ໂລກມີໄພ-ຄົນປ່ຽນໄປ

ໂດຍ: ທິດ​ກ່ຳ

ສະພາບດິນຟ້າອາກາດໃນປີ 2019 ເຫັນວ່າມີການ ປ່ຽນແປງ ແລະ ເປັນໄປຫຼາຍເຕີບນັບແຕ່ເດືອນພຶດສະພາ ຫາຕົ້ນເດືອນມິຖຸນາມີຝົນຕົກເປັນບໍລິເວນຫວ່າງເກືອບທົ່ວປະເທດ ຈາກສະພາບດັ່ງກ່າວ, ມີຫຼາຍທ້ອງຖິ່ນໄດ້ລົງມືຕົກກ້າດໍານາເຊິ່ງມາຮອດປັດຈຸບັນກໍສໍາເລັດເປັນທີ່ຮຽບຮ້ອຍເຊັ່ນ: ແຖວເມື່ອງຄູນຄໍາ, ຄໍາເກີດ, ເລາະລົງໄປແຖວນາກາຍ, ຍົມມະລາດ, ບົວລະພາແຂວງ ຄໍາມ່ວນ ນອກຈາກນັ້ນ, ຫຼາຍບ້ານຫຼາຍທ້ອງຖິ່ນໃນທົ່ວປະເທດ ກໍພວມສືບຕໍ່ປັກດໍາຕາມຄວາມເປັນຈິງເພື່ອຖ້າຟ້າຖ້າຝົນຈະໂຮຍຮໍາລົງມາໂດຍສະເພາະບ່ອນທີ່ເປັນນາໂນນ, ນາໂຄກ.

ໄປຄຽງຄູ່ກັນນັ້ນ, ຍັງມີຫຼາຍທ້ອງຖິ່ນ, ຫຼາຍບ້ານ, ຫຼາຍເມືອງ, ຫຼາຍແຂວງກໍຍັງເຫັນທົ່ງນາປ່າເຂົ້າເຫືອດແຫ້ງຍ້ອນບໍ່ມີຝົນ.ເຂົ້ານາທີ່ ປັກດໍາໄປແລ້ວກໍຕາຍດິນນາແຕກເຫີບກະແດ້ງແຫ້ງງໍ, ເຮັດໃຫ້ຫ້ວຍຮ່ອງຄອງບຶງ, ແມ່ນໍ້າລໍາເຊແຕ່ເຫນືອ ຮອດໄຕ້ກໍເປັນໄປຕາມສະພາບຂາດເຂີນນໍ້າເຫມືອນກັນ ປາກົດການທີ່ເດັ່ນຊັດ ​ເຊິ່ງພວກເຮົາບໍ່ເຄີຍເຫັນໃນຫຼາຍ ສິບໆປີຜ່ານມາກໍຄືແມ່ນ້ຳຂອງໄດ້ຕື້ນເຂີນບົກ ແຫ້ງຈົນກາຍເປັນແກ້ງຕາດຫາດຊາຍ.

ເມື່ອຕັ້ງໂຈດກັນວ່າ,ຈາກສະພາບການປ່ຽນແປງຂອງທໍາມະຊາດທີ່ໄດ້ກ່າວມານີ້ ມັນເປັນດ້ວຍສາເຫດອັນໃດ? ຄໍາຕອບກໍຄືຍ້ອນໂລກມີການປ່ຽນແປງໄປຕາມສະພາບໃນຕົວຂອງມັນເອງ, ອັນສອງມາກໍຍ້ອນການບຸກ ລຸກທໍາມະຊາດຂອງຄົນເຮົາດ້ວຍປັດໄຈຫຼາຍຢ່າງໃນ ການພັດທະນາ.

ພົນລະເມືອງຂອງໂລກແຕ່ລະປີເພີ່ມຂຶ້ນ, ການຜະລິດເພີ່ມຂຶ້ນ, ຄວາມຕ້ອງການເພີ່ມຂຶ້ນ, ການແກ້ງແຍ່ງແຂ່ງ ຂັນເພື່ອຄວາມຢູ່ລອດກໍເພີ່ມຂຶ້ນຈົນເຮັດໃຫ້ທໍາມະຊາດກຸດຫ້ຽນໄປໃນແຕ່ລະມື້, ຍ້ອນທໍາມະຊາດມີການປ່ຽນແປງສັງຄົມເຮົາກໍມີການປ່ຽນ ແປງໄປຕາມສະພາບຢ່າງອັດຕະໂນມັດ.

