ອັງກິດຂັດແຍ່ງທັດສະນະກັບສະຫະລັດອາເມລິກາໃນການເຈລະຈາກັບ ອີຣານ
ຮຽບຮຽງໂດຍ: ລູກເມືອງພວນ
ລອນດອນ ປະກາດວ່າ: ບໍ່ເຫັນດີກັບວິທີການຂອງວໍຊິງຕັນ ໃນການແກ້ໄຂວິກິດການຢູ່ ອີຣານ ແລະ ເວົ້າວ່າ: ຍັງມີເວລາຢູ່ທີ່ຈະກອບກູ້ເອົາສົນທິສັນຍານິວເຄຣຍກັບຄືນມາ.
ອີງຕາມແຫຼ່ງຂ່າວຈາກ vnExpress, ໃນມື້ວານນີ້, ວັນທີ 17 ກໍລະກົດ, ທ່ານລັດຖະມົນຕີກະຊວງການຕ່າງປະເທດຂອງອັງກິດ Jeremy Hunt ກ່າວໃນກອງປະຊຸມສຳພັນທະມິດເອີຣົບ ຢູ່ທີ່ ບຣຸກແຊນ ປະເທດ ແບນຊິກວ່າ: “ ພວກເຮົາຖືສະຫະລັດອາເມລິກາເປັນເພື່ອນທີ່ໃກ້ສິດທີ່ສຸດ ແລະ ສຳພັນທະມິດຂອງພວກເຮົາແມ່ນພື້ນຖານໃຫ້ແກ່ສັນຕິພາບ ແລະ ຄວາມສີວິໄລໃນທົ່ວໂລກ ຕະຫຼອດ 75 ປີທີ່ຜ່ານມາ, ແຕ່ວ່າ ເພື່ອນກັນກໍ່ມີບາງຄັ້ງຄາວກໍ່ບໍ່ເອກະພາບກັນທາງດ້ານທັດສະນະເປັນເລື່ອງທຳມະດາ ”
“ ນີ້ ເປັນກໍລະນີພິເສດ ແລະ ເປັນກໍລະນີທີ່ຫາຍາກທີ່ສຸດທີ່ພວກເຮົາບໍ່ລົງລອຍກັບທັດສະນະຂອງສະຫະລັດ”, ທ່ານກ່າວອີກວ່າ: ເມື່ອເວົ້າເຖິງການຕັດສິນໃຈຂອງອຳນາດການປົກຄອງຂອງປະທານາທິບໍດີ ດໍໂນທຣຳໃນການຖອນຕົວອອກຈາກການຕົກລົງນິວເຄຣຍຂອງ ອີຣານ. “ ແຕ່ວ່າບັນຫາດັ່ງກ່າວນັ້ນ, ບໍ່ໝາຍຄວາມວ່າພວກເຮົາຈະບໍ່ມີການປະສານສົມທົບທີ່ແໜ້ນແຟ້ນນຳກັນ ເພື່ອບັນຫາສັນຕິພາບ ”
ກອງປະຊຸມຂອງບັນດາລັດຖະມົນຕີກະຊວງການຕ່າງປະເທດ ຂອງສະຫະພາບເອີຣົບຈັດຂຶ້ນແມ່ນເພື່ອຊອກຫາວິທີທາງແກ້ໄຂຄວາມເຄັ່ງຕຶງລະຫ່ວາງ ວໍຊິງຕັນ ກັບ ອີຣານ, ພ້ອມດຽວກັນນັ້ນກໍ່ປຶກສາຫາລືກ່ຽວກັບການຕົກລົງບັນຫາອາວຸດນິວເຄຣຍຂອງ ອີຣານ ໃນປີ 2015(JCPOA) ເຊີ່ງໄດ້ຮັບການເຊັນກັນລະຫ່ວາງ ອີຣານກັບບັນດາປະເທດມະຫາອຳນາດເຊັ່ນ: ອັງກິດ, ສະຫະລັດອາເມລິກາ, ລັດເຊຍ, ຝຣັ່ງ, ຈີນ, ເຢຍລະມັນ ແລະ ສະຫະພັນເອີຣົບ ຕໍ່ໜ້າສະພາບການເຄັ່ງຕຶງ ແລະ ຈະໄປເຖິງບ່ອນພັງທະລາຍລົງ.
ທ່ານ Hunt ເວົ້າວ່າ: “ ຍັງຕື່ມອີກໜຶ່ງປີ ອີຣານ ຈຶ່ງຈະຢຸດຕິການພັດທະນາອາວຸດນິວເຄຣຍ. ເຖິງແມ່ນວ່າ ບານປະຕູໜຶ່ງຈະອັດໄປແລ້ວກໍ່ຕາມ ແຕ່ປະຕູປ່ອງຢ້ຽມ ໃຫ້ແກ່ການຕົກລົງຍັງມີໂອກາດຢູ່ ”
ສະຫະລັດອາເມລິກາ ໄດ້ຖອນຕົວອອກຈາກສົນທິສັນຍາ ນິວເຄຣຍ ພຽງແຕ່ຜູ້ດຽວໃນປີກາຍນີ້, ຕອບໂຕ້ກັບບັນຫາດັ່ງກ່າວນັ້ນ, ເຕເຮຣານ ໄດ້ຖອນຕົວອອກຈາກຄຳໝັ້ນສັນຍາຂອງຕົນທີ່ໃຫ້ໄວ້, ໃນນັ້ນມີການເຮັດເຂັ້ມຂຸ້ນທາດ ອູຣານີອອມ ເພີ່ມຂຶ້ນຈົນກາຍຂີດກຳນົດໃນຂໍ້ຕົກລົງກັນ.
ຢູ່ໃນກອງປະຊຸມດັ່ງກ່າວ, ທ່ານ Hunt ໄດ້ກ່າວເຕືອນວ່າ: ຖ້າຫາກບັນດາປະເທດເອີຣົບບໍ່ປະຕິບັດຄຳໝັ້ນສັນຍາຂອງຕົນຕາມການຕົກລົງກ່ຽວກັບອາວຸດນິວເຄຣຍ, ອີຣານ ຈະກັບຄືນໄປສູ່ສະໄໝກ່ອນທີ່ຈະມີການຕົກລົງ JCPOA.
ອຳນາດການປົກຄອງຂອງປະທານາທິບໍດີ ດໍໂນທຣຳ ຂູ່ວ່າຈະນຳໃຊ້ການລົງໂທດຕໍ່ ອີຣານ, ໃນຂະນະດຽວກັນບັນດາປະເທດ ເອີຣົບ ຮຽກຮ້ອງໃຫ້ວໍຊິງຕັນ ແລະ ອີຣານ ເຈລະຈາກັນເພື່ອກອບກູ້ເອົາການຕົກລົງ ອັນທີ່ພວກເຂົາເອີ້ນວ່າ: “ ດີທີ່ສຸດແມ່ນໃນເວລານີ້ ” .
