ, ເພື່ອເຮັດໃຫ້ການລ້ຽງງົວຂອງບໍລິສັດມີຄຸນນະພາບ, ຮັບປະກັນຄວາມສະອາດປອດໄພ, ມີການເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ ເພື່ອປະກອບສ່ວນເຂົ້າໃນການພັດທະນາທ້ອງຖິ່ນໃຫ້ດີຂຶ້ນ.