ທົ່ວປະເທດປັກດຳນາປີສຳເລັດແລ້ວ 36%

ກະຊວງກະສິກຳ ແລະ ປ່າໄມ້ ໃຫ້ຮູ້ວ່າ: ມາຮອດປັດຈຸບັນ ທົ່ວປະເທດປັກດຳນາປີສຳເລັດແລ້ວ 36% ຂອງເນື້ອທີ່ແຜນການ 850.000 ເຮັກຕາ, ໃນນັ້ນມີນາຢອດ 13.000 ເຮັກຕາ, ນາຫວ່ານ 65.330 ເຮັກຕາ. ປັດຈຸບັນ ສະເພາະນະຄອນຫລວງວຽງຈັນ ສຳເລັດການປັກດຳແລ້ວ ຂອງເນື້ອທີ່ແຜນການ, ສ່ວນຢູ່ແຂວງບໍ່ແກ້ວ ປັກດຳໄດ້ 5%. ສຳລັບການປູກພືດລະດູຝົນ ມາຮອດປັດຈຸບັນທົ່ວປະເທດປູກໄດ້ 193.471 ເຮັກຕາ ເທົ່າກັບ 28,39% ຂອງແຜນການ, ພືດທີ່ປູກຫຼາຍກວ່າໝູ່ແມ່ນ ສາລີອາຫານສັດ, ສາລີຫວານ ແລະ ພືດໄລຍະສັ້ນ ເປັນຕົ້ນໝາກໂມ, ໝາກແຕງລາຍ, ພືດຕະກຸນຖົ່ວ ແລະ ພືດຜັກຊະນິດຕ່າງໆທີ່ສາມາດປູກໄດ້ຫລາຍຮອບວຽນ ເຊິ່ງໄດ້ມີການເກັບກູ້ ແລະ ສົ່ງຂາຍຕາມຕະຫລາດພາຍໃນ ແລະ ສົ່ງອອກຕາມດ່ານປະເພນີທ້ອງຖິ່ນຈຳນວນໜຶ່ງ ເປັນຕົ້ນແມ່ນພືດຜັກ, ຢູ່ແຂວງພາກເໜືອ ປະຕິບັດໄດ້ 118.661 ເຮັກຕາ, ພາກກາງ 53.474 ເຮັກຕາ ແລະ ພາກໃຕ້ 21.336 ເຮັກຕາ.

ກະຊວງກະຊິກຳ ແລະ ປ່າໄມ້ ໃຫ້ຮູ້ຕື່ມວ່າ: ບົ້ງຝູງສາລີຍັງສືບຕໍ່ລະບາດຢ່າງຕໍ່ເນື່ອງ, ເຊິ່ງມາຮອດວັນທີ 10 ກໍລະກົດນີ້, ໄດ້ພົບການລະບາດຢູ່ 9 ແຂວງ ຄື: ໄຊຍະບູລີ, ອຸດົມໄຊ, ຫົວພັນ, ຊຽງຂວາງ, ຫລວງພະບາງ, ວຽງຈັນ,ນະຄອນຫລວງວຽງຈັນ, ບໍລິຄຳໄຊ ແລະ ສະຫວັນນະເຂດ, ລວມມີ 49 ເມືອງ, 347 ບ້ານ, ກວມເນື້ອທີ່ລະບາດລວມ 9 ແຂວງມີທັງໝົດ 102.521 ເຮັກຕາ ເທົ່າກັບ 85% ຂອງເນື້ອທີ່ສາລີໃນ 9 ແຂວງ ໃນນີ້ມີປະມານ 37% ຂອງເນື້ອທີ່ລະບາດ ແມ່ນໄດ້ຮັບຜົນກະທົບໜັກໂດຍສະເພາະແຂວງໄຊຍະບູລີ ລວມມີ 168 ບ້ານໃນ 11 ເມືອງ, ມີເນື້ອທີ່ຖືກລະບາດ 34.993 ເຮັກຕາ, ສ່ວນຢູ່ແຂວງ ອຸດົມໄຊ ມີ 47 ບ້ານໃນ 7 ເມືອງ, ມີເນື້ອທີ່ລະບາດ 30,446 ເຮັກຕາ ແລະ ແຂວງຊຽງຂວາງ ລວມມີ 7 ເມືອງ 67 ບ້ານ ໃນເນື້ອທີ່ຖືກລະບາດ 20.870 ເຮັກຕາ.