ຍຸກປັດຈຸບັນ, ມາເບິ່ງສະພາບຈິດໃຈແລະການກະທໍາຂອງຄົນເຮົາກໍມີອັນເປັນໄປໃນທາງອັນຖືກ ແລະ ອັນ ຜິດ,ໃນທາງອັນດີ ແລະ ອັນຮ້າຍເຊິ່ງບາງຢ່າງກໍຝືນກົດເກນ, ຝືນທໍາມະຊາດທໍາລາຍຕົນເອງ, ທໍາລາຍທໍາມະຊາດ, ທໍາລາຍສັງຄົມ ແລະ ທໍາລາຍ ໂລກໃນແຕ່ລະໄລຍະ, ຍ້ອນຄວາມກະຫາຍຂອງມະນຸດເຮົາທີ່ບໍ່ຄໍານຶງເຖິງໄພອັນຕະລາຍທີ່ຈະຕາມມາລ້າງ ຜານກໍຍິ່ງເຮັດໃຫ້ຄົນເຮົາເຮັດທຸກສິ່ງທຸກຢ່າງທີ່ບໍ່ເຄີຍເຫັນກໍເຫັນ, ບໍ່ເຄີຍມີກໍມີຕົວ ຢ່າງບ່ອນເຄີຍຫນາວຈັດ ມີນ້ຳກ້ອນນ້ຳແຂງກໍເປື່ອຍກາຍເປັນບ່ອນຮ້ອນ, ປ່າທີ່ເຄີຍໃຫ້ຄວາມຊຸ່ມຊື່ນ, ອາ ກາດສົດຮົ່ມເຢັນກໍພາກັນ ໄປຕັດ ແລະ ທໍາລາຍມັນຈົນ ວ່າ ຍັງເຫຼືອແຕ່ປ່າເຫຼົ່າ, ນ້ຳຫ້ວຍນ້ຳເຊທີ່ມັນລອງ ໄຫຼໃສ ເຢັນກໍພາກັນໄປອັດຄັນຕັນ ທ້າງເຮັດເຂື່ອນເຮັດຝາຍ.

ໃນການພົວພັນສັງຄົມລະຫວ່າງຄົນກັບຄົນຜູ້ຊາຍ ກັບຜູ້ຊາຍກໍແຕ່ງງານກັນ, ຜູ້ຍິງກັບຜູ້ຍິງກໍແຕ່ງດອງ ເອົາກັນ, ກະເທີຍກໍອ້າງວ່າ ຕົນເປັນຜູ້ຍິງໄປຫາເລງຊອກ ຕີຜູ້ຊາຍຕາມເທັກຕາມບາ ຕາມຊອກຕາມຊອຍ, ຜູ້ທີ່ເປັນ ຄົນຄົບຂັນຕາມກາຍະສໍາພັນກໍໄປຊອກຕາມລ່າຫາຜົນປະໂຫຍດຢ່າງບໍ່ມີເມືອງພໍ, ສໍ້ລາດບັງຫຼວງ, ບາງຄົນກໍໄປຫາເລາະງັດແງະ,  ປຸ້ນເຈົ້າເອົາຂອງ, ຊອກຂາຍຢາມ້າຄ້າຢາເມົາປາບເທົ່າໃດກໍບໍ່ຫມົດສິ້ນ. ນີ້ລະຄືການປ່ຽນໄປແບບໄຮ້ສິນທໍາຂອງຄົນເຮົາໃນຍຸກໂລກາພິວັດ.

ເຖິງຢ່າງໃດກໍດີ, ຕາມທິດກໍ່າວ່າອີງໃສ່ປະເທດເຮົາຍັງມີເງື່ອນໄຂ ແລະ ທ່າແຮງຫຼາຍດ້ານໃນການພັດທະນາເພື່ອຄວາມຢູ່ລອດກໍຍັງພໍມີທາງອອກເຊິ່ງຕໍາລາວິເສດທີ່ບອກໃຫ້ພວກເຮົາພ້ອມກັນເຮັດກໍຄືມະຕິ 10 ຂອງພັກໄດ້ວາງອອກນອກຈາກນັ້ນ, ກໍແມ່ນແຜນພັດທະນາເສດຖະກິດ-ສັງຄົມ ແຫ່ງລັດຖ້າເຮັດໄດ້ຄືເວົ້າ ແມ່ນຍົກໂປ້ເລີຍ!./.